Пала ӱчӱн улуғлар нандырығлығлар
27.12.2024
Хабарлар
Брифинг. Хакасияҷа МВД-да республиканың хазна автоинспекциязының устаа Пала праволарынҷа уполномоченнайнаң хада олғаннарны чоллардағы саайларға кирбес сурығҷа брифинг иртiргеннер
Мероприятие иртiрерiнде араласханнар Хакасияҷа МВД-ның хазна автоинспекциязы устааның пастығы, полицияның подполковнигi Роман Краус паза Хакасияның Пала праволарынҷа уполномоченнайы Ирина Ауль.
Хайди искiрген Роман Краус чоллардағы саайларға улуғлар даа, олғаннар даа кiр парчалар. Пу кӱнге республикадағы чолларда 78 саай таныхталған, оларда 31 пала палығлатхан. Олғаннар сизiктiг полбаан сылтаанда, чолларда 17 саай пол парған, iдӧк чазы читкелектер, мотоцикллернiң, мопедтернiң паза велосипедтернiң водительлерi полып, 12 cаай ит салғаннар. Транспорт урунысханда, 26 саай полған, оларда пассажир полчатхан палалар палығлатханнар. 7 саайда палалар хорғыс ағылбас хурларнаң алай одырчыхтарнаң тузаланылбаан полғаннар.
Чазы читкелектернi саайларға кирбес пӧгiннең, Хакасияда хысхы каникуллар тузында 25 улуғ хырластаң 10 кӱргенге теере «Олғаннарға – Хакасияның хорғыс чох чоллары» улуғ профилактика акциязы иртiрiлче. Аны хоостыра ГАИ подразделениелерi олғаннарны чоллардағы саайларға кирбес мероприятиелер апарарлар. Андағ тоғыс СМИ-лар пастыра, ӱгредiг организацияларында, ол санда паба-iҷелер чыылығларында апарылар, андар чоллар чӧрiзiнiң олған инспекторлары, «паба-iҷелер патрульы» тартыларлар. Мероприятиелерде чииттернiң халых пiрiгiстерi, волонтёрлар, студенттер аралазарлар. Алынҷа хайығ салылар тӧңнердең чолларзар, тюбингнең тузаланып, чылчатханнарға, iдӧк аны транспортха хаптырып алчатханнарға.
Олғаннарнаң саайлар полдыртпас киректе паба-iҷелернiң кӧзiдiмi улуғ. Олар постары чолларҷа чӧрҷең правилоларны сайбапчатсалар, палалары iдӧк правилоларны сайбирлар.
Чолларда саайлар полчатхан санны ӧскiрчелер руль кистiнде iзiлiк полып одырчатхан кiзiлер паза водитель удостоверениезiн алдыртыбысхан кiзiлер. Iди пу чылда iзiлiк полған 2,5 муң водитель руль кистiнең хыйа идiлген паза водитель удостоверениезi чох 4,5 муң кiзi тутырған. Ағаа хоза, 500 кiзi, iзiлiк полып, руль кистiне хатап одырған ӱчӱн тутырған. Таныхтирға кирек, мындағ саннар хызырылчатханы пiлдiрбинче.
Ирина Аульның чооғынаң, пала хайди тудынчатхан культуразы сӧбiредегi киректернең палғалыстығ. Прай андағ киректер ӱчӱн паба-iҷелер нандырығлығ полчалар. Палаа ӧӧн кӧзiдiм – паба-iҷенiң тудынчатханы. Пала сыбыра паба-iҷее тӧӧй поларға кӱстенче. Аннаң иптеп, хызааннабин, хырыспин, чоохтазарға, аны ӱгредерге кирек. Паба-iҷелер палаларына пiр дее хайығ салбинчатсалар, ол палалар сайбағларға тартылчатсалар, паба-iҷенi хатығлирға, административнай нандырыға тартарға кирек.
Паба-iҷелер аарласнаң тузаланзыннар, чолларда палаларға кӧзiдiм полып, нандырығлығ тудынзыннар. Пiрее тӧңнең палалар чолзар чылчатханын кӧрзелер, хыринҷа иртпин, оларны тохтатсыннар. Пасха кiзiнiң палалары тiп санирға кирек чоғыл, олар – прайзыбыстың палалары. Мин, iзiлiк полып, руль кистiне одырчатханнарзар паза водитель удостоверениезiн алдыртыбысхан кiзiлерзер айланарға сағынчам. Транспорт – ол хорғыстығ ниме, аннаң нандырығлығ тузаланарға кирек. Палаларны хайраллаңар, оларға хорғыс хаҷан даа полбазын. Чолны кисчетсе, паланың холын тудынып, хада иптеп кизерге кирек, андада ла оларға хорғыс полбас.
Роман Краус хоза чоохтаан: «Транспорт клӱстерiн паба-iҷелер чазы читкелек палаларға постары пирiбiсчелер, iдӧк оларға, мототехника алып, сыйлап пирчелер. Пiс Ӧӧркi Чӧпсер айланғабыс: заправка станцияларында чазы читкелектерге мототехникаа бензин урарға чаратпас закон алыбызарға. Амды парламентте андағ закон алар проект кӧрiлче, ол алылза, саайлар саны хызырыларына iзенiс пар».
Автор :
Николай Султреков
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
