Істеніс чолының чахсы салтары – хазна сыйии
27.12.2024
Хабарлар
Пастағы рядта Пётр Толмашовнаң Лариса Кичеева, ікінҷі рядта (сол саринаң) Наталья Боргоякова, Ирина Окунева паза Елена Чучунова
Сыйыхтас. Хазна сыйиина турызарға хаҷан даа ӧріністіг, че Наа чылға удур – ікі хати артых
Пу кӱннерде Хакасия правительствозының чыылығлар залында аймах сыйыхтар удаа читірілче. Андағ пайрамнығ чыылығларның пірсі киҷее, 26 улуғ хырласта, иртті. Хазнаның паза республиканың сыйыхтарын аларға ӱгредіг, имнег кирее, транспорт, аал хонии тоғынҷылары хығыртылғаннар.
– Пӱӱн мында аймах кӧстеглерде істенчеткен кізілер чыылыс парған: ӱгредігде, имнег киреенде, культурада, спортта, халых чуртазында паза пасха даа. Сірер прайзыңар пос тоғызына пирін салған кізізер, кӱстенҷік, ӧткін тоғынҷызар. Алғызым читірчем сірерге тіспен тоғызыңар ӱчӱн, республиканың тилізіне паза халых чуртазына хозымыңар ӱчӱн, – алғыс сӧстерін читірген Хакасия пазы Валентин Коновалов.
Сыйыхтас хазна сыйыхтарынаң пасталған. Россия президентінің Аарластығ пічии Хакасияның Табығ комиссиязының кнезі Александр Чуманинге чонға кирек сурығларны тӱзімніг пӧкчеткені паза хозымы ӱчӱн читірілген. Александр Владимировичке пу сыйых тӧреен кӱнінде читірілген, аннаңар уламох танығлығ пол парған.
Хакасияның хазна сыйыхтары 19 кізее читірілген. Іди кӧп чыл тіспен істенізі, пӧзік узы паза Хакасияның чахсы чуртазына хозымы ӱчӱн «Хакасияның істеніс сабланызы» медальға турысханнар: Ағбан городтың имнег туразының 1 № терапевт пӧлиинің устағҷызы Татьяна Золотухина, Ағбанның 7№ школазының директоры Любовь Черчинская, Сорығның 3 № школазының математика ӱгретчізі Валентина Юшкова паза тынағдағы Елена Кирилловская.
«Хакасия ӱгредиинің саблығ тоғынҷызы» аарластығ ат Ағбанның 22 № школазының директоры Ирина Окуневаа читірілген, «Хакасия культуразының саблығ тоғынҷызы» аарластығ ат – Ағбанның 2 № олған музыка школазының ӱгретчізі Тамара Балобанға, «Хакасияның Чон узы» аарластығ ат – Ағбанның «Чиңіс» культура учреждениезінің кружок устағҷызы Нина Петроваа.
Хакасияның Аарластығ пічиин 11 кізі алған, ол санда Пилтірдегі олған искусство школазының директоры Наталья Боргоякова, Асхыс аймааның тынағдағы чуртағҷызы Пётр Толмашов паза Ағбан городтың «Троллейбусное управление» предприятиезінің троллейбус водительі Елена Чучунова.
– Мин спорт киреене 45-че чыл пир салғам. Позым ӱгредиим хоостыра хакас тілі паза литература ӱгретчізі полчам. АГПИ-да ӱгренгем. Істеніс чолымны Ӱс чулдағы ортымах школада пастаам. Андар мині кӱресче тренерім Михаил Игнатьевич Боргояков ызыбысхан. Анда мині пастап интернатсар тоғысха алғаннар, сӧбіреме андох пӧлік пиргеннер, пір чыл пазынаң совхоз наа пӱдірілген чурт пирген. Соонаң ипчім Эвелина Николаевна Борчикованың чирінде, Ағбан пилтірі аймаандағы Сапогов аалда, чуртирға киліcкен. Анаң Асхыс аалзар кӧскебіс, анда тура пӱдіріп алғабыс. Тренер полып тоғынғам, соонаң Aсхыс аймааның спорт комитедінең 10 чыл устаам, 20 чыл спорт школазының директоры полғам, анаң алызығлар полған соонаң устағҷы орынҷызы полғам. 15-че чыл тынағдабын, – істеніс чолынаңар чоохтап пирген Пётр Дмитриевич.
Хакасияның сенаторы, Россияның Федерация чӧбінің кізізі Олег Земцов алғыстас пічиин Федеральнай налог службазының Хакасияҷа устанызының пастых орынҷызы Лариса Кичееваа читірген.
Хакасия пазының пастағы орынҷызы Татьяна Курбатова, орынҷызы Михаил Побызаков хазна сыйыхтарына турысханнарзар алғыстас сӧстерінең айланғаннарох. Иң пастағызын олар кӧп чыл тіспен істеністерінің салтарларын, республика тилізіне хозымнарын таныхтааннар паза чағдапчатхан 2025 чылнаң алғыстааннар.
Сом Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
