ЛНР Хакасияа алғызын читiрген
27.12.2024
Хабарлар
Хабазығ. Хакасия пазы Валентин Коновалов ЛНР-ның Свердловск муниципальнай округына шеф полызиин пирерiнҷе 2024 чылдағы тоғыс салтарларына чарыдылған чыылығ иртiрген
Донбасстаң кӧнi видео палғалыста Луганск Чон Республиказының Свердловск муниципальнай округының пазы Андрей Сухачёв, Свердловсктағы 7№ школаның директоры Владимир Косяков паза шеф полызии хоостыра пирiлчеткен прай тоғысты хайығда тутчатхан Хакасия пазының наа регионнарнаң палғалыс тударынҷа чӧпчiзi Сергей Комаров араласханнар.
2024 чылда шеф полызии хоостыра Свердловск муниципальнай округта iкi ӱгредiг учреждениезi тыхталған. Свердловсктағы 2№ гимназияда ас-тамах тимнеҷең пӧлiк тыхталған паза ағаа кирек оборудование алылған. Iкiнҷi объект – Екатерина Литовченконың адынаң Свердловсктағы 7№ школа. Аның кӧзенектерi алыстырылған, хыры, кiрлес нааҷылалған, ибiркiзi иптелген. Амғы тусха Хакасиядаң парған саайлар салтарларын чох итчең пӱдiрiг ӧмезі тыхтағ тоғыстарын 104 % толдыр салған. Пӱдiрiгҷiлер Свердловск муниципальнай округта пiр чыл чуртап тоғынғаннар. Ӧнетiн инфраструктура проекттерi тоғыстарын толдырарынҷа Хакасия ӱзiнҷi орында турча Россияның пасха субъекттерi аразында.
Хакасия ӱлгӱлерi хабазиинаң Свердловск муниципальнай пӱдiстiң ӱгредiг учреждениелерiне, искусство школаларына ӱгредiг пособиелерi паза литература, кӧг оборудованиезi паза тирiглер пирiлген, библиотекаларға – наа книгалар, спорт учреждениелерiне – спорт тирiглерi. Чыл сай Луганск Чон Республиказының олғаннары талайзар тынанарға пар килчелер паза Хакасиязар экскурсияа кил парчалар.
Ӧнетiн чаа операциязы пасталғаннаң Хакасия, пiстiң хазнаның пасха даа регионнары чiли, Донецк паза Луганск Чон республикаларына, Запорожье паза Херсон областьтарына, ӧнетiн чаа операциязында араласчатхан чааҷыларға аймах гуманитарнай полызығлар ызар тоғысха хозылған. Донецкте гуманитарнай таарлағны хайраллаҷаң ӧнетiн склад тӧстелген. СВО пасталғаннаң Ағбандағы Таштыпскай орамада орныхчатхан «Опора» фондтаң тиксi 1,5 муң тонна 36 конвой гуманитарнай полызығ СВО-зар ызылған, ол санда 2024 чылда – 319 тонна 19 конвой. Пӱӱл iдӧк тимiр чолҷа ӧнетiн чаа операциязында араласчатхан пiстiң регионнаң парған чааҷыларға автомобиль техниказы ызылған. Ол техника санында 59 автомобиль транспорты, 20 квадроцикл, 68 пилот чох учух чӧрҷең аппарат, 45 палғалыс ниме-ноозы, 550 чӱленҷең сетка, автомобильлерге хоза чардыхтар паза тегiлектер, пестер, генераторлар, бронежилеттер, имнер, имнег оборудованиезі паза пасха даа ниме-ноо, 200 тонна азыра ас-тамах. Iдӧк чааҷыларға 3107 адалған посылка ызылған.
Пӱӱл пiстiң республика, хазнаның пасха даа регионнары чiли, Курск облазының хыйалға кiрген чуртағҷыларына 35 тонна азыра гуманитарнай полызығ читiрген. Ол иң кирек ниме-ноо, генераторлар, холодильниктер, тура чылытчаң приборлар, кип-азах паза даа пасхазы.
Свердловск муниципальнай округтың пазы Андрей Сухачёв Хакасия пазы Валентин Коноваловха, республика ӱлгӱлерiне паза пiстiң чуртағҷыларға хабазығ ӱчӱн алғызын читiрген.
– Полызығ ӱчӱн прайзына алғыс. Сiрернiң чирлерiңде пӧкчең сурығлар илеедезін пiлiнчебiс, че сiрер мындағ оой нимес туста пiске полысчазар. Пicтiң чуртағҷыларыбыс ол полызығларыңны уғаа аарлапчалар.
Пiстiң тоғынҷылар чидiспинче. Сiрернiң пӱдiрiг ӧмеңер чахсы полысча, – таныхтаан Андрей Сухачёв.
Свердловсктағы 7№ школаның директоры Владимир Косяковтың чооғынаң, Хакасиядағы саайлар салтарларын чох итчең пӱдiрiг ӧмезі школаны тыхтабысхан соонда, ол истiг, чарых паза пӱӱнгi кӱнге килiстiре пол парған. Анзына чуртағҷылар паза ӱгренҷiлер уғаа ӧрiнчелер.
– Сiрер осхас кiзiлер парда, амғы туста паарсах киректер ӱзілбинчеткеніне поғдархапчабыс. Улуғ алғыс сiрерге! Сергей Владимирович Комаров пiстi Хакасиянаң палғалыстырчатхан кiзi полча, – теен Владимир Косяков.
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
