Чиңiсті чағыннадарға полысчалар
25.12.2024
Хабарлар
«Арарат» армян национальнай культура пірігізі» халых организациязының кнезі Григор Искандарян, «Менин Кыргызстаным» халых организациязының кнес орынҷызы Марс Жумбаев, «Ада чир-суубыс арачылағҷылары» фондтың Таштыптағы пӧлиинің социальнай координаторы Елена Цыганкова
Сыйыхтас. Улуғ хырлас айының 23-ҷi кӱнiнде Хакасия пазы Валентин Коновалов ӧнетiн чаа операциязы араласчыларына, оларның сӧбiрелерiне, хыйалға кiрген хырығ хыриндағы регионнарның чуртағҷыларына хабасхан, гуманитарнай таарлағлар чыырға полысхан республика чуртағҷыларын алғыстап, сыйыхтар читiрген
Ӧнетiн чаа операциязы пасталғаннаң Хакасия 1500 тоннаҷа гуманитарнай полызығ ызыбысхан. Пу тохтадылбинчатхан тоғыс, хайзында прайзы араласча, ӱлгӱ органнары кiзiлерiнең ала олғаннарға паза тынағдағы улусха читiре.
Валентин Коновалов полызығлығ тоғыста ӧткiн араласхан кiзiлерге Хакас Республика пазының алғыстас пiчiктерiн паза алғыстастарын читiрген. Оларның санында предприятие-учреждениелернiң устағҷылары паза тоғынҷылары, идiнҷектер, национальнай диаспораларның, халых организацияларының паза пiрiгiстерiнiң, волонтёрлар чӧрiмнерiнiң кiзiлерi, проекттернiң кураторлары полғаннар. Сыйыхтар алғаннарның саны 50 азыра кiзi полған. Че пу полызығны пирген, чыырға паза апарарға полысхан кiзiлернiң кiчiг чардығы.
– Сiрернiң кӱстенiзiңер чиңiстi чағыннадарға полысча. Илбек Ада чаа тузындағы чiли, пiр пӧгiнге чидер ӱчӱн, пӱӱнгi кӱнде чон пiр чӧптіг тудынарға кирек. Пicтiң пӱдiрiгҷiлернi алынҷа таныхтирҷыхпын, Луганск Чон Республиказында пӱдiрiглернi тыхтирға полысхан ӱчӱн. Сiрернiң тоғызыңар паарсас тании полча. Пicтiң республикада хабазарға тимде ол син кӧп кiзi парынаң поғдархапчам. Прай ниме итчеткенiңер ӱчӱн улуғ алғыс! Тоғызыңар ӱчӱн алғыс! – таныхтаан Валентин Коновалов.
«Ада чир-суубыс арачылағҷылары» хазна фондының Таштып аймаандағы пӧлиинiң социальнай координаторы Елена Цыганкова Хакасия пазының алғыстазын алғаннарның санында.
– Пiссер ӧнетiн чаа операциязында араласчатхан чааҷылар, СВО-да ӱрееннернің туған-чағыннары айланчалар. 2023 чылда СВО араласчылары удостоверениелерiн аларынҷа иң удаа айланҷаңнар. Анаң имнег полызии хоостыра сурыныстар полған: санаторийлерде реабилитация иртерiнҷе, федеральнай паза республика льготаларын паза тӧлеглерiн аларынҷа, кинек ветераннарға сыныхтағ иртерінҷе паза протезтер аларынҷа паза пасха даа айланыстар полғаннар. Иң ӧӧнi ол кинек ветераннарға чуртасха кӧнiгерi полча. Пiстiң фонд прай пу сурығларны пӧгерге полысча, – теен Елена Цыганкова.
Сом Дмитрий Сунчугашевти
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
