«Хакас чирі» газетаның хабарҷызы чиңісчілер санында
25.12.2024
Хабарлар
Ӧӧркі Чӧптің хазых хайраллирынҷа паза социальнай политикаҷа комитедінің кнезі Людмила Кауфман «Хрусталь парыс-2024» марығның чиңісчізі Наталья Сюптерековаа сыйых читірче
Марығ. Хакасияның Ӧӧркі Чӧбі «Хрусталь парыс-2024» республика марииның чиңісчілерін сыйыхтаан
Улуғ хырлас айының 23-ҷі кӱнінде Ӧӧркі Чӧпте хабарҷылар аразындағы марығның чиңісчілерін таныхтааннар. Пайрамнығ чыылығны Ӧӧркі Чӧп кнезі Сергей Сокол асхан. Ол марығда араласхан прай хабарҷыларға алғызын читірген.
– Алғыс критика ӱчӱн – ол піске алызарға паза алнынзар парарға полысча. Алғыс хабарларны сын оңдайнаң пирчеткеніңер ӱчӱн. Анзы пӱӱн уғаа кирек, – таныхтаан Сергей Михайлович.
Хакасияның Ӧӧркі Чӧбінің «Хрусталь парыс-2024» марии пӱӱл 21-ҷі хати иртірілген. Пу чылда андар хоза ікі наа номинация киріл парған: видеооператорларның паза сомҷыларның тоғызын паалирына – «Иң чахсы момент», муниципальнай округтарның печать сығарыстарының хабарҷыларын таныхтирына – «Кічіг чир-суубыстың табылған кізізі».
Ӧӧркі Чӧп кнезінің пастағы орынҷызы, марығны тимнеп иртірчеткен комитеттің кнезі Пётр Воронин «Хрусталь парыс-2024» марығның ӧӧн пӧгіні чарыдығлығ тоғыс полчатханына хайығ айландырған.
– Депутаттарны махтирға кирек чоғыл, – чоохтанған Пётр Иванович. – Пістің чуртағҷыларға ноға закон алылчатханын паза нимедеңер ол закон полчатханын чарыт пирерге, чонға республиканың закон сығарҷаң органының тоғызынаңар сын хабарны читір пирерге кирек.
Пӱӱл «Хрусталь парыс-2024» марығның Гран-при сыйиина «Хакасия» ГТРК-ның хабарҷызы Пётр Пермяков «Азых чоохтазығ» номинацияа сығарған материалы ӱчӱн турысхан.
«Телевидение паза радио» ӧмеде чиңісчілер полыбысханнар: «Ӧӧнінеңер чарыда» номинацияда – «Абакан» ИРТА» МУП-тың нандырығлығ редакторы Алексей Елистратов, «Чоннаң табылғаннар» номинацияда – «Хакасия» ГТРК-ның искірігліг программалар службазының ӧнетін хабарҷызы Константин Кравцов. «Парламент партнёры» номинацияда чиңісчі табылбаан – ол номинацияда марығ араласчылары нинҷе-де сюжет пирерге кирек полғаннар, марыға пір ле материал кіртір.
«Печать паза интернет-сығарыс» ӧмеде «Хакас чирі» газетаның ӧӧн редактор орынҷызы Наталья Сюптерекова «Парламент партнёры» номинацияда чиңіc тутхан. Пасха чиңісчілер: «Ӧӧнінеңер чарыда» номинацияда – «Хакасия» газетаның ӧӧн редакторының пастағы орынҷызы Виктор Лебедев, «Чоннаң табылғаннар» номинацияда – «Аскизский труженик» газетаның ӧӧн редактор орынҷызы Максим Ахпашев, «Азых чоохтазығ» номинацияда – «Хакасия» газетаның ӧӧн редактор орынҷызы Юрий Абумов.
Наа номинацияларда чиңіс тутханнар: «Саянская заря» газетаның ӧӧн редакторы Вячеслав Кончаков – «Кічіг чир-суубыстың табылған кізізі» номинацияда, «Хакасия» газетаның сомҷызы Равиль Дзязько – «Иң чахсы момент» номинацияда.
Сом Дмитрий Сунчугашевти
Автор :
Альберт Толмашов
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
