Постарыңны паза ис-пайыңарны хайраллаңар
25.12.2024
Хабарлар
Росгвардеецтер кізілерге оғырластар полдыртпас памяткалар таратчалар
Сизіндіріг. Наа чыл ӱлӱкӱннері алнында Росгвардияның Хакасияҷа пӧлии республика чуртағҷыларына посха хорғыс чох тудынардаңар паза ис-пайны хайраллирдаңар хатап искірче
Чыл сай Росгвардия иртірчеткен «Хорғыс чох Наа чыл» чӧрім хоостыра ведомствоның тоғынҷылары, Хакасия чуртағҷыларынаң ис-пай сайбағларынҷа паза тиріглер айланызы сферадағы законодательство сайбалчатханынҷа профилактика тоғызын апарып, чарыдығлығ чоохтазығлар иртірчелер.
Ӱр узарадылчатхан тынағ кӱннерінде квартиралардаң паза автомобильлердең оғырластар саны илееде ӧс парыбысча. Росгвардияның ведомствони нимес хадағ тоғынҷылары андағ сайбағлар полдыртпас пӧгіннең чуртағҷыларға памяткалар таратчалар. Олар тураларзар паза транспортсар законнаң хыйыстыра кірерінең арачыланар оңдайлардаңар чоохтапчалар. Iди наа чыл кип-азаан кискен таныс нимес кізілерні чуртсар позытпасха чӧптер пирчелер. Ӱтертістіг мероприятиелерде паза пасха кізілернең чоох алысчатса, сизіктіг поларға кирек. Iдӧк ибде iзiктерні, кӧзенектерні азых артыспасха, социальнай сетьтерде ибде ӱр чох полардаңар искіріг таратпасха, ибде кізі пар полчатханын кӧзідіп, чағыннарыңны чуртты кӧрерге сурынарға чӧптер пирілче.
– Че, ниме дее полза, ис-пайны хайраллир иң iзестіг оңдай – Росгвардияның ведомствони нимес хадағ пультынаң палғалыстығ хадағ-ӧрт сигнализациязын турғызары. Туразар пасха кізі кірзе, ол орынзар тутчаң ӧме киліп, сайбағҷыны табырах тудып алар. Ағаа хоза, андағ сигнализация хадарчатхан объектте ыс сыхчатханын таныхтапча. Анзы ӧрттi тузында ӱзірерге хабасча, – таныхтаан «Россияның Хакасияҷа ВНГ ОВО-зы» ФГКУ пастығының орынҷызы, полицияның подполковнигі Дмитрий Пуряев.
Iдӧк профилактика мероприятиелерін апарчалар Росгвардияның лицензиялар паза чарадығлар пирчеткен службаның тоғынҷылары. Инспекторлар тиріг ээлеріне тиріглернi хайраллир, оларнаң тузаланар, оларны ал чӧрер, оғырлатпас паза чідірбес правилоларға тудынардаңар чоохтапчалар. Iзiлiк полып, кӧп чоннығ орыннарда, ӱтертістіг мероприятиелер иртірчеткен организацияларда, хараазын ачығ суғ сатчатхан орыннарда тирiгліг поларға чарадылбинча. Чорыхха сыхчатхан ээлерге тирiгні сейфте пиктеп саларға, клӱстерін пірдеезіне пирбеске кирек. Сайбағҷылар административнай нандырыға тартылчалар.
Росгвардеецтер iдӧк чир-суғҷыларзар, пиротехниканаң тузаланчатса, чолларда паза ағаа чағын орыннарда полза, электроприборларнаң тузаланчатса, сизіктіг поларға айланчалар.
Cом авторни
Автор :
Росгвардияның Хакасияҷа устааның пресс-службазы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
