Иң артыхтары ӱлӱкӱнге хығыртылған
25.12.2024
Хабарлар
Таштып аймаандағы олғаннар правительство сыбыҷаанда
Правительство сыбыҷаа. Наа чылға удур Ағбандағы М.Ю.Лермонтовтың адынаң Орыс драма театрында республиканың ӧткiн паза чайаачы олғаннарына правительство сыбыҷаа ирткен
Ағбанзар мындағ чорыхнаң олар чахсы ӱгренчеткен, аймах предметтерҷе олимпиадаларда, чайаачы паза спорт марығларында сыйыхтығ орыннар алчатхан ӱчӱн хығыртылғаннар. Правительство сыбыҷаанда iдӧк чуға чуртапчатхан сӧбiрелердегi паза аймах школа-интернаттардағы олғаннар араласханнар.
Наа чыл матырлары Соох апсахнаң Хар хызыҷахтаң пасха, республиканың прай пулуңнарынаң чыылысхан оолах-хызыҷахтарны Хакасия пазы Валентин Коновалов алғыстаан:
– Аарлығ олғаннар! Чыл тоозылчатса, салтарлар идер кибiр хаҷанох тӧстел парған. Сiрерге иртчеткен чыл маңнаныстығ полған, аймах кӧстеглерде пӧзiк чидiглерге читкезер. Мыннаң мындар iдӧк пiлiске, тилiске тартылыңар. Чағдапчатхан Наа чылнаң алғыстапчам. Хазииңар пик ползын. Паза прай сағынған сағыстарың 2025 чылда тол парзын!
Устағҷы кізінің мындағ сӧстерінең чаразарға кирек. Театрзар иң артых олғаннар хығыртылғаннар. Таштып аймаанаң чайаачы паза спорт марығларында пӧзiк чидiглерге читкен ӱгренҷiлер таллалғаннар. Аймахтағы музыка школазынаң тӧртче пала читкен. Олар хакас кӧг тирiглерiнең ойнапчалар. Ибiгдең спортсмен оол-хызыҷахтар хығыртылғаннар. Пӱӱл олар президент марығларында араласханнар. Ол «Орлёнок» тиксi Россия лагерьiнде ирткен. Анда Хакасияның олғаннары iкi пастағы орын алғаннар паза 80 азыра аалдағы школа аразында пизінҷi орында пол парғаннар. Ӱгренҷiлер аймах спорт кӧрiмнерiнҷе кӱстерiнең сынасханнар. Олғаннарны марыға Хакасияның саблығ ӱгретчiзi Георгий Прокопьевич Миягашев тимнеен.
Таныхтирға кирек, Ибiгдегi олғаннар пу марығда аралазарға iкiнҷiзiн пар килгеннер. Пылтыр даа олар сыйыхтығ орыннарда пол парғаннар.
– Ирткен чылнаң тиңнестiрзе, пӱӱл пiс позыбысты улам чахсы кӧзiт пиргебiс тiп санапчам. Пiс пiлгебiс, хайдағ анда марығлар иртер, аннаңар азынада тимненгебiс, – кӧңнiнең ӱлесче марығ араласчызы Мила Казакова.
Мындағ кӱстенҷiк олғаннарны таныхтабызар ӱчӱн чыл тоозылчатса правительство сыбыҷаа иртiрiлче. Пӱӱл анда 600 пала пол парыбысхан. Оларға «Снежная королева» ойын кӧзiдiлген паза улуғ нимес интермедия иртiрiлген. Анда олғаннар сыбы ибiре хороводнаң чӧргеннер. Соох апсахха кибелiстер хығырғаннар паза тадылығ сыйыхтар алғаннар.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
