«Чыл салтарлары Владимир Путиннең хада»: Хакасия устағҷыларының сағыс-кӧріcтері
20.12.2024
Хабарлар

Президенттең кӧні палғалыс тӧрт час артиинаң парған (4 час 25 минута), Владимир Путин 76 сурыға нандырарға маңнанған. Хакас Республиканың устағ-пастаа ідӧк эфирні кӧрген паза ол чоохтазығның салтарлары хоостыра сағыс-кӧріcтерінең ӱлескен.
Хакасия пазы Валентин Коновалов кӧні палғалыс хоостыра мындағ сағыс-кӧрізін искірген:
– Хакасия правительствозы президентке пістін республикадаң кірген сурығларҷа паза сидіксіністерҷе прай кирек тоғысты апарар. Нинҷе-де сурығ хоостыра піс кӧні палғалыс алнындох тоғыныбысхабыс, пасха айланыстарҷа тоғыс апарып пастапчабыс.
Хакасияның Ӧӧркі Чӧп кнезі Сергей Сокол президенттің чооғына тиксі паалағны таныхтаан:
– Президент кӧні эфирде хазна чуртағҷыларынаң хада 4 час артиинаң чоохтасча: фронтта кирек хайди парчатханынаңар, Россия суверенитедінеңер, социальнай сурығлардаңар, хазых хайраллирдаңар, СВО чааҷыларына паза оларның сӧбірелеріне хабазардаңар паза кӧп пасха сурығлардаңар. Ол хазна устағҷызының кізілернең чоох алысханы ла нимес, ол кӧстег – хайдағ чолҷа мыннаң мындар парар піcтің хазна! Президент искірген ӧӧн пӧгіннерні тоғысха алчабыс.
Федерация Чӧбінің Хакасиядаң сығара сенаторы Александр Жуков президенттің хазна суверенитедінеңер нандырии хоостыра сағыс-кӧрізін читірген:
– ВВС хабарҷызына уғаа чахсы нандырығ пирілген тіп санапчам, ол Владимир Владимировичтең Россияны хайраллап алғазар ба тіп сурған.
Владимир Путин британскай телерадиокомпанияның журнализінің суриина піди нандыр пирген:
– Мин санапчам, хазнаны олаңай да хайраллап албаам, піс тӱбі чох чирзер тӱс парар хырығнаң хыя парып алғабыс. Россияда мының алнында полған прай ниме суверенитетті саңай чідір саларына апар турған. Мин, тізең, Россия пос оңдайлығ, суверенитеттіг кӱcтіг хазна поларына, хайзы пос чарадығларын ал турар, прай ниме ит салғам!
Регионның ӧӧн городының пазы Алексей Лемин сӧбіре ипотеказын суриина алынҷа хайығ салған:
– Владимир Владимирович кӧні палғылыс тузында демография суриинҷа чоох тударын узарадып сӧбіре ипотеказына хазна саринаң лимиттер чох поларға кирек тіп искірген. Сӧбірее пос туразы – ол палаларны ӧрініcте ӧcкірҷен, палаларның чайаачызына читкіҷе орын пирҷең, оларның хылиин тӧстеҷең оңдай. Че олох туста пілдістіг, квартира алай тура алары кӧп ахча кирексіпче. Россия демография ӧзізін кирексіпчеткенде, льготалығ ипотеканы алары ниик поларға кирек. Банктар Россия президентінің кӧстеглерін ис саларларына киртінчем.
Сом kremlin.ru сайттаң
Автор :
Хакасияның регионнаң устирынҷа кіні
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде