«Саяны» 10-ҷы орынға сығып алды
20.12.2024
Хабарлар

Хоккеисттер прай кӧңнілерін салып ойнааннар
Спорт. Пістіңнер «Волга» ӧменең турыстыра ойнабысханнар
Меспектіг хоккейге хынчатхан улусха 17 улуғ хырлас чӱрексіністіг кӱн полған. «Саяны» команданың наа ӧӧн тренер. Алында хоккей ӧмезі ӱс хати изере утыр саларға маңнанған. Евгений Баженов спортсменнернең пілізіп алар ни? Алай тиктең Евгений Ерахтинні тоғызынаң сығарыбысханнар ба? Мындағ сағыстарнаң кізілер стадионзар чыылысханнар.
17 улуғ хырласта «Саяны» пос чазызында «Волга» (Ульяновск) команданаң тоғасхан. Ікі хоккей ӧмезінің кӱзі тиң. Че «ыырҷы» 12 сан тоғынып алған, пістіңнер – алты ла. «Саяныға» оой полбас. Хоккеисттерібіс ойынны хомай нимес пастабысханнар. Хада-пірге тудынчалар, гол сабызарға кӱстенчелер. Итсе, санны аалҷылар асханнар. 7-ҷі минутада «Саяныға» меспекті Никита Терёхин кире сабысхан. Нинҷе-де тус пазынаң нандырығ «учух килген». Голны позының адына Руслан Гавричков пас салды. Пос кізілері чахсы ойнапчатса, ойынны кӧрерге хай-хай хынығ. Пір ле ниме хомзындырча: оолларыбыс меспекті «Волганың» хаалхазынзар читіріп алчалар, че кире саап полбинчалар. Николай Иванов аннаң чараспаан (29-ҷы минута). Сан – 2:1. «Саяны» алнында.
Трибунада кӱӱлес, cуулас, ӧрініс. Меспектіг хоккей чонны піріктірче. Стадионда «Волганың» ӱчӱн пір ле кізі «ағырған». Ол Ағбанзар Ульяновсктаң учух килтір. Чалғыс таа кӧрігҷі командаа хабас пирер оңдайлығ. 41-ҷі минутада аалҷылар, аның «Волга!», «Волга!» хысхырыстарына ӱндезіп, санны тиңнестірібіскеннер. Ікінҷі таймда хоккеисттер ойынны наанаң пастирлар.
Тоғазығның ікінҷі чардығы таңнатхан. Тайм пасталарға маңнанмаан, сан – 3:2, 49-ҷы минутада – 3:3. Тӱрчедең «Саяны» пазох «Волганың» хаалхазынзар меспекті кире сабысты. «Ыырҷы» нандыр пирген. 54-ҷі минутада сан 4:4 пол парған. Ӱзінҷі голның авторы – Денис Соловьёв, тӧртінҷізінің – Чингис Хандамаев. Андағ матчты «валидоллығ» тiп адапчалар. Тренерлернің чӱрее сыдазар ни?
«Саяныға» чиңіс кирек. Анзын прайзы пілінче. Кӧрігҷілер уламох суулас сыхтылар. Гол! Андрей Осипенков меспекті кире сабысты (56-ҷы минута). Пазох гол! Таблода сан – 6:4. Сергей Дёминні махтирға кирек (69-ҷы минута). Аалҷылар пос салынминчалар. Олар, «Саяны» чіли, пу чемпионатта 10-ҷы орынға сығып аларға пӧгінчелер. Никита Терёхин, 73-ҷі минутада пістің хаалхазар меспекті кире сабызып, хоккеисттернің паза кӧрігҷілернің кӧңнін тӱзiрібіскен. «Волганың» хылии пик полтыр. Ойын тоозылғанҷа хоккеисттер санны тиңнестірiбізерге харасханнар. 17 улуғ хырлас «Саянының» кӱні полған. Пістіңнер 6:5 саннаң чиңіп алғаннар.
Командада алызығлар пол парғанда, хабарҷылар ойын соондағы пресс-конференцияа чахсы чыылысханнар. «Волганың» тренері Равиль Сиразетдинов команда илееде алҷаас ит салған тіп таныхтаан паза ӧменің чалғыс кӧрігҷізіне улуғ алғызын читірген. «Саянының» наа ӧӧн тренері Евгений Баженов чӱрексінізін чазырбаан. Евгений Николаевич чоохтаан:
– Суперлигада ойнапчатхан команданаң устиры – нандырығлығ кирек. Мині 14 улуғ хырласта пу должностьха турғыс салғаннар, 17 улуғ хырласта «Волганаң» тоғасчабыс. Тус чоғыл. «Саянынаң» хада пір ле тренировка иртiрібізерге маңнанғабыс. Ағаа хоза Василий Жаукеновнаң Олег Селивёрсткин кинеп парғаннар. Олар командаа Наа чыл соонда ла хозыларлар. Иван Касаткин операция соонда ам даа хазыхтанча. Ол 20 кӱргенде конькилерге турза, чахсы поларҷых. Чииттерні тартарға киліскен. Чиңіс ӱчӱн командаа, кӧрігҷілерге алғызым читірчем.
Баженовтың таниинаң, «Саянының» хоккеисттері табырах майых парчалар. Пастағы таймда чахсы ойназалар, матчтың ікінҷі чардығына оларның кӱстері читпинче. Аннаңар ӧӧн тренер тренировкаларның оңдайларын алыстырар. Меспекті, «ыырҷының» хаалхазынзар читіріп алып, кире саап полбинчатханнаңар чоох парғанох. Хоккеисттер анзын пілінчеттірлер. Амды пу читпесті тӱзедерінеңер сағынарлар. Евгений Николаевич Евгений Ерахтиннең чоох алысчаттыр.
Чооғының халғанҷызында ӧӧн тренер Хакасия чуртағҷыларын «Саянының» теестегі ойынына хығырған. 20 улуғ хырласта 19.00 часта хоккей ӧмезі «Стартнаң» (Нижегородскай область) тоғазар. Команданың 15 сан, ол турнир таблицазында 7-ҷі орында парча. «Саяны» ӧме, 9 сан тоғынып алып, 10-ҷы орынға сығып алды.
Сом Дарья Слабкони
Автор :
Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде