Наа ӧӧн тренер «Саяныны» чиңіске ағылар ни?
18.12.2024
Хабарлар
«Саяны» команда «Уральский трубникке» 2:5 саннаң утыр салған
Спорт. «Саяны» команданың ӧӧн тренеріне Евгений Баженов турғызылған
Спортта кирек удаа сағыбаан оңдайнаң парыбысча. Че пір саңай ӱс команда сезон ортызында ӧӧн тренерлерін алыстырарына пірдеезі тимде полбаан. Тынағ кӱннерiнде тоғыстаң сығардырыбысханнар Евгений Ерахтин («Саяны»), Александр Савченко («Уральский трубник») паза Сергей Горчаков («Сибсельмаш»). Ӧӧн сылтағ – адалған хоккей ӧмелері уйан ойнапчатханы.
Пасха командалардаңар чоохтап полбаспыс, че «Саянының» халғанҷы ӱс матчы кӧрігҷілерні хомзындырған. 30 кічіг хырласта пістіңнер «Водникнең» ойнааннар. Архангельсктегі хоккей ӧмезі – Россия чемпионадының кӱмӱс призеры. Аалҷылар чиңіc тударына пірдеезі ікінҷілебеен. Матч 2:7 саннаң тоозылған. «Водниктің» хаалхазынзар Василий Жаукенов (85-ҷі минута) паза Руслан Гавричков (88-ҷі минута) меспекті кире сабысханнар.
Теестегі ибдегі ойын ирткен 10 улуғ хырласта. Кізілер матап тимненгеннер. Прайзы сағынчатпас па: хоккеисттер тынанып алған соонда пос чазызында «ыырҷаа» – «Ак Барс-Динамо» ӧмее – маң пирбестер. Ағаа хоза, хазандағылар «Саянынаң» тиңни ойнапчалар. Ол кӱн соох турған. Андағ даа полза, кӧрігҷілер чахсы чыылысханнар. «Саяны» пуста ойнапчатса, кізі хайди ибде одырар? Ойын кӧзіткен: трибунадағы чон тиктең ізентір. «Ак Барс-Динамо» пастағы минутада сан асхандох, оолларыбыс пос салыныбысханнар. Итсе, 25-ҷі минутада сан 1:2 пол парған, 30-ҷы минутада – 2:2. Cалтарында «Саяны» 3:6 саннаң утыр салған. Голларның авторлары – Михаил Лисюк, Денис Петров паза Чингис Хандамаев.
13 улуғ хырласта пістіңнер «Уральский трубник» команданаң ойнааннар. Сынны чоохтаза, пастағы тайм – улуғ уйат. Хоккеисттерібіс атакаа парарға хорыхчалар, сайбағларның соонҷа сайбағлар итчелер. Пӧзік устығ Андрей Осипенков хысхаҷах тус аразына хызыл карточка «тоғынып алған». Пу таныға ойын тузында ӱс сайбағ иткен хоккеист турысча. Аны алған спортсменні матчтаң саңайға сығарчалар. «Уральский трубниктің» сайбағлар ідӧк кӧп полған. Хайди полза, пастағы тайм 1:1 cаннаң тоозылған. Тынағ тузында сағыстарынаң ӱлескен Александр Чаптыков. 79 частығ аға «Саянының» ӱчӱн 1980 чылдаң «ағыр» парир. Ол пір ойынны даа иртірбеске кӱстенче. Александр Самуилович теен:
– «Саянының» амғы ӧмезінің кӱзі пір дее чоғыл, таң. Ойынның пастағы чардығында хомай нимес кӧрінчелер, ікінҷі тайм оларға уғаа сидік иртче. Пӱӱн команда пазох утыр салар.
Улуғ частығ кізі орта ухаанҷылап пиртір. Матч 2:5 саннаң тоозылған. Пастағы таймда санны тиңнестірібіскен Егор Егорычев, ікінҷі меспек – Руслан Гавричковтың чидии. Халғанҷы спортсмен 90-ҷы минутада меспекті 12 метрдең кире сабысхан. Таныхтирға кирек, ол кӱн ойын пенальтилерге пай полған. Ағбанда пис хоккеист – «Уральский трубниктең» ӱс кізі, «Саяныдаң» ікі спортсмен – чаза сабысхан. Іди чӱрексінген поларлар чи. Пістің хаалханы Яков Гах прай кӧңнін салып арачылаан. Пасхазы ідӧк турыстыра ойнаан полза, «Саяны» утырбасчых.
Минің кӧрізімнең, команданың ӧӧн кӱзі – кӧрігҷілер. Хакасияда пасха спорт кӧрімнерiнде андағ ниме чоғыл. Кізілер матчтарға ахча тӧлеп чӧрчелер. «Саяны» Суперлигада ойнап сыххандох, трибунада кізі саны пілдірте хозыл парған. Оларның даа ӱчӱн кӱстенерге кирек нимес пе. Пӱӱнгі кӱнде Хакасиядағы ӧме турнир таблицазында 12-ҷі орында парча.
Евгений Ерахтин тоғызынаң сығардырыбысханнаңар тылаас чечіме кӱнде тараан. Позырахта пу хабар сын полча тіп искірген Хакасияның спорт министрі Сергей Кочан. Хайди чон министрнің чарадиин паалапча? Кем-де, хоккеисттерні пыролап, Ерахтиннің алнын алча, пасхазы пылтырох аны тоғыстаң суурыбызарға кирек полған тіп сағынча. Нинҷе кізі – ол син кӧріс. «Саянының» ӧӧн тренеріне Евгений Баженовты турғысханнар. Алында ол «Саяны-2» ӧменең устаан. Евгений Николаевичтің орнына чииттер ӧмезінең Александр Захваткин тоғынар. Тренернің паза команданың алнында олох пӧгін – он иң артых ӧме санына кіріп алары. Кирек килiзер бе? Анзын ойын кӧзідер. Пу неделяда «Саяны» пастағы хурчағның халғанҷы ибдегі матчтарын иртірер. Киҷее команда «Волганаң» тоғасхан, 20 улуғ хырласта «Стартнаң» ойнир. Салтарларны газетада искірербіс.
Cом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде
