Наа чылға турыстығ сыйых
18.12.2024
Хабарлар
Хакас гимназиязының ӱгренҷізі Владислав Ахантьев іҷезі Елена Викторовнанаң хада
Сыйыхтас. Киҷее Хакасияның правительство туразында республиканың иң артых ӱгренҷiлерiне, студенттерiне паза тоғынчатхан чииттерiне Хакасия пазының ахчалығ сыйиин читiргеннер
Хакасия пазы Валентин Коновалов 2024 чылда иң артых полыбысхан чиит улуссар айланған:
– Хакасия пазының ахчалығ сыйиин Наа чылға удур сыйлиры пiстiң чахсы кибiр пол парған. Сiрернiң полғаныңар ла пӱӱл пос кӧстеенде позын турыстығ кӧзiт пирген. Ол ӱгредiгде, спортта, культурада, халых чуртаста паза даа пасхазында. Пӧзiк чидiглерге чит полчатханын, регионның тилiзiне хозым итчеткенiн прайзына киречiлеп пирдiңер. Аның ӱчӱн сiрерге алғызым читiрчем. Iзенчем, алған сыйыхтар сiрернi наа чидiглерге чидерге аннаң андар кӧӧктiрер.
Сыйых алғаннарның санында Н.Ф.Катановтың адынаң хакас национальнай гимназия-интернаттың 8-ҷi класстағы ӱгренҷiзi Владислав Ахантьев полған. Чиит оол национальнай искусство школазынзар чӧрче. Аның устағҷызы Алина Туденева полча. Анда ол iкi программаҷа ӱгренерге маңнанча. Хомыс, фортепиано, акустическай паза электроннай гитаралар, хобырах кӧг тирiглерiнең ойнирға ӱгренче. Iдӧк ол чатханнаң паза ыыхнаң пос алынҷа ойнирға кӱстенче. Позы кӧг, сарыннар паза кибелiстер пасча. Чоннар аразындағы паза тиксi Россия марығларының призёры паза чиңiсчiзi полча.
– Ӱр ниместе пiс Владимир городсар «Содружество» чоннар аразындағы марыға чӧргебiс. Анда Казахстан, Белоруссия паза Россия регионнарының чайаачы олғаннары чыылысханнар. «Тигiр хуры» ансамбльыбыс анда Гран-при утып алған. Мин iдӧк кӧг тириинең алынҷа ойнаам, пастағы орында пол парғам, – ӧрiнiзiн чазырбинча Владислав.
Ӱгренҷi аннаң андар чуртазын музыканаң палғалыстырарға пӧгiнче. Ол пасха региондағы профессиональнай ӱгредiг учреждениезiнзер кiрем тiпче. Хайди чоохтапча оолахтың iҷезi Елена Викторовна, Владиславтың чайаачы оңдайы олған садындох кӧрiн сыххан. Ол хакас кибелiстерiн удаа хығыр турҷаң.
– Паланың чӱрее искусстваа чатчатханда, пiс ағаа хабас ла турғабыс. Кӧг тирiглерiн ал пирчебiс, хайзына ол позы ахча чыып алча. Ибде аның позының улуғ нимес студиязы пар тирге чарир, – чоохтапча оолахтың iҷезi.
Владислав Ахантьев «Культурада паза искусствода пӧзiк чидiглерге читкен» номинацияда диплом алған. Ӱгренҷiлердең пасха, танығлығ кӱнде ХГУ-ның, республика колледж-техникумнарының студенттерi, школаларда тоғынчатхан чиит специалисттер дипломнар алғаннар. Iдӧк юнармеецтер паза «Движение первых» чӧрiмнiң араласчылары кӧп полған.
Валерия Русакова ХГУ-ның филология паза искусстволар институдының пастағы курстағы студентi полча. Школада ӱгренчеткенде, «Движение первых» чӧрiмге хозылған, Хакасиядағы пӧлиинде медиа-кiннең устаан. Аның «Хранители истории» проектi, хазнаҷа тарап парыбызып, амды прай регионнарда иртiрiлче. Iдӧк ӧткiн хыс «Онлайн-экскурсии» проекттiң авторы полча. Ол тӧреен чирiнiң культуразын паза тархынын хайраллирына кӧстеглiг.
Тиксi алза, «Движение первых» олғаннарның паза чииттернiң тиксi Россия чӧрiмi чииттерге кӧп iзiк асча. Олғаннарға анда он азыра кӧстегҷе кӱзiн сынап кӧрерге чарир. Патриотизмнең пасти медиаа теере. Аннаң пасха, республикада оларға аймах мероприятиелер иртiрiлчелер. Пӱӱл аймах кӧстеглiг 300 азыра мероприятие иртiрiлген. Анда 70 муң азыра кiзi араласчы полыбысхан. Чӧрiмде олғаннар ла нимес, iдӧк улуғлар аралазарға хынадырлар. Чӧрiм тӧстел парғанда, хай пiрее муниципалитеттерде кураторлар, ӧткiн олғаннар чох полған полза, амды Хакасияның прай муниципалитеттерiнде чӧрiмнiң пӧлiктерi азыл парған. Ағаа хоза, муниципалитеттер пастары хабазиинаң оларға ӧнетiн орыннар паза оборудование пирiлче, хайзында олар чыылысчалар, аймах сурығлар пӧкчелер. Аннаңар iдӧк пу неделяда Хакасияның правительствозында ирткен координационнай чӧптiң чыылиинда «Движение первых» тиксi Россия чӧрiмiнiң региондағы пӧлиинiң устағҷызы Эдуард Федосов искiрген. Чыылығ Хакасия пазы Валентин Коноваловтың устаанынаң ирткен.
«Движение первых» олғаннарның паза чииттернiң региондағы пӧлиинiң устағҷызы Эдуард Федосов сан пирiс иткен
Хайди чарытхан Эдуард Евгеньевич, Хакасияның олғаннары чӧрiмнiң аймах проекттерiнде ӧткiн араласчалар. Ол «Зарница 2.0», «У костра», «Театр для молодежи», «Школа актива», «Медиапрофориентация» паза даа пасхазы. Пу форум-фестивальлар оол-хыстарға улуғ пiлiс, опыт пирчелер. Иң ӧткiннер федеральнай синде иртчеткен мероприятиелерге ызылчалар. Олар анда даа чiдiрiнминчелер.
«Движение первых» чӧрiмнiң региондағы пӧлиинiң тоғызына чӧрiмнiң федеральнай аппарадының кiзiзi Байса Муканова паалағ пирген.
– Хакасия правительствозының хабазиинаң «Движение первых» чӧрiмнiң региондағы пӧлии 2024 чылға кӧрiл парған тоғысты прай толдырыбысхан. Чӧрiмнiң пӧлiктерi республиканың ыраххы пулуңнарында азылчатханы уғаа махтағлығ. Ағаа хоза, олар ӱгредiг ле нимес, че iдӧк культура паза спорт объекттерiнде азылчатханы чахсы. Пу тоғысты аннаң андар узарадарға чӧп пирчем. Ағаа хоза, муниципалитеттерде чӧрiмнiң координационнай чӧптерiн тӧстирiне хайығ айландырчам. Хайди пiс пiлчебiс, амды республиканың пiр ле муниципалитедiнде андағ чӧп тоғынча, пасха даа город-аймахтарда мындағ чӧптер азылған полза, чахсы поларҷых. Анзы пiске кӧп сурығ пӧгерге оңдай пирер.
Пӱӱл чӧрiмнiң Хакасиядағы пӧлиинiң араласчылары, грант марығларында аралазып, ахча утханнар, анзы чӧрiмнiң кiннерiне материально-техническай базаны чахсыландырарға оңдай пирген. Аннаңар чағдапчатхан чылда пу кӧстегҷе тоғыс апарарға сурынчам. Iдӧк «Зарница 2.0» чаа-патриот мариинда араласчатхан олғаннарның санын алғыдарға чӧп пирчем. Россияның прай регионнарында «Мы – граждане России» тиксi Россия программазы чуртасха кирiлче. Анда пӧзiк чидiглерге читчеткен олғаннарға хазнаның ӧӧн пiчии пайрамни читiрiлче. Пiстiң кӧрiзiбiснең, паспорттар читiрiлчеткен олғаннарның санын хозарға кирек.
Аарлығ Валентин Олегович, «Движение первых» чӧрiмнiң мероприятиелерiне хабасчатхан ӱчӱн алғызыбыс читiрчебiс паза чағдапчатхан чылда олғаннарны федеральнай синде иртчеткен марығларға ызарға хабазарға сурынчабыс, – айланызында таныхтаан Байса Баатровна.
Таныхтирға кирек, пӱӱл Хакасияның 250-ҷе олғаны чӧрiмнiң федеральнай синiндегi мероприятиезiнде аралас килген.
«Движение первых» олғаннарның паза чииттернiң тиксi Россия чӧрiмi хазна президентi Владимир Путиннiң чарадиинаң тӧстелген. Хакасия пазының ахчалығ cыйиина марығ, тiзең, 2004 чылдаң иртiрiлче. Пӱӱл ол 20-ҷi хати иртiрiлдi. Аның ӧӧн пӧгiнi – пӧзiк чидiглерге читчеткен, кӱстенҷiк чииттерге хабазары.
Сомнар Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
