Наа чыл кӧңнін кӧдірчебіс
16.12.2024
Хабарлар
Хысхы тынағ. Наа чылға кӧп тус халбады. Ӱлӱкӱннең палғалыстығ узун тынағ кӱннері сағыпча
Сынында хысхы тус – хайхастығ тус. Ноға?
- Хысхызын улуғларның даа каникуллар пар;
- Хысхызын сӧбіре хада тус иртірче;
- Хысхызын тасхар харҷа пас чӧрерге чапсых, иирде, тізең, чоох-чаахнаң чей ізерге;
- Хысхы – саналығ, конькиліг чылҷаң тус;
- Хысхызын ибіре кӧп ниме аймах-пасха чарых ӧңнернең пызыңнапча…
Пу чоохты узарадарға чарир. Че Хакасияда ниме идерге чарир? Ағбан городтың чуртағҷыларына паза аалҷыларына Наа чыл кӧңнін кӧдірерге Черногорскай парксар парарға чарир. Анда городтың ӧӧн сыбызы турғызылча. Преображенскай паркта «Ангел и свеча» чарыпчатхан консольларны паза чарыпчатхан хар кізіҷектернің скульптураларын кӧріп аларға чарир. Театр ачығында, тізең, чуртағҷыларға килкім Наа чыл шары паза 2025 саннығ арка сағыпча.
Аннаң пасха, чуртағҷыларға ӱлӱкӱн экскурсияларын тимнеп салғаннар: Бородинодағы хуйу (Боград аймаа), Карлов створ – Саяногорск город, Нымырттығ паза Ымай посёлоктар, «Мраморка» экстрим-парк, «Тортуга» тынағ паркы, «Гладенькая», «Нымырттығ хол», «Сюгеш» паза «Приисковай» саналығ чылҷаң комплекстер.
«Туризм паза аалҷыларны удурлиры» нацпроекттің Путешествуем.рф порталында, тізең, тиксі хазнадаң хысхызын тынанҷаң 200 азыра аймах-пасха чорыхтар чыыл парған. Андох, Россиядағы хысхылар чыындызынаң танызып, постың кӧңніне кірчеткен хысхыны таллап аларға чарир. Пу портал «Туризм паза аалҷыларны удурлиры» нацпроект хабазиинаң тиліпче.
Автор :
Тимнеен Наталья Сюптерекова
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
