Татьяна Голикова: «Россия — улуғ паза илбек хазна, піс аның чон санын хайраллирға кирекпіс»
16.12.2024
Хабарлар
Азых чоохтазығ. «Россия» национальнай кінде Татьяна Голикованаң хада азых чоохтазығ ирткен
«Россия» национальнай кінде «Россияның таңдағызынаңар 100 сурығ» азых чоохтазығлар иртче. 13 улуғ хырласта Россия правительствозының кнес орынҷызы Татьяна Голикова аның араласчызы полыбысхан. Ол чон санын хайраллиры, сӧбірелерге хабазары, хазыхты пиктирі паза чуртас синін кӧдірері кӧстеглерҷе национальнай пӧгіннернің 2019 чылдаң пасти 2024 чылға теере чидіглерінің хысха салтарларын иткен, ол тоғыс мыннаң мындар хайди узарадыларын искірген, кӧрігҷілернің сурығларына нандырған.
Аның сӧстерінең, хазнада демография сурии сидік тее полза, пала тӧріпчеткені паза кӧп палалығ сӧбірелер хозылчатханы чахсы алызығларнаң ӧріндірче.
– Пӱӱнгі кӱнде Россияда 30 миллион олған паза 24,5 миллион кӧп палалығ сӧбіре чуртапча. 2016 чылдаң сығара ӱзінҷі паза пазағы палалар тӧріпчеткені ӧсче, 2023 чылда, 2016 чылнаң тиңнестірзе, андағ палаларның тӧреенінҷе пірге коэффициенті 20,4 процентке ӧс парған, ол, тізең, кӧп палалығ сӧбірелер санын хозарына хозым пирген. Халғанҷы пис чыл аразына оларның саны 27 процентке ӧс парған паза 2,5 миллионға чит парир, – искірген Татьяна Голикова.
Вице-премьер Россия президенті чарлаан Сӧбіре чылы салтарлары «Россия» национальнай кінде иділчеткенін танығлығ теен паза кӧп палалығ сӧбірелерге ӧӧн хабазығлар – іҷе капиталы, кӧп палалығларға кӧрілген тӧлеглер паза сӧбіре ипотеказы – хайди чуртасха кирілчеткеннеңер чоохтаан. Аның сӧстерінең, пу паза пасха тоғыс наа национальнай проекттерде узарадылар.
– Сӧбіре чылы – ол олаңай ла сӧс пірігізі нимес. Мин ізенчем, пу чыл тоозылза, ідӧк пу чыл аразына иділген ӱзӱріглер паза хайығлар тоозылбас. Тиктең нимес 2025 чылның 1 кӱргенінең «Сӧбіре» национальнай проектті пастапчабыс. Ол позыдылар ахча синінең иң улуғ полча: алты чылға – 18 триллион салковай, ол пӱӱнгі кӱнде кӧрілген хоостыра, – таныхтаан Татьяна Голикова.
Ол ідӧк таныхтаан, палалығ сӧбірелерге ӧӧн сурығларның пірсі сӧбіредегі нандырығдаң пасха, посты тоғыста табары полча. Аның ӱчӱн килістіре инфраструктураны тӧстирге киректелче. 2019 чылдаң пасти хазнада «Демография» нацпроектче 1,7 муң олған сады пӱдірілген.
Чонға тоғыс тапханы паза экономикаа квалификациялығ кадрларны тимнирі уғаа кирек. Халғанҷы чыллар аразына чонға тоғыс табарынҷа стратегия алыстырылған, чуртағҷыларға паза пірігістерге полызығлар, оларның сағыс-кӧрістерін санға алып, читірілчелер, «Россияда тоғыс» чонға тоғыс тапчаң кіннернің кӧрімі алысча.
– Амды ол тоғыс чохтарға кіннер нимес, тоғыс табарға полызығ кіннері полчалар, оларзар тоғыс пирчеткеннер айланчалар. Амды кадрлар кіннері тоғынҷыны табарға, кадрлар резервін тӧстирге, кадрлар стратегиязын ӱр тусха кӧр саларға полыс пирерлер. Ол полызығ аныпчатханы ӧріндірче. Піс сананчабыс, чыл тоозылғанҷа чонға тоғыс тапчаң полған на ӱзінҷі кінде алызығлар кирілер, 2028 чылға прай кіннерде алызығлар кирілері тоозылар, салтарында ол пу киректің прай араласчыларына тоғыс табарынҷа полызығны читірчеткен амғы тусха килістіре наа кін полар, – чарытхан Россия правительство кнезінің орынҷызы.
Национальнай проекттерде чонға имнег полызиин читіреріне улуғ хайығ салылған. 2019 чылдаң пасти хазнада хазых хайраллаҷаң 6 муң азыра орын тӧстелген. 2021 чылдаң пасти хазна пазы чахиинҷа хазых хайраллирының пастағы чардығын нааҷылаҷаң программа чуртасха киріліп пастаан. Салтарында пу кӧстегҷе хазых хайраллачаң 1,3 муң азыра пӱдіріг алыстырылған паза пӱдірілген, 5,5 муң азыра тура тыхталған.
– Ӧӧні пу алызығларның ікі ӱзінҷізі аалларда паза кічіг городтарда толдырылғаннар, ол, тізең, пастағы полызығ читірчеткен учреждениелер 32 процентке хозыл парған. Пу тоғыс ідӧк «Узах паза ӧткін чуртас» наа национальнай проектте узарадылар. Че ӧӧні: 2024 чылда ла пістің 100 миллион чуртағҷыбыс, ол, тізең, хазнабыс чуртағҷыларының кӧбізі, диспансеризация иртіп алғаны. Анзы кӧбізі ағырығларны иртеезін ілезіне сығарып алғанын, тузында санға алғанын паза имнег полызиин читіргенін киречілепче, – хайығ айландырған студия аалҷызы.
Татьяна Голикова ідӧк таныхтаан, ӧткін узах час программазы, ӱр тус кӧрҷең система паза наа оңдайлығ социальнай хабазығның стационар учреждениелерін тоғындырғаны, хайда чуртас оңдайы сӧбіредегізіне тӧӧй, чуртас узағын чахсы узаратчалар паза чахсыландырчалар. Ікінҷілес чох, чахсы чуртастың ӧӧн сари культура полча, аны тилідерге национальнай проекттернің чуртасха кирілчеткені ідӧк полысча. Ол санда театрларға паза филармонияларға техника-тиріглерін нааҷылааны, олғаннарға искусство школаларын пӱдіргені, библиотекаларны тыхтааны, федеральнай ӱгредіг учреждениелеріне – чайаачы ӱгредігнің специалисттерін тимнепчеткен ӧзені – хабасханы. «Че иң не ӧӧні, ниме ӱчӱн ол иділче: піс кӧп ле поларға кирекпіс, ол, тізең – ӧӧні», – салтарлаан Татьяна Голикова.
«Россия» национальнай кінде иртчеткен «Россияның таңдағызынаңар 100 сурығ» азых чоохтазығлар изерізі 2030 чылға теере хазна тилізінің национальнай пӧгіннеріне чарыдылча. Тоғазығ араласчылары Россияның толдырығлығ ӱлгӱнің федеральнай органнарының кізілері, регион спикерлері, пос киреенең айғасчатханнар, халыхчылар паза аймах кӧстеглерҷе эксперттер полчалар. Сурығларны национальнай кіннің официальнай сайтындағы ӧнетін тӧстелген пӧлікте пирерге чарир.
Сом russia.ru сайттаң
Автор :
Тимнеен Наталья Сюптерекова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
