Турыстығ Кулумаевтер
05.12.2024
Хабарлар
Кулумаевтер сӧбірезі
2024 чыл – Сӧбiре чылы. Таштып аймааның Пыдырах аалындағы ортымах школада Кулумаевтернiң ӱгретчi династиязының тиксi icтенiс стажы – 90 чылға чағын. Пастағҷызы Елизавета Николаевна, хакас тiлi паза литература ӱгретчiзi полып, 35 чыл тоғын салған. Амды пу ӱгредiг организациязында аның килнiлерi паза пархалары чон палазына пiлic пирчелер
Елизавета Николаевна – Хакас Республиканың саблығ ӱгретчiзi, Россияның чон ӱгредиинiң отличнигi, ӱгретчi-методизi. Ол ӱгредiг киреенде чуртас тооза iстен салған. Мыннаңох сығара тынаға парыбысхан. 2007 чылда хакас чонның Улуғлар чӧбiнiң «Чахсы киректер ӱчӱн» орденiнең таныхтатхан. Пу школада тоғынчатхан ӱгретчiлернiң кӧбiзi Елизавета Николаевнаның ӱгренҷiлерi полчалар.
Оолғы Евгений Константинович, iҷезiнiң чолын пазып, iдӧк хакас тiлi паза литература ӱгретчiзiнiң специальнозын алған. Пу аалда пiр чыл тоғынып, полициязар парыбысхан. Амды пу школада аның хонғаны Марина Леонидовна Кулумаева математика паза информатика предметтерiн апарча. 20 чыл iстен салған, пӧзiк чидiглерi, профессионализмi ӱчӱн Хакасияның ӱгредiг паза наука министерствозының Аарластығ пiчиине турысхан.
Елизавета Кулумаеваның iкiнҷi килнi Анастасия Васильевна 1996 чылда пуох школада iстенiс чолын пастаан. Ағаа физкультура уроктарын пиргеннер. Анастасия Васильевна олғаннарны хазых чуртасха кӧнiктiрче. Аның ӱгренҷiлерi, аймах паза республика синiндегi марығларда аралазып, сыбыра сыйыхтығ орыннарға турысчалар. Ӱгретчi позы даа, алынҷа марығларда аралазып, махтаға сыхча.
2012 чылдаң ӱгретчi Пыдырахтағы школанаң устапча. Чалтырама тоғызы ӱчӱн, пӱӱл Хакасияның ӱгредiг паза наука министерствозының Аарластығ пiчиинең паза Хакасия пазының алғыстас пiчиинең таныхтатхан. Ол ӱгредiг киреенде 30-ха чағын чыл iстен парир.
– Кiчiгдең волейболға хынғам. Аннаңар, Пыдырах чирiнзер ирге парыбызып, мында волейболны тилiдiп пастаам. Олғаннарны волейбол ойнирға ӱгреткем. Амғы туста школада олғаннар асхынахтаңар, ӧме чыып аларға сидiк. Пастап хызыҷахтарның на ӧмезi полған, ам олар асхынахтар, кӧбiзi оолахтар, оларнаң айғасчам.
Школада чуртас хайнапча. Оолахтар волейболға, анаң кӱреске парчалар, соонаң футболға. Iдӧк пiстiң баскетбол секциязы пар. Палалар, школазар алты часха килiп, мыннаң орай ла сыхчалар.
Ӱр ниместе «Футбол в школе» проект хоостыра школабысха спорт тирiглерi паза даа пасха ниме-ноо пирiлген, хайзына чиит спортсменнер матап ӧрiнчелер, – поғдархапча ӱгретчi.
Ӱр ниместе пу школазар Анастасия Кулумаеваның хыстары тоғынарға килгеннер. Улии Карина Витальевна Н.Ф.Катановтың адынаң Хакас хазна университедiнiң хакас пӧлиин 2017 чылда тоосхан. Соонаң «Хакас тiлi паза литература, культура» программаҷа магистрнiң дипломын алған.
Iстенiс чолын В.М.Торосовтың адынаң Хакас книга издательствозында пастаан. Карина Витальевна чайаачы кiзi – кибелiстер пасча, тiлбестеглернең кӧп айғасча. Ам ол паланаң одырча. Пыдырахтағы школаның Чыланнығдағы пӧлиинде ӱр нимес тус тоғынча. Анда ол пасталығ класстар ӱгретчiзi полча.
Iдӧк пу пасталығ школада Анастасия Васильевнаның iкiнҷi хызы, Татьяна Витальевна, iстенче. Iкi пиҷе тоғысха Пыдырахтаң Чыланнығзар хада чӧрче.
– Татьяна хызым школазар, институт тоозыбысхандох, тоғынарға килген. Ам пастағы категорияа аттестация иртче. Тоғыс кӧңнiне кiрче, аны тӱзiмнiг апарча. Ол пос тiлi ӱгретчiлерi аразында ирткен марығда араласхан. Республика синiнде cыйыхтығ орында пол парған. Ол ӱгредiгде ӱр нимес ле iстен парир, аннаңар пу хомай нимес салтар тiп сағынчам. Марығда аралазып, опыт алынып алған, арса, соонаң пазох аралазар кӧңнi полар. Школада ол iдӧк хоза ӱгредiгнiң ӱгретчiзi полча. Аймах кружоктар апарча, чииттернең чахсы айғасча, кӧбiзiн «Движение первых» чӧрiмнең. Ирткен чылда Татьяна Витальевнаның ӱгренҷiзi Кирилл Султрековха, аймах марығларда аралазып, баллар чыып, Москвазар пар килер оңдай полған. Чолы, чуртиры, азыранары, экскурсияларға чӧрерi прай тикке, – поғдархапча iҷе.
Пӱӱл, тiзең, Кулумаевтернiң ӱгретчi сӧбiрезi позы «Движение первых» чӧрiмнiң мероприятиезiнде араласты. Сӧбiре чылына удур пу чӧрiм, аймах кӧстеглерде iстенчеткен сӧбiре династияларын чыып, спорт мариин иртiрген. Полған на муниципалитет, сӧбiрелернi таллап, артыхтарын ысхан. Кулумаевтернiң ӱгретчi сӧбiрезi, Таштып аймаанда таллағны ирт парыбызып, республика синiне сыххан. Анда олар 2-ҷi орында пол парғаннар. Ағбандағылар иң артых полыбысханнар.
Кулумаевтер – спортха хынчатхан сӧбiре. Iдӧк олар пасхазын спортха паза хазых чуртасха кӧнiктiрчелер.
– Аал чӧбiне кiрчеткен пiрiгiстер аразында улуғ нимес олимп ойыннарын чыл сай иртiрчебiс. Анда олғаннар, школа, клуб, аал чӧбi тоғынҷылары араласчалар. Пiс волейболҷа, мини-футболҷа, воздушкадаң атарынҷа, дартсча кӱзiбiс сынапчабыс. Палалар аны матап сахтапчалар.
Аннаң пасха, «Движение первых» чӧрiм пiске хайдағ марығ иртiрген, сӧбiрелер аразында андағох марығ иртiр кӧрерге сағыс пар, – пӧгiннерiнең ӱлесче школа устағҷызы.
Анастасия Кулумаеваның Айана хызы 11 класс соонаң юридическай кӧстегҷе ӱгренген. Аны тоозып, ХГУ-да iкiнҷi ӱгредиин алча. Амғы туста академическай отпускта.
Тӧртiнҷi хыс Ангелина 8 класста ӱгрен парча. Сӧбiре аны хада ла тартча. Ол «Движение первых» чӧрiмнiң ӧткiн араласчызы полча. 14 час толдырғанда, Хакасияның правительство туразында Хакасия пазы Валентин Коноваловтың холынаң паспорт алған. Спортха iдӧк хынча.
Кулумаевтернiң сӧбiрезi Пыдырах аалда хада чуртапча. Аннаңар тоғыс соонаң школа сурығларының ӱзӱрiглерi ибде узарадылча. Прайзы пазағы урокка тимненче. Иирде ӱгретчi cӧбiрезi хатап школазар айланча. Анда олар спортнаң айғасчалар.
Сом сӧбiре архивiнең
Автор :
Оксана Котюбеева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
