Чииттерге чол асчатхан турнир
04.12.2024
Хабарлар

Виталий Канзычаков 74 килограммда чиңіс тутхан
Спорт. Кӱресчілер Карамчаковтың турниріне чыылысханнар. Пӱӱл марығ регионнар аразындағы синде ирткен
Олимп ойыннарының хола призёры Сергей Карамчаковтың хумартхызына чарыдылған турнир – Хакасиядағы иң улуғ марығларның пірcі. Кибір хоостыра ол чыл сай чарыс айының ортызында иртірілче. Илееде тус арға-мӧрійде ооллар паза иреннер ле кӱстерінең сынасчаңнар. 2021 чылда оларға абахайлар хозылғаннар. Турнир тиксі Россия синіндегі марығ полча. Анда чиңіс тутхан улус Россияның спорт узы нормативін толдырыбызар оңдайлығ.
Че пӱӱл кирек сағыбаан оңдайнаң парыбысхан. Ӱртӱн айында Карамчаковтың, Боргояковтың паза Чарковтың турнирлері полбас тіп хабар тараан. Ӧӧн cылтағ – марығларны иртірерге бюджетте ахча чоғылы. Аннаңар суум-саам кӧп полған. Хайди полза Хакасияның физическай культура паза спорт министерствозы, орындағы спорт кӱрезінҷе федерация паза олаңай кӱреснең айғасчатхан улус узы-пазына сығып алғаннар. 2-3 кічіг хырласта грек-рим кӱрезінҷе РСФСР-ның cаблығ тренері М.И.Боргояковтың хумартхызына чарыдылған арға-мӧрій ирткен. Чарковтың турнирі ідӧк кӧрілген кӱннерде – 14-15 улуғ хырласта – полар. Карамчаковтың мариина алызығлар кирерге киліскен. Пӱӱл аны 30 кічіг хырласха чылдырғаннар. Ол регионнар аразындағы синде ирткен. 2024 чылда турнирде ооллар паза иреннер устарын кӧзіткеннер. Ағбанда кибіске сыхханнар 5 регионның спортсменнері: Бурятияның, Туваның, Хызылчар крайының, Кемеров облазының паза Хакасияның. Тиксі алза, 90 кізі. Пістің республика ӱчӱн 40 кӱресчі турысхан. Хорадығларның ӧӧн чардығын постарына алғаннар спонсорлар: «Антоневич паза партнёрлар» юридическай бюро, Хызылчар крайының Законодательнай чыылииның депутады Владимир Вахтель паза «ТИГР» ОБ ООО.
Арға-мӧрійні пайрамни азарында араласхан Хакасия пазының орынҷызы Богдан Павленко. Ол, чыылған чонзар айланып, теен:
– Олимп ойыннарының хола призёры Сергей Карамчаковтың хумартхызына чарыдылған турнир – кибірліг марығ. Ол 2000 чыллардаң тархынын апарча. Аны хайди даа иртірербіс. Спортсменнерге чиңіс тударға алғапчам. Кӧрігҷілерні сіліг кӱреснең ӧріндіріңер.
Ідӧк марығласчатхан улусха чылығ сӧстер читіргеннер Хызылчар крайының Законодательнай чыылииның депутады Владимир Вахтель, Хакасияның спорт министрі Сергей Кочан, республиканың спорт федерациязының президенті Геннадий Канзычаков паза чоннар аразындағы класстығ спорт узы Наталья Малышева.
Кізі асхынах полғаннаңар, спортсменнер пір ле кӱн харбасханнар. 15.00 час соонда финаллар пасталғаннар. Кӱресчілердең пӱрӱт оол Аюр Жигжитов хайиимны тартхан. Пӧзік сыннығ чиит кізі – Россияның спорт узы, ол 92 килограмм кӧдірімде харбасчаттыр. Кӱресчі чоохтаан:
– Хакас паза пӱрӱт чоннарның аразында палғалыс хаҷан даа пик полған. Турнирге хығырғаннарында, тренерлер мині паза арғызым Бато Кырмыгеновты ызыбызарға чаратханнар. Ахчанаң полысхан пістің федерация. Ағбанда чылығ удурлааннар. Чуртапчабыс Олимп резерві училищезiнде (техникумында), андох азыранчабыс. Алында мында поларға киліспеен. Хомзынысха, Бато утыр салды. Позым сыйыхтығ орынға сығып алам тіп ізенчем. Бурятияда олаңай кӱрес – ӧӧн спорт кӧрімі. Ол чахсы тиліпче. Амға теере Олимпиадада пір ле кізі медаль утхан. 2008 чылда Базар Базаргуруев ӱзінҷізі полыбысхан. Кӱресчілердең писче кізі Россияның піріктірілген командазына кірче. Евгений Жербаев спорт «чылтызына» саналча. Аны кӧбізі таныпча полар. Ол 70 алай 74 килограмм кӧдірімнерде харбасча.
Аюр Жигжитов медальға тиктең не ізенмеендір. 21 частығ кӱресчі чиңіс тутхан. Сизінгенде, Хакасияда олаңай кӱресче марығларда иң кӧп араласчы 57 килограмм кӧдірімде полча. Кӧзідімге, пылтыр 18 кізі харбасхан. 2024 чылда алызығлар пол партыр. Кибіске 11 ле кізі cыххан. Пу кӧдірімде 20 частығ Александр Кузургашев кӱс сынапча. Чир-суғҷыбыс Асхыс аймаандағы Сафрон аалдаң. Олаңай кӱреснең 6-ҷы класстаң айғас парир. Пастағы тренері – Виссарион Никифорович Кольчиков. Пӱӱл Саша Олимп резерві училищезін (техникумын) тоозыбысхан, Пилтірде істенче. Карамчаковтың турнирінде Кузургашев, прай кӧңнін салып, хола медаль ӱчӱн харбасхан. Ол сағыстарынаң ӱлескен:
– Пу медаль мағаа уғаа аарлығ. Карамчаковтың мариинда пастағызын на сыйыхтығ орынға сыхтым. Хакасия ӱчӱн турызарға хаҷан даа чӱрексіністіг. Ӱс тоғазығ иртiрібіскем. Пастап тува кӱресчізін 10:0 саннаң утып алғам, анаң ікінҷі «ыырҷыма» 0:10 саннаң утыр салғам. Халғанҷызын арғызым Данил Урыбиннең тоғасхам. Амғы марығның араласчыларының ӧӧн чардығы Хакасиядаң. Удур-тӧдір харбазарға киліcче. Пӱӱл мин Тун пайрамда хола призер полыбысхам. Чидииме ідӧк ӧрінчем.
Турнирнің ветеранына Хакасияның спорт кӱрезінің ӧӧн тренері Виталий Канзычаковты санирға чарир. Виталий Леонидович Карамчаковтың мариинда 16 частығда пастағызын на араласхан. Андада чир-суғҷыбыс кӱмӱс медаль холға кирген. Пӱӱл азах меетте спортсменге тува чонның оолғы Сайын Казырыкнаң тоғазарға киліскен. Казырык – чоннар аразындағы класстығ спорт узы, 2018 чылда юниорлар аразында ирткен тилекей чемпионадында чиңіс тутхан. Хакас паза тува спортсменнерінің кӱзі тиң полтыр. Тоғазығ 4:3 саннаң тоозылған. Виталий Леонидович чоохтаан:
– Кӧрігҷілерге алғыс, минің ӱчӱн матап «ағырғаннар». Чонның хабазии полбаан полза, утыр саларҷыхпын, неке. Казырыкнаң пір хати Хызылчарда харбазарға киліскен. Ол мині чиңіп алған. Пӱӱл 74 килограмм кӧдірімде чахсы спортсменнер кӱс сынадылар. Анзы чахсы.
Мин Карамчаковтың турнирін ӧӧн марыға санапчам. Мында чииттерге чол азылча. Пӱӱн 65 килограмм кӧдірімде 17 частығ Володя Боргояков утып алды. Ізестіг спортсмен, прайзының хайиин тартты. Мағаа 28 час, тоғынчам. Харбазарға тоос саларға сағынғам, че Хакасияда пірее кӧдірімде спарринг партнерларнаң сидік. Олар чох спортсмен узын таптап полбинча. Чииттерге спарринг партнер полып, иртен-иир тренировкаларға чӧрчем. Мағаа полысханнар, амды алымны айландырчам. Ізенчем, Карамчаковтың турнирін иртір полбин паза порастанмаспыс.
Салтарлардаңар чоохтаза, Хакасия командазының 16 медаль: 3 алтын, 5 кӱмӱс паза 8 хола. Чиңіс тутханнар Владимир Боргояков, Виталий Канзычаков паза Михаил Болганов. Денис Кужаков, Роман Сагалаков, Дмитрий Штыгашев, Аймир Мамышев, Михаил Кулагашев ікінҷі орынға сыхханнар. Хола медальлар утханнар Валерий Сазанаков, Александр Кузургашев, Тимур Комозаков, Геннадий Штыгашев, Алексей Килижеков, Руслан Майнагашев, Владимир Сагалаков, Егор Черков. Оларны марыға тимнееннер тренерлер Денис Карамчаков, Леонид Чучунов, Виталий Канзычаков, Марат Кичеев, Лилия Каскаракова, Владимир Сагалаков, Анатолий Султреков, Олег Куртияков, Александр Бельтреков.
Сом Валерия Тамбовцевани
Автор :
Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде