Аал хонии тоғынҷылары – аарласта
04.12.2024
Хабарлар
Хакасия пазының орынҷызы Михаил Побызаков, аал хонии министрі Сергей Труфанов паза сыйыхтар алған аал хонии тоғынҷылары
Сыйыхтас. Хакасияның ӱлгӱ туразында аал хониинда кӧп чыл тӱзiмнiг тоғын салған паза пӧзiк чидiглерге читкен тоғынҷыларны сыйыхтааннар
Хакасия пазының орынҷызы Михаил Побызаков тиксi республикадаң чыылған иң чахсы аал хонии тоғынҷыларын алғыстаан:
– Аал iстенҷiлерi хаҷан даа Хакасия экономиказының ӧӧн чӧлее полғаннар. Мин пiлчем, хайдағ оларның тоғызы аар. Аннаңар тоңастығларны ӧскiрчеткеннерге паза мал тутчатханнарға алғызым читiрчем. Олар, сидiк оңдайлар полза даа, тоңастығларны чыырына паза мал азиин пилетирiне прай ниме иткеннер.
Сiрерге хазых алғапчам. Турғысхан пӧгiннерiң толзын. Iстенiс династиялары ӧңнензiн, – таныхтаан Михаил Побызаков.
Аның таниинаң, халғанҷы чылларда республикада аал хониина хабазар оңдайлар алысчалар, наа гранттар пирiлчелер, регион чирлерiнзер инвесторлар кiрчелер. Тузаланылбинчатхан чирлернi, аал хонии чирлерiне айландырып, тузаланысха кирерiнҷе тоғыс ӧткiн апарылча.
Хакасияның аал хонии паза ас-тамах министрi Сергей Труфанов аал хонии тоғынҷыларына тоғыстары паза СВО араласчыларына полысчатхан ӱчӱн алғызын читiрген.
– Улуғ хырлас айында сiрер чыған гуманитарнай полызығны ызарбыс. Сiрерге улуғ алғыс. Пӱӱл аар чыл полған даа полза, мал азиин читкiҷе пилетеп алғазар, – теен Сергей Труфанов.
Хакасия пазының орынҷызы Михаил Побызаков 40 азыра тоғынҷаа аймах сыйыхтар читiрген. Асхыс аалдағы фермер Евгений Кутуковха «Хакас Республиканың саблығ аал хонии тоғынҷызы» ат пирiлген паза Россия Федерациязының аал хонии министерствозының Аарластығ пiчии читiрiлген. Евгений Кутуков чир тамаан ӧскiрерiнең 20 чыл азыра айғас парир. Хысхы туста фермер теплицаларында муксунны сапха ӧскiрче, часхыдаң кӱскее теере – аймах-пасха салаттарны, укропты, петрушканы, морковьты, свекланы паза капустаны.
– Пӱӱл чир тамаа хомай нимес сыххан. Пiр гектар чирдең 60-ҷа тонна морковь хазып алғам. Олох син свекланаң капуста сыххан. Капуста сала чахсы сығар тiп сағынғам. Тоғынҷылар чидiспинчеткеннеңер, капуста тӧзiн плёнканаң чаап салғам, суғлабасха тiп. Ол мульчирование тiп адалча. Чайғы iзiг полғаннаңар, аның чилегезi ирееленген. Ам паза iди итпеспiн. Пiрее пасха нименең чабарбын.
Мин улуғ нимес чирде чир тамаан кӧп ӧскiрерге кӱстенчем. Чылдаң чылға олох ла син чирде тоғынчам. Тоғынҷылар чидiспинче, че минiң улуғ нимес тоғысчы ӧмем пар, – теен Евгений Кутуков.
Фермер ӧскiрiп алған чир тамаан Асхыс, Пилтiр аалларның паза Асхыс станцияның садығ тураларынзар, Ағбандағы опт базаларынзар сатча, iдӧк ӱӱҷiк тамаан Асхыс аймаандағы школаларға паза олған садтарына.
Евгений Кутуковха «Хакас Республика аал хонииның саблығ тоғынҷызы» ат паза Россияның аал хонии министерствозының Аарластығ пiчии пирiлген
Таштып аймаандағы аал хонии устанызының пастығы Сергей Султрековха Хакасия пазының алғыстазы читiрiлген. Ол аал хониинда 1983 чылдаң сығара тоғын парир.
– Мин Хызылчардағы аал хонии институдында кӧстегҷе ӱгренгем. Кӧстегнi Абазадағы совхоз пирген. Институтты тоозыбысханда, совхозсар тоғынарға парғам. Пастап агроном полғам, анаң ӧӧн агроном, директор орынҷызы, устағҷы. 2003 чылдаң сығара Таштып аймааның аал хонии устанызында тоғынчам. Амды чииттернi тоңастығлар ӧскiрерiне ӱгретчем. Минзер чиит фермерлер удаа айланчалар, оларға чӧптер пирчем.
Аал хонии тоғынҷызының тоғызы уғаа аар. Хайдағ кӱн поларынаң кӧп ниме палғалыстығ. Тоғыс чыл ибiре полча, тоозылбинча, – теен Сергей Антонович.
Аал хонии устанызы пастығының чооғынаң, пӱӱнгi кӱнге Таштып аймаанда 25 кресен-фермер хонии саналча, ол санда читi хоных малларын азырирына тоңастығлар ӧcкiрче. Кресен-фермер хоныхтарының кӧбiзi мал ӧскiрерiнең айғасча, пiр ле хоныхта хойлар тутчалар. Пӱӱл аймахта пiр кресен-фермер хонии тӧстелген. Таштып аймаанда iдӧк «Нива» ООО тоғынча. Ол тоңастығларны ӧскiрче паза саалчатхан iнектер тутча. Предприятие тоңастығларны малларын азырирына паза садыға ӧскiрiп алча.
Хакасия пазының алғыстазын iдӧк алғаннар: фермерлер Константин Чочиев, Александр Тербижеков, Николай Чертыков, «Светлый» аал хонии потребительлер кооперативiнiң водительi Михаил Наумук.
«Алтай» ООО-ның зоотехнигi Татьяна Куригешеваа «Россияның аал хонии комплексiнiң аарластығ тоғынҷызы» ат пирiлген.
Хакас Республиканың Аарластығ пiчиине алты кiзi турысхан: фермер Зинаида Казагашева, «Алтай» ООО-ның iнек сағҷаңы Наталья Филатова, пызолар ӧскiрҷең тоғынҷы Ольга Глушкова, «Аршановское» ООО-ның тракторизi Виктор Покровкин, фермер Владимир Александренко, «Ширинский элеватор» ООО-ның бухгалтерi Елена Бугаева.
Аал хонииның читi тоғынҷызына Россия Федерациязының аал хонии министерствозының алғыстазы читiрiлген.
2024 чылда аал хонии промышленнозының республикадағы iстенiс мариинда чиңiс тутхан тоғынҷыларға 100-ер муң салковай сыйыхха читiрiлген. Оларның санында: «Бейское» ООО-ның механизаторы Алексей Александренко, «Целинное» ООО-ның механизаторы Павел Ребонен, «Вива-Лаб» ООО-ның чабаны Сергей Мардаев, «Алтай» ООО-ның пызолар ӧскiрҷең тоғынҷызы Ольга Глушкова, «Аршановское» ООО-ның механизаторлары Александр Савенков паза Александр Сметанин, «Рассвет Абакан» ООО-ның водительi Дмитрий Тарханов.
«Целинное» ООО-ның ӧӧн агрономы Юрий Ребриковха тӱзiмнiг тоғызы ӱчӱн Хакасияның аал хонии паза ас-тамах министерствозының Аарластығ пiчии паза ахчалығ сыйых пирiлген.
Сомнар Илона Каковани
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
