Чарытхаа наа синнер
04.12.2024
Хабарлар
Хакасияның тарифтерні хайығда тутчаң хазна комитедінің кнезі Наталья Михайленко чоох тутча
Брифинг. Хакасияның тарифтерні хайығда тутчаң хазна комитеді орындағы СМИ-ларға чарытхы паазына чарыдылған тоғазығ иртірген
Ӱр ниместе Хакасия пазы Валентин Коноваловтың чахии хоостыра тарифтерні хайығда тутчаң хазна комитедінің кнезі Наталья Михайленко Россияның монополиядаң тоғыр федеральнай службазының устағ-пастаанаң тоғазығ иртірген. Анда Наталья Евгеньевна Россия регионнарына турғызылған синнер пістің республика чуртағҷыларына килiспинчеткенінеңер чоох апарған. ФАС пістің чир-суғҷыларыбыстың алнын алған. Амды аны хоостыра федеральнай кін чылығ пирҷең туста чарытхының «льготалығ» пастағы синін пір айда 7020 кВт/ч теере кӧдірібіскен, ікінҷі синін – пір айда 10800 кВт/ч теере. Андағ кӧзідімніг синнер Хакасияа паза Иркутск облазына ла турғызылған.
Пу алызығлар 2025 чылның кӱрген айының 1-ғы кӱнінең пасти 2025 чылның хосхар айына теере тоғынар. Чылығ пирҷең тус тоозыл парза, тиксі Россияда алылған кӧзідіглерҷе чарытхы ӱчӱн тӧлирге киректелер. Ол пастағы син пір айда 3900 кВт/ч, ікінҷі син айда 6000 кВт/ч полча.
Россия правительствозының чарадии хоостыра хай пірее регионнарда чуртағҷылар хысхы айларында чарытхынаң матап тузаланчалар, ол орыннарда адалған синнерге хоза кӧдірчеткен коэффициент турғызылған. Чылығ пирҷең туста аның сині 1,8 тиңнелген. Андағ оңдайнаң пістің республикада паза Иркутск облазында пір айда чарытхынаң тузаланар син ӧскіріл парған.
– Тиксі пу алызығлар хоостыра региондағы тарифтерні турғысчатхан органнар улуғ хырлас айының пастағы кӱніне теере прай кирек пічіктерні алыбызарға киректер. Пу наа синнер пістің чуртағҷыларыбыс сынында пір айда нинҷе чарытхы хоратчатхан кӧзідімнердең алылғаннар. Россияның монополиядаң тоғыр федеральнай службазы ол саннарны кӧзіт пирерге сурынған. Пістің, тізең, андағ саннар тимде полғаннар, – теен Наталья Михайленко.
Сом Илона Каковани
Автор :
Ольга Томочакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
