Чиңіс пісти
29.11.2024
Хабарлар
Трибунадағы чон, прай кӧңнін салып, «Саянының» ӱчӱн «ағырған»
Спорт. «Саяны» команда «Мурман» хоккей ӧмезінең тоғасхан
Хакасияда пір танығ пар. «Саяны» стадионға толдыра кӱӱлес, суулас турчатса, пістің команда пуста ойнапча. Пу средада кӧрігҷілер пір секунда даа сым турбааннар. Хоккеисттерібіске хабазығ кирек. Олар Россия чемпионадында ойнапчалар.
27 кічіг хырласта «Саяны» команда пастағы ибдегі ойынын иртірген. Кибір хоостыра аны пайрамни асханнар. Аарлығ аалҷылар санында полғаннар Ӧӧркі Чӧп кнезі Сергей Сокол, Хакасия пазының орынҷызы Богдан Павленко паза республиканың меспектіг хоккейҷе федерациязының президенті Юрий Шпигальских. Сергей Михайлович, чыылған чонзар айланып, теен:
– «Саяны» Хакасияның поғдархазы, спорт тании полча. Пазағы чылда ол 45 чылын таныхтир. Командаа чиңіс алғапчабыс. Хоккеисттер кӧрігҷілерні cіліг ойыннаң ӧріндірзіннер.
Хакасия пазының адынаң чылығ сӧстер читірген Богдан Павленко. Хайди таныхтаан Богдан Сергеевич, Сибирьде меспектіг хоккей иң хынчатхан спорт кӧрімі полча. Ол кибірліг ойын. Кізілернің чӱреенде ағаа хыныс хаҷан даа успас. Че сынап ізіг айа сабызынаң кізілер Юрий Шпигальскихті удурлааннар. Ол чоохтаан:
– Прайзын сезон пасталчатханынаң алғыстапчам. «Саяны» – кӱcтіг ӧме. Кӧрігҷілер команда ӱчӱн прай кӧңнілерін салып «ағырчалар». Аннаңар «Саяны» полған, «Саяны» пар, «Саяны» хаҷан даа полар!
Пу сӧстерні ис салып, трибунадағы чон уламох суулап сыххан. Кем-де барабан саапча, ікінҷізі сығырча, ӱзінҷізі хысхырча. Анзы «Саяныға» турыстыра ойнирға полызар ни? Пӱӱн «Мурманнаң» тоғасчабыс. Мурмансктағы ӧмеде алызығлар пол партыр. Команданың 90 проценті – чиит ойынҷылар. Хоккеисттернің кӧбізі Россия чемпионадында пастағызын на араласча. Іди дее полза, ӧмедегілер чахсы арачыланчалар. 9 кічіг хырласта саблығ «Водник» «Мурманнаң» Архангельскте ойнаанда, пастағы таймда аның хаалхазынзар пір меспек тее кире саап полбиндыр. «Водникке» ойынның ікінҷі чардығында ла оң полтыр. Матчты олар 3:0 саннаң утып алғаннар.
Итсе, хоккеисттерібіске анзынаңар сағынарға маң чоғыл. Ойнирға кирек. 7-ҷі минутада «Саяны» команда санны асча. Ол Руслан Гавричковтың чидии. Пістіңнер «Мурманны» чабыра пасчалар. Тӱрчедең пазох гол! Аның авторы Матвей Воробьёв. «Ағырчатхан» улустың ӧрінізі пу чир нимес. Пастағы тайм 4:0 саннаң тоозылғанда, трибунадағы хысхырыстарға кізілер постарын даа испинчеткеннер.
Ойынның ікінҷі чардығы «Саяныға» сидік арах ирткен тирге чарир. «Мурман» тынағ соонда кӱс алынып алған, таң, алай «пыс парған» ма. Аалҷылар пуста хай-хай ӧткін хайын сыхханнар. «Саянының» ӧӧн тренері Евгений Ерахтин дее чӱрексіпчеткенге тӧӧй пілдірген. Ол оолларыбыс пос салыныбызарлар тіп чочынған, неке. Евгений Владимирович тиктең сағыссыраан. «Саяны», хыниина кіріп, «ыырҷының» хаалхазынзар хоза ӱс меспек кире сабысхан. «Мурман» пір хати нандыр пирген. Сан – 7:1, чиңіс пісти. Хоккеисттердең Руслан Гавричковты махтирға кирек. Ол позының адына ӱс гол пас салған. Ідӧк устарынаң ӧріндіргеннер Егор Егорычев, Михаил Лисюк паза Сергей Дёмин.
Ойын соонда пресс-конференция ирткен. Хабарҷыларның сурығларына нандырғаннар командаларның ӧӧн тренерлері. Хайди таныхтаан Николай Ярович, «Мурманның» амғы ӧмезі Суперлигада ойнирға ӱгренче. 2024/2025 чылларның сезонында оларға хатығ чуғар тіп ікінҷілес чоғыл.
Евгений Ерахтиннің чооғынаң, «Саяны» командаа пастағы ойын уғаа сидік ирттір. Андада чир-суғҷыларыбыс «Байкал-Энергиянаң» тоғасханнар. Чемпионат алнында хоккеисттер соон сӱрістіре кискек ағыриин хаптырып алғаннар. Пірcі хазыхтанып алза, ікінҷізі ағырыбысча. Амды киректер хомай нимес. Анзын ойыннар хоостыра даа сизінерге чарир. Евгений Владимирович «ағырчатхан» улусха улуғ алғызын читірген. Ӧӧн тренер теен:
– Пістің кӧрігҷілер – «Саяны» команданың он ікінҷі ойынҷызы. Пӱӱнгі чиңісте оларның хозымы улуғ. 30 кічіг хырласта «Водник» ӧменең ойнирбыс. Прайзын хығырчабыс.
Сом Дарья Вологжанинани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
