Чӱгӱрікчілер марығласчалар
27.11.2024
Хабарлар
Россияның саналығ чарысча федерациязының президенті Елена Вяльбе паза Хакасияның спорт министрі Сергей Кочан 15 километрде сыйыхтығ орынға сыхханнарнаң хада
Саналығ чарыс. Тӧӧ пазында саналығ чарысча Россия кубогының I чардығы ирткен
Россияның кубогы 8 чардыхтаң пӱткен. Кибір хоостыра пастағы марығларны Хакасия удурлапча. Тӧӧ пазында чарыс айындох хар тӱс парча нооза. Ағаа хоза, пістің республикада саналығ чӱгӱріске истіг оңдайлар тӧстелген. Итсе, пӱӱл, чылығлар турып, стадионда хар читпин партыр. Аны тағлардаң тӱзірерге киліскен.
Спортсменнер пастағы пас меетке 23 кічіг хырласта сыхханнар. Ипчілер классика оңдайынаң 10 километр чӱгӱргеннер, ир кізілер – 15 километр. Хазыр харбазығда абахайлар аразында Лидия Горбунова чиңіс тутхан, ікінҷі орынға сыххан Екатерина Смирнова. Катя алында, Хакасия кубогында спринт чӱгӱріп, алтын медаль холға кирген. Ӱзінҷізі полыбысхан Арина Каличева. Ир кізілердең оң полған Савелий Коростелёвха. Евгений Семяшкиннің кӱмӱс медаль, Иван Горбуновтың хола. Чоохтирға кирек, Иван паза Лидия Горбуновтар – ирепчі. Россия марығларында олар Татарстан ӱчӱн турысчалар.
25 кічіг хырласта спринт ирткен. Ир кізілердең дистанцияны прайзынаң пурун тобырған Денис Филимонов, Егор Митрошин – кӱмӱc призер. Азах меетке ӱзінҷізі читкен Савелий Коростелёв. Хыстардаң чиңіс тутхан Анастасия Фалеева, ікінҷі орынға сыххан Анна Королева (Беларусь), ӱзінҷі орынға – Алёна Баранова.
Пу марығларда прайзының хайиин тартча Александр Большунов. «Саналар ханы» соон сӱрістіре ӱзінҷі чарысты утырча. Саблығ спортсмен, 19 кічіг хырласта Хакасияның кубогында 15 километрні классика оңдайынаң тобырып, пизінҷі ле орынға сыххан. Россия кубогында 15 километр чӱгӱргенде, Большунов читінҷі орыннаң пӧзік кӧдіріл полбаан, спринтте, тізең, чарым финалға ирт полбаан. Ӱс хати олимп чемпионы ағырыбыстыр. Хазыхтанып алза, трассада пазох прайзын чабыра пазар тіп ікінҷілес чоғыл.
Сом Россияның саналығ чарысча федерациязыни
Автор :
Тимнеен Майя Кильчичакова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
