Нымахтағы осхас тынанҷаң орын
22.11.2024
Хабарлар
«Нымахта ааллааны» площадкадағы Хуу хаттың хыринда артисттер ойын кӧзiтчелер
Ааллар ӧңненiзi. Алтай аймааның Хубачар аалындағы «Белоярский» паркта «Нымахта ааллааны» олған площадказы пайрамни азылған
«Белоярский» парк ӱр нимес тус аразына ла иптел парған. Амды ол чуртағҷыларның иң хынған тынанҷаң орны полча. Ӱр ниместе ле анда скейт паза воркаут-площадкалары азылғаннар. Пу кӱннерде, тiзең, паркта «Нымахта ааллааны» чапсых площадка пайрамни азылған. Ол Хакасияның национальнай паза территориальнай политика министерствозының пастағлар проекттерiнiң марии хоостыра пӱдiрiлген.
Хакасияның национальнай паза территориальнай политика министрi Лев Сафьянов Хубачар аал чуртағҷыларын паза аалҷыларын площадка азылғанынаң алғыстаан:
– Хакасия пазы, правительство кнезi Валентин Олегович Коноваловтың адынаң, пiстiң министерство адынаң «Нымахта ааллааны» чапсых паза хынығ площадка азылғанынаң алғыстапчам. Пiс кiчiг тузыбыстабыс тирге чарир.
Пӱӱл пастағлар проекттерiнiң мариин пастағызын на иртiргебiс. Пу пiстiң пастағы опыдыбыс. Марыға тиксi 70 миллион азыра салковайға 50 сурыныс пiчии кiрген. Марығ пастағызын на иртiрiлчеткеннеңер, ағаа 20 ле миллион салковай позыдылған. Килер чылда пастағлар проекттерiнiң мариин хатап иртiрербiс.
Площадка олғаннарны ӱгредерiнде туза ағылзын. Чуртағҷыларға хазых, ӧңненiс паза Хубачар аалда проекттер чуртасха кирерiне наа сағыстар алғапчам!
Хубачар аал чӧбiнiң кнезi Александр Мин Те Хоның чооғынаң, проект пiр чыл аразына чуртасха кирiл парарға кирек полған, че пӱдiрiг тоғыстары чарым чылға толдырыл парғаннар. Алтай аймааның паза Хубачар аалның устағ-пастаа, идiнҷектер паза ӧткiн чуртағҷылар пу кирекнең айғасханнар.
– Пастағызын на проектте пу син кӧп кiзi араласты. Анзы марығның оңдайлары – чуртағҷылар пастағда аралазарға киректер.
Ноға пiс площадканы иирде пайрамни азарға сағыныбысхабыс? Прайзы пу гирляндалар чариин кӧрзiн тiп. Пеер килген кiзiлер хайхастығ площадка кӧрiп аларлар, анаң туған-чағыннарына чапсых орыннаңар чоохтап пирерлер, – таныхтаан Александр Мин Те Хо.
Проектте араласхан ӧткiн кiзiлерге Хубачар аал чӧбiнiң алғыстастары читiрiлген. Оларның санында полғаннар: проект пастағҷызы, идiнҷек Ольга Петрова, тилiтчең площадка проектiнiң партнёры «Кирпичный завод «Хакасский элемент» ООО-ның директоры Владимир Ткаченко, Хакасияҷа УФСИН-ның пастығы Виталий Кривовяз, идiнҷек Ксения Капустина, «Аршановское» ООО-ның директоры Михаил Фролов, «Бастион» ООО-ның директоры Максим Девятаев, ӧткiн чуртағҷылар Семён Варшавский, Михаил Рустамов, Наталья Рустамова, Артём Новопашин.
Лев Сафьяновтың таниинаң, марыға кiрген 56 проект аразында иң чахсы 14 проект утып алған. Олар спорт паза олған площадкаларын пӱдiрерiне, хумартхы тастарны нааҷылирына чарыдылғаннар. Чуртасха кирiлген пастағы проект – Асхыс аалдағы тенниснай корт, iкiнҷiзi – Хубачардағы тилiтчең площадка, ӱзiнҷiзi – Орджоникидзе аймааның Хуйулығ хайа аалындағы нааҷылал парған хумартхы тас.
«Белоярский» парктағы тилiтчең площадка пӱдiриине 2 миллион азыра салковай хорадылған, 2 миллион салковайны Хакасияның национальнай паза территориальнай министерствозы пирер. Хорадығларның 10 процентiн пастағҷы чуртағҷылар хосханнар.
«Нымахта ааллааны» площадкада уғаа кӧп чапсых скульптура пар: одырчыхта одырчатхан хыс, Пётр Ершовтың нымағындағы Горбунок адыҷах, Иван Крыловтың «Квартет» баснязынаң мартышка, ӧскi, осёл паза аба. Олар прайзы тимiр трубалардаң тимнелгеннер. Тимiрдең иткен, че гирляндаларнаң ораалған рояль площадканың ӧӧн чазанҷығы полча.
Площадкада iдӧк орыс нымахтардағы Хуу хаттың скульптуразы паза аның ибiҷегi пар. Артисттер Хуу хаттың хыринда олғаннарға ӱтертiстiг ойын апарғаннар.
Сом Илона Каковани
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
