«Саяны» команданың пастағы чиңізі
22.11.2024
Хабарлар
«Сибсельмашнаң» ойын хазыр парған
Спорт. 20 кічіг хырласта «Саяны» команда «Родина» ӧменең ойнаан
Меспектіг хоккейде кічіг хырлас айы – пастағы ойыннарның тузы. Пӱӱнгі кӱнге «Саяны» команда тӧрт тоғазығ иртiрібізерге маңнанған. 6 кічіг хырласта хоккеисттерібіс «Байкал-Энергия» клубха 1:12 саннаң утыр салғаннар. «СКА-Нефтяник» ӧме ідӧк «Саянының» хаалхазынзар 12 меспек кире сабысхан. Че пістіңнернің «ыырҷаа» нандыр пирер кӱзі читтір. Ойын 3:12 саннаң тоозылған.
Кӧрігҷілер «Сибсельмашнаң» матчты чидікпин сағааннар. Ағбандағылар паза новосибирсктегілер тиңни ойнапчалар нооза. Анзын Россия кубогының даа салтарлары киречілепче. Кемеровта ікі команда хайым (ничья) ойнабысхан, сан 3:3 полған. 17 кічіг хырласта тоғазығ Новосибирскте ирткен. Санны 22-ҷі минутада асханнар ээлер. Пастағы тайм тоозылғанҷа «Сибсельмаштың» хаалхазынзар меспек учух килген. Ол «Саянының» нандырии. Сан – 1:1, кирек сағыбаан оңдайнаң парыбызарға тӧӧй. «Ағырчатхан» улустың кӧңні cах андох кӧдірілчетпес пе. Матчтың ікінҷі чардығы сынап хазыр ирткен. Чиңіс прайзына кирек. 65-ҷі минутада «Сибсельмаш» позының адына хоза пір сан пас салған. «Саяны» чідірінмеен. 82-ҷі минутада Руслан Гавричков Виталий Шнайдернің полызиинаң «Сибсельмаштың» хаалхазынзар меспекті кире сабысты. Сан – 2:2, ағбандағыларның – ӧрініс. Итсе, ол ӱр полбаан. Хоккеисттерібіс 2:4 саннаң утыр салғаннар. Хайди таныхтаан команданың ӧӧн тренері Евгений Ерахтин, санны тиңнестірібіскенде, «Саяны» пос салыныбысхан.
20 кічіг хырласта чир-суғҷыларыбыс Кировта пуссар сыхханнар. Хоккеисттерібісті «Родина» команда удурлаан. Матч пасталғанда, ол туста Хакасияда 22.30 час полған. Пылтыр «Саяны» пастағы чорығынаң пір чиңістiг айланған. Амды командаа оң полар ба?
Пастағы таймда оолларыбысха хатығ чуххан. Кировтағылар, прай кӱстерін cалып, пістіңнерні чабыра пасханнар. 19-ҷы минутада «Родинаа» 12 метрдең меспекті кире сабызарға оңдай пирілген. Рамиль Ибрагимов чаза сабысты! Че тӱрчедең сан 0:1 пол парған. 36-ҷы минутада «Саянының» хаалхазынзар пазох меспек учухча. Сан – 0:2. Ағбандағылар, «Сибсельмашнаң» ойынны сағысха киріп, таң, пос салынминчалар. Тайм тоозылчатханда, Руслан Гавричков нандыр пирген. Сан – 1:2. Чӱректе ізеніс пар.
Тынағ тузында Евгений Ерахтин хайдағ сӧстер таап алған ни, пілбес, че тоғазығның ікінҷі чардығында «Саяны» пик хылиин кӧзіткен. 49-ҷы минутада Василий Жаукенов санны тиңнестірібіскен. Анзы читкiҷе нимес. 67-ҷі минутада пазох гол! Ол Михаил Лисюктың чидии. Хоккеист хыниина кірібіскен, таң. 87-ҷі минутада Лисюк Сергей Дёминнің полызиинаң «Родинаа» тӧртінҷі меспекті кире сабысхан. Чиңіc пісти!
Таныхтирға кирек, пылтырғы сезонда «Саяны» команда меспектерні ӧӧнінде пулуңнаң сығарып голлар сабысчаң. Халғанҷы матчта, тізең, прай голлар ойын тузында сабылғаннар. Матчтаң матчха команданың узы ӧсче. Аннаңар 19 кічіг хырласта ӱлгӱдегілер «Саяныны» чабызарға пӧгінчелер тіп искіріг тараанда, прайзы алаң асхан. Хоккей ӧмезі Суперлигада ойназын тіп нинҷе кӱс парыбысхан. Прай тоғыс тикке полған ма?
Пу тылаас тиксі Россияа чайыл парған тирге чарир. «ВКонтакте» социальнай палғалыста бендидеңер илееде группа пасча. Пу кӱннерде полған на ӧмеде «Саянының» ӱлӱзінеңер чоохталча. Анзы тиктең нимес. Пӱӱнгі кӱнде Суперлигада 14 ле команда ойнапча. Пӱӱн «Саяныны» чох идiбізерлер, таңда пасхазына теес чидер. Андағ оңдайнаң, меспектіг хоккейнің таңдағызы чоғыл. Ол, тізең, орыс чонның кибірліг спорт кӧрімі.
Чонны Хакасияның спорт министрі Сергей Кочан паза республиканың меспектіг хоккейҷе федерациязының президенті Юрий Шпигальских амыратханнар. Олар «Хакасия» искіріглер агентствозына комментарийлер пиртірлер. Пу сезонны «Саяны» читіре ойнабызар. Ахча 2025 чылның 1 кӧрігіне теере позыдылған. Федерацияның ахча суриин пӧгер нинҷе-де ай пар. Пірігістегілер узы-пазына сығып аларына ізенчелер. Хакасияда «Саяны» паза «Саяны-2» командаларға 100 миллион салковай хорадылчаттыр. Россияның иң кӱстіг хоккей ӧмелерінің бюджеді ӱс хати кӧп.
27 кічіг хырласта Ағбанда «Саянының» пастағы ойыны иртер. Хоккеисттер кӧрігҷілерні хығырчалар. Олар «Мурманнаң» тоғазарлар.
Сом Нина Семашкони
Автор :
Майя Кильчичакова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
