Тархыныбысты ундубин, матырларны чеестирбіс
22.11.2024
Хабарлар
Валентин Коноваловха, Владимир Штыгашевке паза Александр Векшинге кӧзідігде полған дроннарны кӧзітчелер
Форум. Ағбанда С.П.Кадышевтің адынаң чон чайаачызының национальнай кінiнде «Ада чир-суубыстың сын ооллары» ӱс тӧлнің республика форумы ирткен
Форумның тархыны
«Ада чир-суубыстың сын ооллары» ӱс тӧлнің форумының тархыны уғаа пай паза танығлығ полча тізе, пір дее саба полбас. Ирткен 10 чыл аразына ол улуғ площадкаа айлан парған, хайзында алынҷа тӧллер, удур-тӧдір чоох алызып, постарының опыдынаң паза пілізінең ӱлесчелер. Анзы чииттернің патриотизмніг сағызын тыыдарына паза хазнаның тархынына аарлас тӧcтиріне хабасча.
2011 чылда Россия чааҷыларының ӱс тӧлiнің пастағы тоғазии ирткен. Ол уғаа танығлығ мероприятие полған, анда кизек чаалазығларның ветераннары паза чиит тӧл чоох алысханнар. Аннаң андар иртірілчеткен мындағ тоғазығларда ветераннар, чаалазығларда полған матыр киректерiн сағысха киріп, хайдағ сидікciністерге урунғанынаң ӱлесчеңнер, полған на кізее паза прай чонға патриотизмнiң тузазы хайди теелчеткенінеңер чоохтаҷаңнар. Чииттерге хайдағ даа сурығлар пирер паза чаадағы хатығ сыныхтағ ирткен кізілердең аарлығ чӧптер истiп алар оңдай пирiлген.
Пістің регионда даа иртірiлчеткен мындағ тоғазығлар кирек паза тузалығ мероприятиее айлан парғаннар. Iди 2014 чылдаң сығара ол позының оңдайын алғытхан, «Ада чир-суубыстың сын ооллары» ӱс тӧлнің республика форумы чіли иртіріл сыххан. Ол мероприятие кӧп араласчы чыып алар оңдай пирче, анда аймах халых пірігістерінің, чииттер чӧрімнерінің кiзілерi араласчалар. 2017 чылда форум Россияның культура министерствозының культура сферазындағы паза патриотизмге ӱгредер иң танығлығ мероприятиелер санына кір парған.
Пӱӱл республика форумы читінҷі хати иртірілді, ол тӧллер аразындағы палғалысты тыыдарына чахсы хабасхан, iдӧк чиит тӧлге пістің хазнаның тархынына аарлас тӧстиріне паза аның матырларын, ундубин, сыбыра чеестиріне чахсы полысхан.
Пленарнай чыылығ
Иртеннең форумға тимненіс парған, килген аалҷыларны удурлир паза оларны санға алар пункттар тоғынғаннар. Iди фойеде СВО араласчыларына хабазар мастер-класстар тоғынғаннар: чӱленҷең сетьтер палғааннар, чааҷыларны хайраллир танығлар, блиндаж свечілерін тимнееннер, чылығ хурлар палғааннар, «Чааҷаа пічік» пасханнар паза даа пасха нимелер тимнееннер. Улуғ зал алнында алынҷа темаларҷа кӧзідіглер иртірілгеннер. Столларда чааҷылар автоматтар, холнаң атчаң паза станоктығ пулеметтар, гранатометтар, дроннар кӧзіткеннер. Илбек Ада чаадағы пічіктер паза сомнар кӧзідіге сығарылғаннар.
Форум пасталар алнында залда патриот сарыннары толдырылған, театрализованнай теелбек турғызылған, «Безымянная высота» сарын толдырылчатханда, прай чон, азах узына турып, аны айа сабызынаң удурлаан. Ӱлӱкӱн апарчатханның чооғынаң, ол тағда Сибирь чааҷылары полтыр, 18 чааҷының ікізі ле хазых халтыр. Пірсінің пархазы Леонид Лапин, сценаа сығып, хысха чоох тутхан. Ол ӱс кизек чаалазығда араластыр. Позының матыр тудынызынаң ол ам чиит тӧлге чахсы кӧзідім полча, алынҷа тӧллерні піріктірче.
Россияның паза Хакасияның гимннері толдырылған соонда сӧс Хакасия пазы Валентин Коноваловха пирілген.
– Пу форум прайзыбысха постарыбыстың сағыстары, кӧстеглері ибіре хада-пірге тудынарға уғаа чахсы оңдай пирче. Олар пістің Чир-суубысты кӱстіг паза пик идерге хабасчалар. Піс, хада-пірге тудынып, алнындағы чуртасты пӱдірербіс, ирткен чыллардағы тархыныбысты ундубаспыс, чоныбыстың пос чуртазы ӱчӱн чуртастарын пир салған матырларны сыбыра чеестирбіс. Сірерге форумда тӱзімніг тоғыс алғапчам, чоохтазығларда ӧткін аралазыңар, сағыстарыңнаң, чӧптеріңнең ӱлезіңер, – теен регион устағҷызы.
Таныхтирға кирек, пу мероприятие Россияның чаа-тархын пірігізінiң паза Хакасияның культура министерствозының хабазиинаң иртiрiлген. Iди форум араласчыларынзар алғыстас сӧстерінең видео пастыра айланған Россияның чаа-тархын пiрігiзiнің кізізі, тархын наукаларының докторы Михаил Мягков. Ол iдӧк чаа-тархын пірігізiнiң кнезі Владимир Мединскийнің алғыстазын читірген.
Пленарнай чыылығда араласханнар Ӧӧркі Чӧптің депутады, Хакасия пазының хазна чӧпчізі Владимир Штыгашев, республиканың Ветераннар чӧбінің кнес орынҷызы Василий Будылин, Россияның чаа-тархын пірігізінің Кемеров облазындағы регион пӧлиинің толдырығлығ директоры Кирилл Правдин, телеграм-блогер Иван Кондаков, Афганистан паза СВО ветераннарының Россиядағы пірігістің региондағы пӧлиинің кнезі Александр Векшин паза Хакасияның Ағбандағы епархияның протоиерейi Олег Попов.
Чыылығда иң улуғ чоох тутхан Владимир Штыгашев. Ол Iкiнҷі тилекей чаа пасталғаннаң сығара амғы тусха теере хайдағ чаалазығлар полғаннаңар чоохтаан. Аның чооғы прайзына, улам залда кӧп одырған чииттерге, тың тузалығ полған. Чоохта алынҷа тӧллернiң палғалызы чахсы чарыдылған, матырларның чахсы чааласханы кӧзідiлген. «Тархыныбысты хаҷан даа ундубин, матырларны сыбыра чеестирбіс», – теен ол.
Чыылығ араласчылары iдӧк алынҷа тӧллернің палғалызынаңар, чииттерні патриотизмге ӱгредердеңер чоох апарғаннар.
Пленарнай чыылығ соонаң форум араласчылары тоғысты алынҷа секцияларда узаратханнар. Анда аймах тоғазығлар, чоохтазығлар иртірілген. С.П.Кадышевтің адынаң чон чайаачызының национальнай кiнi алнындағы ачыхта «Тынағда» чазы кухнязы тоғынған. Чииттерге викториналар, команда ойыннары иртірілгеннер. Прай мероприятиелер патриотизмге, тархынның сынын пілерiне, тӧллер аразындағы палғалыстарны тыыдарына, матырларны чеестиріне кӧстелгеннер.
Сом Илона Каковани
Автор :
Николай Султреков
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
