Чонының чайаачызына тартылча
13.11.2024
Статья
Настя Туртугешева
Кӱн матыры
Настя Туртугешева Асхыс аймаандағы Калинин аалда чуртапча, андағыох школада 6-ҷы класста ӱгренче.
Хызыҷах олған садына чӧрчеткендӧк, аның чайаачы хылии iле пiлдiрген. Наа чылға кибелiстернi, позы сағын таап, Соох апсахха чоохтап пирҷең. Iҷезi Снежана Геннадьевна, аны истiп, сурҷаң: «Хызым, пу кибелiстi хайдаң таап алғазың?» «Мин аны ам на сағын таап алғам», – нандырҷаң иркеҷек.
Настя пасталығ класстарда ӱгренчеткенде, Калининдегi культура туразында ӱлӱкӱннерде хакас сарыннарын сарнаҷаң.
Хызыҷахтың iҷе-пабазы шор полчалар, аннаңар сӧбiре ас саннығ чонның санына кiрче. Аны хоостыра iҷезi Снежана Геннадьевна «Тузуксу» шорлар пiрiгiзiн тӧстеп алған. Iдӧк ол туған хыс Диана Чистогашеванаң хада Калининдегi культура туразында «Кӱмӱс» ансамбль азыбысханнар. Диана искусство школазында хореография клазын тоосхан полған, аннаңар аймах сiлiг теелбектернi сидiксiнмин турғызыбысчаң. Настяҷах iдӧк теелбек салча, республика синiндегi марығларда араласча. «Кӱмӱс» ансамбльға чӧргенӧк. Ам ӧӧрелерiн чыып алча, пiрее теелбек сағын таап, школада кӧзiтчелер.
Ӧткiн хызыҷах iҷезiне кӧктеен полар. Снежана Геннадьевна iдӧк чайаачы кiзi. Ол Кемеровтағы культура университедiн тоосхан.
Настя Туртугешева 2020 чылдаң Асхыстағы олған искусство школазынзар чӧрче. Анда хомыснаң ойнирға ӱгренiп аларға кӱстен парча. Ӱгретчiзi Ангелина Станиславовна Адоякова полча. Пу школазар кiрер алнында хызыҷах сарынах ӱгрен салған. Сыныхтағ тузы читкенде, ӱгретчiлер алнында уйатпин сарнап пирген. Амды сценазар iдӧк чалтанмин сыхча, концерттерде пiрее кӧглернi алынҷа толдырча, хайзын ансамбльнаң хада. «Айас чирiм», «Хорты палых» шор сарыннарын сарнапча. Ағаа хоза Хакасияның саблығ кӧгҷiлерi Павел Кимнiң, Евгений Улугбашевтiң, Юрий Киштеевтiң, Александр Саможиковтың, Нина Катаеваның кӧглерiн чахсы ойнапча.
Пос тус полза, Настя ибiнде дее хомыснаң ойнапча. Кӧг тириин чон узы Пётр Яковлевич Топоев ит пирген. Хызыҷах аны хайраллапча, иптiг тузаланарға кӱстенче.
Пӱӱл чайаачы хызыҷах Асхыстағы олған искусство школазын тоосча. Соонаң хореографиянаң айғазарға сағынча.
Iҷезi Снежана Геннадьевна «Асхыс-Абаза» электричкада билет кассирi полып тоғынча. Хызыҷах иб аразында иң чағын кiзiзiне чахсы полысча. Iдiс-хамыс прай чууп салча. Интернетте аймах рецепттер кӧрiп алып, iҷезiне кирек ниме-ноо алдыртып, чапсых чиистер пызырыбысча. Тимде чiҷең нименi сiлiг иде чазап салча, анаң iҷезiн азырапча.
Настя iдӧк сурлардаң пiлектестер идiбiсче. Iҷезi аның чазанҷыхтарын хынып кис чӧрче. Ол иркезiне аймах нинҷiлер толдыра ал пирче. Хызыҷах тимнеп алған пiлектестерiн ӧӧрелерiне тӧреен кӱніне сыйлапча.
Хызыҷах Ӱc чул аалзар аға-ууҷазы Геннадий Фёдорович паза Раиса Лазаревна Саражаковтарзар ааллап чӧрче. Анда пӧле харындас-пиҷелерiнең тосханҷа ойнап алча. Каникулларда аға-ууҷазында полза, ибде сымзырых полча, ниме-де читпинче тiпче Снежана Геннадьевна.
Школада Настя чахсы ӱгренерге кӱстенче. Орыс тiлi паза литература хынған предметтерi полчалар. Ол сизiктiг паза ырах кӧрiстiг хызыҷах. Позының алнында пӧгiн турғыс салза, аны хайди даа толдырча.
Амыр хылыхтығ хызыҷах хоосхаҷахтарға тың ачынча. Ибiнде аның Лили хоосхаҷағы пар.
Чайғызын ӧӧрелерiнең хада ойнапча. Снежана Геннадьевна хызыҷаан ӧӧрелерiнең хада Хакасиядағы кӧллерзер ал чӧрче. Суғ хазында палатка турғызып алып, чир-чайаанда истiг тынанчалар. Iдӧк чистектеп хада чӧрчелер.
Аҷазының ады Владислав, машинистке ӱгренче. Ағбаннаң Калининзер килзе, хыс туңмазы аны салбиныбысча, хада уроктар итчеткен полчалар.
Сом Ангелина Адояковани
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
