Танығлығ кӱн. Хакасияның креативнай индустриялар школазында Чон пiрiкчеткен кӱнге удур «Пiс – Россия чуртағҷылары» программа хоостыра 14 час толдыр салған оолах-хызыҷахтарға паспорттар пайрамни читiрiлген

Хазнабыс чуртағҷызының ӧӧн пiчиин алчатхан олғаннар «Пастағылар чӧрiмiнiң» ӧткiн араласчылары полчалар. Олар аймах-пасха синдегi марығларның чиңiсчiлерi полчалар, школаның паза халых чуртазында ӧткiн араласчалар. Танығлығ кӱнде олғаннар паспорттарын Хакасияның чииттер политиказы паза халых тилiзi министрi Евгения Майнагашеваның паза республика МВД-зының миграция сурығларынҷа устанызының пастығы, полиция полковнигi Татьяна Лапаеваның холынаң алғаннар.

– Пӱӱн мында артыхтарның артыхтары чыылысты. Сiрер пасха олғаннарға кӧзiдiм полчазар. Аны ундутпаңар. Амды сiрер Россия Федерациязының сын чуртағҷылары полчазар. 14 час тол парғаннаң сiрер хазна алнында нандырығлығ полчазар. Пастағы танығлығ пiчииңернi хайраллаңар. Мин позым даа ӧткiн тудынғаным ӱчӱн пастағы паспортымны Асхыс аймаа пазының холынаң алғам. Пӱӱнгi кӱнде министр полчам. Iзенчем, сiрернiң аразында iдӧк пӧзiк чидiглерге чидер кiзiлер пар, – чоохтанған Евгения Валерьевна.

Паспорт алғаннар санында Айза Ачитаева полған. Ол М.И.Чебодаевтiң адынаң Асхыстағы лицей-интернатта 8-ҷi класста ӱгренче. Айза орыс тiлiнҷе, литератураҷа, тархынҷа паза математикаҷа Россия синiндегi олимпиадаларда сыйыхтығ орыннарға турысхан. Iдӧк хызыҷах школа марығларында ӧткiн араласча. Ирткен чылда ол Асхыстағы искусстволар школызының хореография пӧлиин тоос салған. Паспорт алчатханына чарыдылған пайрамға Айза iҷезi Елена Ачитаеванаң хада килген. Елена Анатольевна школада паза олған садында педагог-психолог полып iстенче. Ол ӱс хызыҷахтың iҷезi полча. Айза ортызындағызы, аның пиҷезi, имнег кирее кӧстегҷе ӱгредиин тоозып, ординатурада ӱгренче, гинеколог специальнозын алча. Айза олох чiли имҷее ӱгренерге пӧгiнче. Хыс туңмазы пиҷелерiнең халбасха кӱстенче, аймах марығларда араласча, хоостирға хынча. Елена Анатольевна прай хызыҷахтарына тың поғдархапча тiп таныхтапча.

Iдӧк олғаннарны танығлығ кӱннең «Пастағылар чӧрiмiнiң» Хакасиядағы пӧлии чӧбiнiң кнезi Эдуард Федосов алғыcтаан. Пайрамда олғаннарға хазнабыстың ӧӧн пiчиинең хада Россияның Конституциязы паза «Пастағылар чӧрiмiнiң» ӧткiн араласчыларына пирiлчеткен танығ читiрiлген.

Сом Илона Каковани