Наа технологиялығ библиотека олғаннарны тартча
30.10.2024
Хабарлар
Ӧӧн библиотека тоғынҷызы Вера Воскевич истiг библиотеканы кӧзiтче
Нацпроект. Чарыс айының 28-ҷi кӱнiнде Ағбандағы Запорожскай ораманың 1-ғы туразында тиксi тыхтағ тоғызы соонаң модельнай олған библиотеказы азылған
Пӱӱнгi кӱнде олғаннар библиотеказар чӧрерге хынадырлар. Олар наа технологияларнаң тирiндiрiлчелер нооза, аннаңар анда чарых, чапсых кинделернi хығырарынаң пасха, iдӧк аймах ойыннар ойнирға чарир.
Ӧрiнiстiг кӱнде ол библиотеканың хыринда чуртапчатхан олған-узах iҷе-пабаларынаң хада улуғ аалҷыларны сахтаан. Иркiннi алтир алнында хызыл лентаны хыплирға кирек нооза. Хакасияның культура министрi Светлана Окольникованы паза Ағбан город пазы Алексей Лёминні «Лазуревый цвет» олған фольклор студиязы ыр-сарыннаң удурлаан.
– Кiзее пiлiстер хаҷан даа киректелче, аннаңар библиотекалар хайдағ даа туста кирексiніснең тузаланар. Олған библиотеказы, тiзең, кинделер ле хайраллаҷаң орын нимес, мында iдӧк чайаачынаң айғазарға, тилирге, сурығларға нандырығлар табарға чарир. Амғы тус табырах алысча, библиотекалар iдӧк нааҷылалчалар. Пӱӱнгi библиотекалар 30, 40, 50 чыл мының алнындағы осхас полбасха киректер. Олғаннар пiлiстернi киндедең не нимес, че iдӧк интернеттең паза интерактивнай ойыннар пастыра аларға хынчалар. Интерактивнай ойыннар – олаңай ла ойнаҷахтар нимес, аның полызиинаң пала чайаачызын тилiтче, аның ӱгренiске хынызы ӧсче, – кiчiг хығырығҷыларға чылығ сӧстер читiрген город устағҷызы. Iдӧк Алексей Викторович регионның культура министерствозын паза пӱдiрiгҷiлернi алынҷа алғыстаан.
Пiстiң хазнада наа тӧлнiң библиотекалары 2019 чылдаң сығара «Культура» нацпроектче тӧстелчелер. Запорожскай орамада орныхчатхан библиотека таллағлығ чардыхты иртiп алған. Таныхтирға кирек, ол городтың иң пастағы 9 хадыллығ туразынзар 1973 чылда кӧскен. Мында нинҷе-нинҷе тӧл книга хығырып ӧсче. Пу библиотекада пол, кӧзенектер, стенелер алыстырылғаннар. Тасты чарых ӧңнернең сырлалған. Iстiнде наа мебель турғызылған. Iдӧк кiчiг хығырығҷыларға чапсых кинделер алылғаннар.
– Ағбан городтың аарлығ чуртағҷылары, пӱӱн пiс теестегі модельнай олған библиотеказын асчабыс. Пу тоғысты тӱзiмнiг апарған нанҷыларыма улуғ алғызым читiрчем. «Культура» нацпроект полызиинаң, республика паза муниципальнай бюджеттердең ахча позыдылып, улуғ тоғыс толдырыл парды. Ағбанда тӧртiнҷi библиотека модельнайға айландырылды, республикада, тiзең, ол онынҷы. Пӱӱл iдӧк Боградта библиотека азарға халды. Прайзын ӱлӱкӱннең! – алғыстаан Хакасияның культура министрi Светлана Анатольевна.
Республиканың культура министрi Светлана Окольникова, Ағбан город пазы Алексей Лёмин паза кинде хығырарға хынчатхан оолах Денис Бурнаков хызыл лентаны хыплааннар. Анаң аалҷылар библиотеказар ирткеннер. Чыылысхан чонға экскурсияны ӧӧн библиотекарь Вера Воскевич иртiрген. Ол хайдағ наа технологияларға чидiнгеннерiн чоохтаан паза олар хайди тоғынчатханнарын кӧзiткен. Таныхтирға кирек, амды библиотекада наа, истiг гардероб пар. Алында андағ пулуң чох полған.
Сом Дмитрий Сунчугашевти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
