Брифинг. Хакасияның чааӌы комиссары Николай Видяйкин республикада чааӌы службазына кӱскӱдегi хығыртығ пасталчатхан сурығӌа брифинг иртiрген

Россия президентiнiң Указы хоостыра Хакасияда, прай хазнадағы чiли, 1 чарыстаң чааӌы службазына кӱскӱдегi хығыртығ пасталча. Хығыртығ мероприятиелерi федеральнай законодательствонаң турғызылған тустарда 1 чарыстаң 31 улуғ хырласха теере иртер. Хығыртығӌа чааӌы службазының тузы алыспинча, мының алнындағы чiли ол 12 айға тиңнелче.

Хайди искiрген подполковник Николай Видяйкин, кӱскӱдегi хығыртығда чааӌы службазына Хакасиядаң 700 азыра кiзi парар. Призывниктер Россияда служба иртерлер, оларны öнетiн чаа операциязы зоназынзар ыспастар. Службаа 18 – 30 частығ чииттер хығыртыларлар, войсколарзар пастағы команда чарыс айының ортызында пайрамни ызылар. Призывниктернi туған-чағыннары, правительство кiзiлерi, депутаттар ӱдезерлер. Хығыртығӌа чааӌы службазын иртiбiскен чааӌылар, тузында позыдылып, иблерiнзер айланарлар.

Призывниктер пастап ӱгредiг иртiрӌең чаа частьтарынзар ызыларлар. Анда олар амғы техниканаң тузаланарға ӱгренерлер, чааласчаң специальностьтар аларлар. Ӱгредiг ирткен соонда войсколарзар ызыларлар.

Амғы хығыртығ кампаниязында призывниктерге хығыртығ комиссиязының чарадығларына, чарғаа даа пирбин, хоптар пирер оңдай пирiлче. Хопты хығыртығ комиссиязынзар «Хазна полызығлары» портал пастыра электроннай кöрiмде пирерге чарир. Iдöк хопты, чаӌында пазып, посха МФЦ пастыра пирерге чарадылча.

Кiзiлерге повесткалар чаӌында ызылар. Аны призывникке холдаң холға, хол салдырып, читiрерлер, iдöк повестка чахығлығ пiчiкнең почтаӌа даа ызылар.

Республика чааӌы комиссариадында прай призывниктерге чааӌы кип-азаан, iзiг чиис, банк карталарын, сим-карталарны паза посха кирек гигиена ниме-ноозын пирерлер. Служба иртер орыннарзар чорых тузында призывниктернi азырирлар.

Призывниктер паза оларның паба-iӌелерi хығыртығдаңар прай кирек искiрiглернi таап аларлар Россияның арачыланыс министерствозының сайтында «Призывниктерге» чардыхта («Призывникке памятка» подраздел). Анда «Призывниктең чааӌаа теере» искiрiглiг инструкция пирiлче.

Россияның Тирiглiг кӱстерiнiң Ööн штабының ööн тимнег-мобилизация устанызында 15 чарыстаң кöнi линия тоғынып пастир. Аны пастыра хығыртығнаң палғалыстығ сурығларны пiлiп аларға чарир. Андар вторникте паза четвергте 10.00 – 12.00 частарда (Москва тузы) сығдырадарға чарир пу телефоннарӌа: 8(495)498-96-96, 8(495)498-96-97, 8(495)498-96-98. Iдöк Хакасияның чааӌы комиссариадында хығыртығ сурығларынӌа «iзiг линия» тоғынча, аның телефоны: 8(3902)34-13-08.

Брифинг иртiрген соонда Николай Видяйкин Хакасиядаң öнетiн чаа операциязынзар пос кöңнiнең чаалазарға парған «Корея» солалығ хакас оолнаң тоғазығ иртiрген. Аның ады-солазын адирға, хайда чааласханын даа искiрерге чарадылбинча. Махачы чааласхан ӱчӱн чааӌы комиссары аның кöксiне «За храбрость» медаль хазап пирген. «Корея» Хакасиязар тынаға позыдылтыр, чарыс айы тоозылчатса, пазох СВО-зар айланар.

«Корея» Ағбанда тöреен, школа тоозып, срочнай службаны Иркутск облазында РВСН войсколарында ирткен. 2023 чылда, Краснодар крайында хоза тимненiс иртiп, СВО-зар пос кöңнiнең парыбысхан. Аның 35 частығ улуғ харындазы iдöк пос кöңнiнең СВО-да чааласча.

Сом Дмитрий Сунчугашевти