«Чонға кирек иң артых проект» марығ. Пу наада Мадыр аал чуртағӌылары öрiнiстiг сылтағӌа чыылысханнар. Аал ортызында тынанӌаң парк азыл парған, ол «Саяны» адалча

Парк иргi ағас школа турған орында тöстелген. Ӱгредiг учреждениезiн сайабысхан соонаң ол ачыхты пылтыр парк пӱдiриине тимнеп сыхханнар. Аал чöбi устағ-пастаа Хакасияның национальнай паза территориальнай политика министерствозы иртiрчеткен «Чонға кирек иң артых проект» марығда, пастағы орын утып, пiр миллион 800 муң салковай алып алған. Пӱӱл, тiзең, проекттiң iкiнӌi чардығы чуртасха кирiлген, мадырдағылар 2024 чылда, хатабох марығда аралазып, iкiнӌi орынға сығып, пiр миллион 300 муң салковай утып алғаннар. Ол ахчаа тоғыстар узарадылған.

Сиденнелген паркта сцена, одырчыхтар, чахайахтар одыртчаң клумбалар, олған площадказы, öнетiн чаа операциязында чат халғаннарны хумартхылаӌаң орын (z буква оңдайынаң идiлген скульптура) орныхчалар. Мадыр аал чöбiнiң пазы Наталья Иванова чоохтапча: «Пу парктың проектiн мин чалғызан сағын таппаам, мағаа полысхан Мадырдағы Культура туразының тоғынӌызы Александра Юрьевна Жельман. Ол компьютерде öнетiн программа алып алған, анда пiс парктың проектiн хоостап, марыға ызыбысхабыс...»

28 ӱртӱнде 13.00 часта мадырдағылар аарлығ аалӌыларны удурлааннар. Пайрамға Хакасияның национальнай паза территориальнай политика министрiнiң орынӌызы Виталий Кунучаков, Таштып аймаа пазы Николай Чебодаев, Хакасия Ööркi Чöбiнiң депутады Василий Шулбаев, халых öмелернiң устағӌылары, идiнӌектер, чуртағӌылар килгеннер. Наталья Иванова, Виталий Кунучаков паза Николай Чебодаев хызыл лентаны хыплааннар. Ӱлӱкӱннең сценадаң алғыстаан Таштып аймаа пазы:

– Чалахай кӱннең, аарлығ чуртағӌылар! Пӱӱл Мадыр аал чöбiнде улуғ ӱлӱкӱн. Аалда мындағ осхас объект пӱт парза, iзенiс тöрiпче: аал чуртапча. Полған на чирнiң позының чолы, Мадыр аал матырлар адын ал чöрче, мин киртiнчем, амғы олғаннарда кöп кӱс, арса, олар улуғ пастых пол парарлар алай iстезiгӌiлер. Халғанӌы чылларда аалда маңат алызығлар пол парған: наа школа, Культура туразы, öрттең тоғыр депо. Имнег амбулаториязы азылды. Тигiриб пӱдiрiлген. Сiрернiң хыринда пай тайғалығ чир. Наталья Сергеевнаа алғапчам орта чол табарға, посха киртiнерге.

Мадыр чуртағӌылары наа парк азылғанына уғаа öрiнчелер. Пiди кöрзе, аалда тынанӌаң даа чир чох полӌаң, ам, тiзең, истiг орын. Мында улуғларға даа, кiчiглерге дее тынанып аларға чарир.

Пӱӱл Хакасияда 34 муниципальнай пӱдiс национальнай паза территориальнай политика министерствозының мариинда чиңiсчi пол парған, республика бюджедiнең оларның проекттерiне 45 миллион салковай хабазыға пирiлген. Чылдаң чылға ол ахча хозылып одырча.

Cом авторни

Сомда: «Саяны» паркта аалӌылар öнетiн чаа операциязында чат халған чир-суғӌыларыбысты, чахайахтар салып, хумартхылааннар