Сыйыхтас. Хакасия пазы Валентин Коновалов Тиксi тилекейдегi туризм кӱнiне удур иң артыхтарны сыйыхтаан

Хакасия правительствозының чыылығлар залында кöп кiзi чыылыспаан. Пастыхтардаң Хакасияның экономика тилiзi министрi Роман Ковтун паза аның орынӌызы Ольга Кузьмина полғаннар. Iдöк стол кистiнде республикада туризмнi тилiдерiне позының хозымын итчеткен чуртағӌылар полғаннар, ол санда туроператорлар, гид-экскурсоводтар паза пасхазы.

– Россия президентi Владимир Путин регионнарға пöгiн турғысхан: 2030 чылға теере туризмнiң региондағы сығарызына хозымын пис процентке читiрерге паза туристтернiң санын iкi хати öскiрiбiзерге. Пӱӱнгi кӱнде Хакасияда ол кöcтегӌе улуғ тоғыс апарылча. Нинӌе-де чыл пiс туризмнi тилiдерiнӌе кöстеглiг тоғыс апарчабыс. Туризм iдöк Хакасияның 2030 чылға теере тилiс стратегиязына иң кӱстiг оңдайлығ кöстеглер санына кирiлген. Пiс кöрчебiс, чылдаң чылға iстiндегi туризмде Хакасияа кирексiнiс öсче. Пис чыл изере туристтер саны чахсы öсчеткенiн кöрчебiс. Кöзiдiмге, ирткен чылда республика аалӌылары саны 1,5 миллион кiзее сала ла чит парбаан, ол, тiзең, коронавирус тымозы алнындағы кöзiдiгдең iкi хати кöп! – ӱлескен республиканың туризм тилiзiндегi чидiглернең Хакасия пазы.

Аның искiриинең, пӱӱл öзiс iдöк таныхталча. Сбербанк чыыпчатхан танығларӌа, öзiс 20 %-ке тиңнелче, че салтарларны чыл тоозылза ла идерге чарир. Пӱӱнгi кӱнде республика ӱлгӱлерi туризмнең айғасчатхан идiнӌектернең хада туризм мастер-планын тимнепче. Ол инвесторларға туризм тилiзiнiң ööн кирексiнiстерiн кöрерге полызар: хайдар туристтер чöрерге хынчалар, хай син тохтаӌаң орын киректелче, хайда инвестициялар киректелче. Алты чыл аразына ла туризмнi тилiдерiне республика бюджедiнең позыдылчатхан ахча синi 15 хати öскiрiлген, ағаа хоза федеральнай хабазығ тартылча. Инвестиция iдöк кирiлче. Республикада 12 килкiм инвестиция проектi тиксi 17 миллиард азыра салковайға чуртасха кирiлче. Хакасия пазы мыннаң мындар проекттер саны хайди даа хозыларын таныхтаан паза республика хайди даа хабазар тiп iзендiрген.

– Сiрерге, полғаныңарға ла, öткiнiңер, аалӌыларға хынған республикабысты азарға полызарға тимненiзiңер ӱчӱн алғызым читiрерге сағынчам. Сiрерге чидiглер, хазых паза наа проекттер, оларны чуртасха маңнаныстығ кирерге алғапчам. Ӱлӱкӱннең, аарлығ арғыстар, – алғас сöстерiнең тоосхан чооғын республика пазы.

Хакасия пазының алғыстазына пöзiк узы паза регионның туризмiн тилiдерiне улуғ хозымы ӱчӱн турысханнар «СаяныЭкоТур» ООО-ның директоры Татьяна Егорова, «СБЕРБАНК» ПАО-ның Ағбандағы пöлиинiң устағӌызы Сергей Анисимов, «Сибирьнiң кресен-фермер хоныхтары паза аал хонии промышленность комплексi» ассоциацияның толдырығлығ директоры Андрей Попков, Алтай аймаа пазының инвестицияларӌа паза туризмӌе полысчызы Михаил Исаев, «Альтамира-Азия» ООО директоры Игорь Бурмак, «Хакасский» заповедниктiң директор орынӌызы Анжелика Бахтина, Хакасияның туристтерге искiрiг кiнiнiң устағӌы орынӌызы Анастасия Андреева паза ööн экспертi Павел Чураков, «Тортуга» тынағ паркының ööн директоры Александр Марченко, «Гладенькая» город тастындағы отельнiң коммерческай директоры Анна Гогунская паза гид-экскурсовод Анастасия Фалиц-Готлиб.

Сыйыхтас соонаң пайрамнығ чыылығ араласчылары республикада туризм тилiзiнеңер, Хакасия ӱлгӱлерiнiң хозымынаңар паза алынӌа сидiк сурығлардаңар чоох апарғаннар, ол санда чол, чир паза чарытхы сурығларынӌа. Идiнӌектер правительстваа хабазығ ӱчӱн алғызын читiргеннер. Хаӌан-да гранттарға тикci ӱс миллион салковай позыдылӌаң полза, 2025 чылда ол хабазығны 100 миллион салковайға читiрiп аларына iзенiс пар. Ағаа хоза республиканың алынӌа тилiс программазынӌа туризмге хабазары кöрiлче. Пу программа 2025 – 2030 чылларда чуртасха кирiлер. Аны хоостыра федеральнай бюджеттең республиканың экономиказын тилiдерiне чыл сай пiрер миллиард салковай позыдыл турар.

Сом Равиль Дзязькони