Полызығ. Хакасияның чуртағӌылары чыған ниме-ноо öнетiн чаа операциязында араласчатхан чир-суғӌыларыбысха пу наада ызылды

Iкi ööренiң öтiг ӱннерi анда-мында ла истiл халып одырча. Олар мында прай ниме пiлчеткен осхастар. Хайдағ коробкаларны алтынзар саларға, хайзыларын ӱстӱнзер ипти турғызарға киректелчеткенiн постарына полысчатхан кiзiлерге чоохтап одырчалар, анаң сыныхтабызарға маңнанчалар.

– Пiрее коробкалар азых. Андар хоза сыйыхтар салыбысчабыс. Кöрiндiре чатчатхан пiчiктi хығырып, ылғадым. Хызыӌағастың пабазы ба, туғаны ба, öнетiн чаа операциязында аралазып, чуртазын пир салтыр. Ол пала пiстiң чааӌылардаң аның ӱчӱн ыырӌыны табырах чох идерге, ибзер чиңicнең айланарға сурынча, – харах частарын чызынча ööрелернiң пiрci.

Пiс, хабарӌылар, олардаң ады-солаларын чоохтап пирерге сурынғабыс. Ынабинчалар. Пiс позыбыстың тоғызыбысты чахсы толдырарға харасчабыс тiп чоохтан салғаннар. Ол туста Хакасияның национальнай паза территориальнай политика министерствозының пресс-службазы устағӌызы минзер хырғыс иреннi ағыл килген. Танысчабыс.

– Хакасиядағы хырғыстар пiрiгiзiнiң кнес орынӌызы Марс Садыралиевич Жумабаев полчам, – хол тутча ол мағаа.

Анаң табырах имнег полызиин пирӌең машинаның хыринзар апарча. Олар аны тыхтирына, хысхыда чöрӌең наа тегiлектер аларына улуғ хозым иткен полтырлар. Анаң машина хабырғазында пазылған сöстерге хайығ айландырарға чоохтапча. Кöрiбiстiм. Анда, тiзең, хирург Игорь Александрович Арчимаевке Хакасия чурағӌыларынаң сыйых тiп пазылтыр. Хайдағ чӱрексiнiстiг кирек идiлче мында. Аны Ағбан пилтiрi аймааның хазых хайраллаӌаң пöлии пирген полтыр.

Улуғ паза кiчiг кöрiмнiг аймах-пасха коробкаларның тастында Луганск, Донецк, Свердловск городтар, Курск облазы пазылғлап партырлар. Чир-суғӌыларыбыстың iзiг чӱректерiнiң чолабидi парча нооза öнетiн чаа операциязы иртчеткен орынзар.

Cом Дмитрий Сунчугашевти