87-ӌi чазын апарчадып, ӱр ағырған соонда ах чарыхтаң парыбысты хакастарның аразында пастағы спорт узы полған, техническай наукаларның кандидады, каратэӌе чоннар аразындағы категориялығ марығ чарғыӌызы, Хакасияда каратэ секциязын тöстеен Алексей Николаевич Карамашев.

Алексей Николаевич 1938 чылда 3 кöрiкте Таштып аймаандағы Сарығлар аалда (амды ол Асхыс аймаана кiрче) тöреен. Пöзiк ӱгредiгнi Москвадағы Ф.К.Циалковскийнiң адынаң авиация технологическай институдында алған. Анда ӱгренчеткенде, 1961 чылда олаңай кӱресче спорт мастерi полыбысхан. Москвада конструкторларның чабых бюрозында тоғынчадып, 30 час ас парғанда, каратэ секциязына чöрiп, хара хурның ээзi полыбысхан. 1980 чылда Ағбанзар айланған, каратэ секциязын асхан. Хакасияның халых-чарыдығлығ чуртазында öткiн араласчаң, чыылығларда чоныбыстың ағырсымнығ сурығлары хоостыра чоох тутчаң, позының сағыстарынаң ӱлесчең. Чахсы тоғызы ӱчӱн хазнабыстың, Хакасияның аарлығ сыйыхтарына, аарластығ аттарына кöп хати турысхан. Хакасияның Улуғлар чöбiнiң президиумы Алексей Николаевич Карамашевтiң сöбiрезiнең, туған-чағыннарынаң улуғ хомзыныснаң ӱлесчеткенiн искiрче. Чоныбыстың матыры, Хакасияа улуғ туза ағылған Алексей Николаевичтiң чарых омазы пiстiң чӱреебiсте саңайға халар.