Шира аалда – ӱс наа тахта, Хара кӧлде – хумартхы тас
20.09.2024
Хабарлар
Ширадағы наа тахталарның пірсі
«Чонға кирек иң артых проект». Шира аалда чазағ кис чӧрҷең ӱс тахта пӱдірілген: ікізі Орловка суғ кизіре чатча, пірсі – Тойым суғ кизіре
Иргі тахталар изел париған полғаннар. Амды аал чуртағҷылары чыл ибіре наа тахталарҷа олған садынзар, школазар, почтазар, имнег туразынзар, аптеказар, Культура туразынзар, тимір чол вокзалынзар, автовокзалзар, садығ тураларынзар чӧр турарлар.
Шира аал чӧбінің устағ-пастаа «Чонға кирек иң артых проект» республика мариинда араласхан. Аны Хакасияның национальнай паза территориальнай политика министерствозы иртірче. Тахталар пӱдіриине 3 миллион салковай азыра киректелген. Шира аал чӧбі, «Орловка суғ кизіре ікі тахта паза Тойым суғ кизіре пір тахта пӱдірері» проектті арачылап, аймах кіннері аразында ікінҷі орынға сыххан. Іди ол республика бюджедінең 1,5 миллион салковай алған. Ағаа хоза, Шира аймааның устағ-пастаа 1,5 миллион салковай позытхан, Шира аал чӧбінің администрациязы – 300 муң салковай азыра.
Пу проектче Ширадағы Орловскай, Рабочай, Заречнай орамаларда чазағ кисчең ӱс тахта пӱдірілген, оларның хыриндағы орыннар иптелгеннер, «Солнышко» олған сады алнындағы тротуар нааҷылалған паза сиденнелген.
Хакасияның национальнай паза территориальнай политика министрі Лев Сафьянов аал чуртағҷыларына тузалығ проектті чуртасха кирген ӱчӱн алғыстастығ пічіктер читірген.
Ідӧк пу кӱннерде Шира аймаандағы Хара кӧл аалда Илбек Ада чаада чуртастарын пир салған чааҷы чир-суғҷыларыбысха чарыдылған хумартхы тас нааҷылалған соонаң пайрамни азылған. Аны Хара кӧл, Талкин харасуу, Сеектіг, Тоғырхы паза Чабак аалларның чуртағҷылары чидікпин сахтааннар. Матыр чааҷыларыбысха чарыдылған хумартхы тас Хара кӧл аалда ла пар.
Мының алнындағы хумартхы тас тың иргілен парған полған. Аннаңар чуртағҷылар аны нааҷылир ӱчӱн «Чонға кирек иң артых проект» республика мариинда аралазарға чӧпнең сыхханнар. Хара кӧл аал чӧбі, проектті турыстығ арачылап, чиңістіг орын алған. Іди республика бюджедінең 1,3 миллион салковай позыдылған. Шира аймаа устағ-пастаа, чуртағҷылар паза спонсорлар 1 миллион салковай азыра чыыбысханнар. Прай пу ахчаа хумартхы тас паза аның ибіркі чирі тиксі нааҷылалған.
Хакасияның национальнай паза территориальнай политика министрі Лев Сафьянов проектті чуртасха кирген ӱчӱн прайзын алғыстаан. Ідӧк ол «Прасковья» фитокіннің устағҷызы Владимир Лосевскийге хумартхы тасты иптиріне 650 муң салковай пирген ӱчӱн алғыстастығ пічік читірген.
Илбек Чиңіс кӱнінің пайрамнығ 80 чылы чағдапчатханда, Хара кӧл аалда махачы чааҷыларыбыстың аттары пазылған тимір стелалар граниттіге алыстырылғаннар. Хумартхы тастың ибіркі чирі полимерпесчанай плитканаң тӧзелген. Постаментті паза ачыхты керамика паза керамограниттіг плиталарнаң чабысханнар. Чааҷының кӧрімін иптебізіп, сырнаң сырлабысханнар. Ағас сиденні тимірге алыстырғаннар.
Сом авторни
Автор :
Светлана Астанаева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
