Билет утып ал!
20.09.2024
Хабарлар
Культура. Ӱртӱн айының 25 – 27 кӱннерінде Калмыкиядағы Б.Басанговтың адынаң Национальнай драма театры «Улуғ гастрольлар» федеральнай программаҷа Ағбанда ааллир
Ыраххыдаң килчеткен артисттер Хакасияның чуртағҷыларына чапсых ойыннар ағылчалар. «Чужой ребёнок» паза «Ойраты мои, ойраты...» спектакльларны тикке кӧріп алар ӱчӱн, «Читіген» Хакас драма театры «ВКонтакте» социальнай сетьтегі страницазында ойын иртірче. Анда аралазарға сағынчатханнарға «Читігеннің» страницазына пазын саларға, анаң пу ойыннарның афишаларына лайктар турғызарға паза оларны пос страницазынзар хобырарға кирек. Ағаа хоза, хайди даа комментарий артыс саларға. Ойынның салтары ӱртӱн айының 20-ҷі кӱнінде 17.00 часта пілдістіг полар. Чиңісчілерні усанабас саннар генераторы полызиинаң ілезіне сығарарлар. Аарлығ чуртағҷылар, ойында аралазып, часкаларыңны сынап кӧріңер паза «Улуғ гастрольлар» неделязының спектакльларына киліңер!
Ідӧк билетті пу адресче садызып аларға чарир: https://clck.rғ/еK2іВ. Чииттернің ойыннарға Пушкин картазынҷа кірҷең оңдай пар. Сурығлар полза, пу номерҷе сығдырадарға: +7(3902)260042.
Б.Басанговтың адынаң драма театрының спектакльлары С.П.Кадышевтің адынаң чон чайаачызы кінінде иртер.
26 ӱртӱнде 19.00 часта В.Шкваркиннің «Чужой ребёнок» (12+) хормачы ойыны кӧзіділер. Аны режиссёр Сергей Бурлаченко турғысхан. Полтазы хоостыра чиит артист хыс, тойлығ чӧрчеткен ипчінің омазын чайап, репетиция иртірче. Дачада хонҷыхти чуртапчатхан ӧӧрезі, сынап таа пала сахтапчатханына киртін парып, чахсы тылаасты прай аалға тарадыбысча... Ойын орыс тілінең парар.
27 ӱртӱнде 19.00 часта режиссёр Борис Манджиевтің «Ойраты мои, ойраты...» (12+) спектакльы полар. Анда чир, ис-пай, ӱлгӱ ӱчӱн чылдаң чылға хазыр чаалар парчатханнаңар чоохталча. Кем иң кӱстіг паза пик тирігліг, ол пу чир ӱстӱнде чуртапча. Чаа соонҷа чаа парча. Іҷелер, ипчілер оолларын паза ирлерін ӧлімге ысчалар... Ойын калмык тілінең парар, синхроннай тілбестег полар.
Автор :
Ольга Ивандаева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
