«Чол хахпанына» кірбес ӱчӱн
20.09.2024
Хабарлар
Саяногорсктағы ЮИД араласчылары чӧрім тузында
Чӧрім. «Пристегнись, Хакасия!» кампания парчатхан туста ГАИ тоғынҷылары чуртағҷылар аразында сурастырығ иртірчелер
Іди Саяногорск городтың чон кӧп чӧрчеткен орамазында инспекторлар водительлерге паза пассажирлеріне сурығлар пиргеннер. Мероприятиенің ӧӧн пӧгіні – городтың чуртағҷылары паза аалҷылары, автомобильнің тінін тутчатса, хурчанҷаң хурнаң тузаланарын чахсы пілчелер алай чох тіп ілезіне сығарары. Араласчылар ол правилоларға хайди хайчатханнарын искіргеннер, чол чӧрізі оңдайларына тудынмаза, хайдағ хорғыстар полчатханын чарытханнар. Сурастырығ чахсы салтарлар кӧзіткен. Прайзы чорыхта хурчанҷаң хурнаң хайди даа тузаланчаттыр. Чонның таниинаң, законда кӧріл парған правилоларға тудынза, хурнаң хурчанза, чол саайларында аар палығлаттырарынаң оозып аларға чарир.
ГАИ тоғынҷыларына сурастырығны иртірерге город депутаттары, устағ-пастағ спецалисттері паза 1 № школаның ЮИД араласчылары хабасханнар. Олғаннар водительлерге буклеттер таратханнар.
Харатас городта ЮИД араласчылары, школаларҷа чӧріп, ӱгренҷілерге посты чолда хайди тудынарға кирек тіп чарыдығлығ тоғыс апарғаннар. Іди чиит инспекторлар ГАИ тоғынҷыларының ӧӧн полысчылары полғаннар. 19№ школаның ЮИД отряды ӱгредіг учреждениезі тастында олғаннар иртен школазар хайди килчеткеннерін сыныхтаан. Олар оолахтарға паза хызыҷахтарға чол кизер алнында капюшонны суурарға паза гаджетті ізепке суғарға кирек тіп тузалығ чӧптер пиргеннер. Ідӧк, «чол хахпанына» кір парбас ӱчӱн, сизіктіг поларға хығырғаннар.
Ол арада Ағбан пилтірінде ГАИ тоғынҷылары «Пристегнись, Хакасия!» чӧрімні аннаң андар узаратханнар. Оларға Чииттер кінінің волонтёрлары полысханнар. Чӧрімнің араласчылары транспорт ээлеріне чарытханнар, 12 часха читкелек палаларны алнындағы орында, олғанны тутчаң тирігнең тузаланып, одыртарға кирек. Водительлер чӧптерні миистеріне тирең сиирт салар ӱчӱн, оларға сизіндірігліг брошюралар читіргеннер.
Ідӧк пу неделяда тиксі хазнаның чуртағҷыларынзар социальнай сетьтер пастыра Россияның хазна автоинспекциязы устағҷызының орынҷызы Олег Понарьин айланған. Ол, хомзынысха, чыл сай ӱртӱн айында чазағ чӧрчеткен олғаннар саайға удаа кірчелер тіп таныхтаан. Аннаңар, андағ хорғыстығ киректер полбас ӱчӱн, ӱгредіг учреждениелерінде чарыдығлығ тоғыстар (инструктажтар, чоохтазығлар, уроктар) тӧреміл апарарға киректелче. Аннаң пасха, іҷе-пабаларның хайиин чол правилоларына тудынарына айландырарға.
«Урокта алып алған «2» паалағны тӱзедібізерге чарир, че чолдағы правилоларға тудынмааны паланың чуртазына хомай теелче. Аннаңар улуғларны олғаннарны ӱгредіп одырарға хығырчам. Піс, хада-пірге тоғынып, пір ле нимес иркенің чуртазын ал халарбыс», – теен Олег Понарьин.
Таныхтирға кирек, кӱскӱзін республикада кӱннер алысхах поладыр. Наңмырлар чаапчалар, хазыр чиллер ӱбӱрчелер, тигір кӱзӱреп, мӱндӱр дее тоолап сыхча. Аны хоостыра хазна автоинспекциязының тоғынҷылары водительлерні чолда улам сиргек поларға хығырчалар. Чут кӱннерде чолда тың ойладарға чарабас, алнында парчатхан транспорттаң сала оортах тудынарға чӧп пирілче.
Сом Хакасиядағы чол хазна инспекциязының «ВКонтакте» соцсетьтегі страницазынаң
Автор :
Тимнеен Татьяна Тютюбеева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
