Пістіңнер чиңісчілер санында
17.09.2024
Хабарлар
Поғдархас. Пу кӱннерде «Зарница 2.0» тиксі Россия чаа-патриот ойынының халғанҷы чардығы ирт парды. Анда Сибирьнің чиит оол-хыстары постарын турыстығ кӧзіт пирділер
Марығда Сибирьнің алты регионының олғаннары араласхан – Хакас Республика, Хызылчар крайы, Кемеров, Новосибирск, Омск, Томск областьтары. Полған на регионның чииттері чиңісчілер санында полыбысхан.
Арға-мӧрійлер 11 – 13 частығлар паза 14 – 17 частығлар аразында ирткен. Олар Волгоград город хыриндағы полигонда кӱстерінең сынасханнар. Улуғлар аразында ирткен марығда чазызар 40 отряд паза 400 пала сыххан, ортын частығлар аразында – 20 отряд паза 200 пала. Полған на отрядсар командир (радист), чаа корреспонденті, кибербезопасностьча специалист (политрук), сапер, штурмовик, топограф (минометчик), пилот чох учух чӧрчеткен аппараттың ікі операторы, ікі имҷі, инструктор кіргеннер. Оларның ӧӧн пӧгіні – сын нимес ыырҷыны чох идері. Полигонда олғаннар тактическай чахығ толдырғаннар, ыырҷы чазынчатхан орынны холға киргеннер паза тутханнар, авиациянаң паза артиллериянаң ыырҷыны чох иткеннер.
Марығ салтарында ортын частығлар аразында 1 орынны «Таежные барсы» ӧме (Кемеров облазы) холға кирген. Улуғлар аразында призер Новосибирск облазының ӧткіннері полыбысханнар: ӱзінҷі орын – «ВПК Гвардия» отрядти. Олох Россияның отрядтарының рейтингінде 4 орында пол парған.
Алынҷа зачетта cибирьдегілер постарын турыстығ кӧзіт пиргеннер. 14 – 17 частығлар аразында «Военно-полевая (тактическая) медицина» кӧстегде «Гагаринцы89» отрядтаң Григорий Фадеев паза Егор Силуянов полыбысханнар. Чиит ооллар Томск облазынаңнар. Сыйыхтығ орыннарда пуох отрядтың чииттері полыбысханнар: «Топография, спортивное ориентирование и корректировка» дисциплинада Полина Захарова – 2 орында, «Основы управления и противодействия БПЛА» дисциплинада Алексей Иванкович паза Дарья Шерстобитова – 2 орында, «Штурм и тактика боя в ограниченном пространстве» дисциплинада Даниил Спицын – 3 орында. Паза даа пасхазында Сибирьдегі чииттер постарын турыстығ кӧзіткеннер. Хакасияның даа чииттері пӧзік тимненістіг полғаннар. Ортын частығларның аразында «Патриот РХ» отряд араласхан (Орджоникидзе аймаа). Олар «Пожарная эстафета» кӧстегде чиңісчі полыбысханнар, аның араласчызы Екатерина Удина, тізең, «Основы военной журналистики» дисциплинада ікінҷі орында полыбысхан.
Россия Федерациязы президентінің Сибирьдегі федеральнай округтағы полномочиеліг кізізі Анатолий Серышев марығның чиңісчілерін паза призерларын алғыстаан. Аның чооғынаң, амғы туста чииттерні чаа-патриот киреене тартары улуғ кирексіністе. «Олғаннар постарын турыстығ кӧзіт пиргеннер, андағлар – махачылар, кӱстенҷіктер, таланттығлар, пос Чир-сууна хынчатханнар – Россияның таңдағызын пӱдірерлер», – таныхтаан чооғында полпред.
Тиксі алза, проектте 800 муң азыра олған араласхан, хайзылары хатығ таллағ ирткеннер. Оларны марыға 80 муң кӧстегҷі тимнеен, хайзыларының аразында 400 СВО ветераны паза араласчызы. «Зарница 2.0» тиксі Россия чаа-патриот ойыны «Ӱгредіг» национальнай проекттің «Россияның чииттері» федеральнай проекті хоостыра иртірілген. Чарым чыл олғаннар чарыдығлығ занятиелер ирткеннер, чаа специальностьтарынаң танысханнар, аймах марығларда араласханнар.
Сомнар sfo.gov.ru сайттаң
Автор :
Тимнеен Оксана Котюбеева
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
