Чолда сизiктiг поларға
11.09.2024
Хабарлар
ГАИ тоғынҷызы палаларнаң чолны орта кизердеңер чоохтазығ апарча
Чӧрiм. Наа ӱгредiг чылы пасталыбысханда, Хакасиядағы хазна чол инспекциязы олғаннарнаң чолда сизiктiг полардаңар «Пристегнись, Хакасия» социальнай
чӧрiм иртiрче
Iди Ағбан городта ГАИ тоғынҷылары школаларда пастағы класстар ӱгренҷiлерiнең «Олғаннарға – Хакасияда хорғыс чох чоллар» чӧрiм хоостыра профилактика тоғыстарын иртiргеннер. Андағ уроктарның ӧӧн пӧгiнi – чолны орта кизерiне паза транспортта сибер тудынарына ӱгредері. Олғаннар, чол кисчетсе, пастап сол саринзар, анаң оң саринзар хайди даа кӧрiп аларға киректер. Автомобильлер тохтап турыбыссалар ла, чол кизерге. Харасхы туста автомобиль фаралары чариина чалтырапчатхан кип-азах кизерге.
Iдӧк республикадағы хазна чол инспекциязының тоғынҷылары олған садтарының воспитательлерiнең хада, чолларда автомобильлернi тохтадып, водительлерні кiчiг олғаннарны хорғыс чох итчеткен креслоларға одыртарға ундутпастаңар сизiндiргеннер. Оларға хабасханнар ГАИ-ның кiчiг полысчылары.
Ағбан городтың тӧрт школазының паба-iҷелер комитеттерiнiң кiзiлерi iдӧк хазна чол инспекциязы тоғынҷыларынаң хада олғаннарны школаа ӱгренерге автомобильлiг тарт килчеткен паба-iҷелерге чолда хорғыс чох чӧрердеңер пазылған чаҷыннар таратханнар, автомобильлердегi арачыланҷаң хурларны кис турарын ундутпастаңар сизiндiргеннер.
Пу чӧрiмге хозылғаннар Хакас политехническай колледжтiң студенттерi. Олар iдӧк, городтағы школалар хыринда турып, школазар парчатхан ӱгренҷiлернiң чол кисчеткенiн сыныхтааннар. Олар, чол кизерге чарадылчатхан светофорның ноған ӧӧ чари тӱссе, автомобилисттерге тохтап турардаңар сизiндiрiг пирчеткеннер. Ағаа хоза, волонтёр-студент чол кисчеткеннерге ибiре кӧр турарға, хулахтарынаң наушниктернi суурарға паза, велосипедтең алай самокаттаң тӱзiп, чолны чазағ иртерге чоохтап турған.
Ағбан городтағы «Ивушка» олған садында ГАИ тоғынҷылары кiчiг олғаннарға чолны орта кизердеңер чарыдығлығ чоохтар апарғаннар. Светофорда чарадылчатхан ӧң чари тӱссе, чолны сизiктiг, маңзырабин, иртерге кирек. Iдӧк полиция тоғынҷылары харасхыда чарыҷаң пленкалар ағылғаннар. Олғаннар оларны постарының кип-азахтарына паза рюкзактарына чапсырғаннар.
Андағох уроктар ирткеннер Харатас городтағы паза Шира, Алтай аймахтарындағы школаларда паза олған садтарында.
Хазна чол инспекциязының тоғынҷылары паба-iҷелернi чолда хорғыс чох чӧрерге паза палаларны чолда сизiктiг поларға ӱгретчелер.
Сом Хакасиядағы чол хазна инспекциязының «ВКонтакте» соцсетьтегі страницазынаң
Автор :
Тимнеен Илья Топоев
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
