Олған библиотеказында – наа технологиялар
11.09.2024
Хабарлар
Хакасия пазы Валентин Коновалов библиотека тоғынҷыларынаң паза олғаннарнаң хада
Нацпроект. Ӱртӱн айының 6-ҷы кӱнiнде Абазада алғым тыхтағ соонаң модельнай олған библиотеказы азылған
Модельнай библиотекалар наа технологияҷа пӱдiрiлчелер. Олар 2019 чылдаң сығара «Культура» национальнай проект хоостыра тиксі хазнаҷа азылчалар. Абазадағы библиотека системазы марығлығ таллағда араласхан соонаң чиңiсчiлер санына кiр парған. Iди «Библиотека нового поколения» проекттi чуртасха кирерiне федеральнай бюджеттең 7 миллион 920 муң салковай, республикадаң 80 муң салковай паза муниципальнай пӱдiстең 247 муң салковай пирiлген. Тыхтағ тоғыстарына Абаза устағ-пастаа хоза 555 муң салковай позытхан.
Абазадағы олған библиотеказы 1967 чылда тӧстелген. 1980 чыллар пасталғанда, наа туразар кӧс парыбысхан, аннаң сығара нааҷыластар кӧрбеен. Ам, тiзең, мында кӧзенектер, поллар, стенелер, чарытхы алыстырылғаннар, суғ системазы, канализация, вентиляция нааҷылалған, наа оборудование алылған.
Пайрамда республика пазы Валентин Коновалов, культура министрi Светлана Окольникова, Абаза пазы Валентина Филимонова, библиотека тоғынҷылары, олғаннар араласханнар.
Валентин Олеговичке сӧс пирiлгенде, ол теен:
– Пӱӱн сынап таа уғаа ӧрiнiстiг кӱн. Мындағ библиотекаларны пiс Хакасияның полған на городында алай аймах кiнiнде азарға сiренчебiс. Пӱӱнгi кӱнге республикада 10 андағ библиотека тӧстел парған. Мындағ маңат алызығлар «Культура» нацпроект хоостыра чуртасха кирiлчелер. Нацпроекттi тӧстеен ӱчӱн улуғ алғызым Россия президентi Владимир Путинге читiрчем. Модельнай библиотека – ол чииттер, олғаннар тартылчатхан орын. Мында прай ниме халғанҷы технологияларҷа идiлче. Культура чох халыхта тилiс парбинча, культура хоостыра пiс пӧзiк искусстваа, илбек кiзiлернiң чайаачыларына кӧнiкчебiс.
Валентина Филимонова олғаннарзар айланған: «Кӧрiңер, хайдағ мында сiлiг! Кил турыңар пеер, хығырыңар нанҷыларыңны, хайраллаңар пу орынны. Алғыстапчабыс прайзын, кем пу чахсы киректе араласхан».
Хызыл чаламаны Валентин Коновалов, Светлана Окольникова паза Абазадағы библиотека системазының устағҷызы Юлия Затула хыплааннар. Iстiнзер кiргенде, аалҷыларға экскурсия оңдайынаң библиотека тоғызынаңар чарыда чоохтааннар. Иң пастағызын «Дворик семейного чтения» орында пол парчазың. Ол Сӧбiре чылына чарыдылған. Мында палаларға нымзах одырчыхтар, ойнаҷахтар, хумнығ сундух тимде. Хығырҷаң пӧлікте палаларға 4Д кинделернең, интерактивнай глобуснаң танызып алар оңдай пар.
Пасха пӧлiкте «Парк эрудитов» орныхча. Ӧӧн кӧстее – хакас чирiнеңер, культуразынаңар, чозах-кибiрлерiнеңер литературазы. Iдӧк анда «Хакасский» заповедникке кӧп хайығ салылча. Саарбахтарға аймах литература толдыра: имнег киреенеңер, спорттаңар, чаа киреенеңер. Олғаннарны тилiдер ӱчӱн мында турғызылған тринокулярнай стереомикроскоп, интерактивнай стене. Библиотека тоғынҷылары Валентин Олеговичке ол тирiглер хайди тоғынчатханын кӧзiт пиргеннер. Анаң «Абонемент» пӧлiксер парғаннар.
Олған библиотекалары нааҷылалчатханы ӧрiнiс ағылча. Амғы туста олғаннарны хығырыға кӧнiктiрерге сидiгӧк. Наа технологияларнаң тузаланза, арса, кiчiг хығырығҷылар саны хозылар.
Сом авторни
Автор :
Тарина Бутонаева
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
