Туғаннарын тiлепчебіс!
05.09.2024
Хабарлар
Елизавета Рудакова хыстарынаң паза офицер чир-суғҷызынаң хада
Піске пасчалар. Ағбан город чуртағҷызы Светлана Паршакова хығырығҷыларзар айланча
Мин пылтыр Казах чирінең піссер ааллап килген пиҷе-туңманаң танызып алғам. Олар Хакасиязар постарының туғаннарын тілеп килтірлер. Оларның iҷелерi Елизавета Фёдоровна Рудакова хакас ипчі полтыр. Ол Шира аймаандағы Копьёв аалда (ол туста Орджоникидзе аймаа тӧстелбеен полған) 1925 чылда тӧріптір. Iҷезі соонаң, 16 частығда iстеніс армиязында тоғынчатханда, казах кізее Зейнулла Сербосановха ирге парыбыстыр. Нинҷе-де тус олар Сталинск городта (сағам Новокузнецк) чуртаптырлар. Анаң 1946 чылда оларның оолах тӧреен. Соонаң олар ирінің чирінзер, Казахстанзар, парыбыстырлар.
Iҷелерінің ікі фамилия полған одыр. Пірсі Черепкеева, таң, полған. Ол ағазының фамилиязы полған одыр. Пиҷелернің пірci сағысха кирче, хайди аны 6 частығда Дима туңмазынаң хада iҷелері Пелагея туңмазынзар ааллап ағылтыр. Пелагея андада Хызылчардағы химическай заводта тоғынтыр. Пелагеяның 1958 чылда тӧреен хызы Людмила полтыр.
1972-1973 чылларда Казахстандағы Семипалатинск облазында Жарминскай аймахтағы Георгиевка аалда iҷезінің чир-суғҷызы офицер полып служба апартыр. Сағам ағаа 75-76 часча полар. Ол iҷелерiнзер удаа ааллап килҷең одыр. Iҷезінің Хакасиядағы туғаннарын чахсы таныҷаң полтыр. Ол iкӧлеңнің хада суурынған сомнары халған. Арса, ол офицер полған иреннің пала-пархалары, пу хабарны хығырып паза сомны кӧріп, ӱндезерлер.
Iҷелері ӱреен соонда Хакас чирінең палғалыстар ӱзіл парған. Амды ол пиҷе-туңма мындағы туғаннарын таап аларға кӱстенче. Олар Семипалатинск облазында чуртапчаттырлар. Елизавета Фёдоровна 8 пала тааптыр.
Піреезі танып салза, пу номерҷе палғалызарға чарир: 89835882556, алай электроннай адреске пазарға: раrshакоvаs56@mаil.ru.
Сом Елизавета Рудакованың cӧбірезі архивінең
Автор :
Cветлана Паршакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
