Чайаачы олғаннар улуғ форумнаң айландылар
04.09.2024
Хабарлар
Хакасиядағы олғаннар – Москвада
Пресс-конференция. Орғах айының халғанҷы кӱннерiнде Хакасияның чайаачы олғаннары Чоннар аразындағы III олған культура форумында араласханнар
Москвадағы Пионерлер туразында Россияның 88 регионының паза 15 хазнаның тиксi 2500 чайаачы олғаннары паза чииттерi чыылысханнар. Орғах айының 22 – 24 кӱннерiнде анда улуғ форум ирткен. Хакасиядаң парған оолахтар паза хызыҷахтар андартын кӧдiре кӧңнiлiг айланғаннар. Чапсых чорыхтаңар олар СМИ тоғынҷыларынаң ӱлескеннер. Пресс-конференцияны Хакасияның культура министрi Светлана Окольникова апарған.
– Форумның программазы пай полған. Олғаннар музейлерде полғаннар, киноға чӧргеннер, ойыннар паза концерттер кӧргеннер, мастер-класстарда араласханнар, саблығ кiзiлернең тоғасханнар. Алғым мероприятие Россияның культура министерствозы кӱстенiзiнең ирткен. Хакасиядағы чайаачы палаларны республиканың креатив индустрия школазының устағҷызы Владислава Калиновская ӱдес чӧрген. Олғаннар, андар парар алнында, мында ӧнетiн таллағ ирткеннер. Амды олар наа пiлiстер ағылғаннар. Прайзы даа пасха регионнардаң нанҷылар тапхлап алған полар, – таныхтаан Светлана Анатольевна.
Алтай аймааның Кӧк хайа аалындағы олған музыка школазының ӱгренҷiзi Полина Удалец Москвада, ағаа хоза, мындағ улуғ форумда, пастағызын на полғанын чоохтаан. Аның кӧңнiне Россияның чон артизi Надежда Бабкина иртiрген мастер-класс тың кiрген. Ол олғаннарны орыс чонның сарыннарын ырлирға ӱгреткен. Iдӧк хызыҷах кӧклӧлер музейiнде полғанына ӧрiнче. Анда ол онҷааларны холнаң тутхлап кӧртiр.
– Форумда кӧп тузалығ ниме-ноо пiлiп алғам. Ӧӧнiнде кино паза анимация кӧстегҷе иртiрiлчеткен мастер-класстарда араласхам. Театр паза цирк кӧстегҷе мастер-классха чӧргемӧк. Мағаа Сергей Безруковтың мастер-клазы кӧңнiме кiрген. Мин артист поларға сағынҷаңмын. Че форумда кинодаңар кӧп ниме пiлiп алғанымда, минiң таңдағы профессиям режиссёр полар, – теен Хакасияның креатив индустрия школазының ӱгренҷiзi Николай Огнев.
Олғаннар форумның прай даа ачыхтарын кӧрерге маңнанарға кӱстенгеннер, аннаңар олар 5.30 час иртенӧк турҷаңнар. Оларға ӱс кӱн табырах ирт парған.
– Мағаа кiзiлернең чоох алызарға кӧңнiме кiрген. Халғанҷы кӱнде, фестиваль чабылчатханда, хоровод иртiргебic, уғаа морсымнығ пiлдiрген. Якут хызыҷахтарнаң сомға суурынғам. Олар мағаа пiлектес сыйлап пиргеннер. Амды минiң Туркменистаннаң, Хыдаттаң наа нанҷылар пар. Iдӧк цирк артизi Юрий Куклачёвнаң тоғазығ кӧңнiме кiрген. Ол форумға хоосхаларынаң хада килген, – чоохтаан креатив индустрия школазының ӱгренҷiзi Алина Александрова.
Пасха хазнадаң килген олғаннар англия тiлiнең чоохтасханнар. Хакасиядағы оолахтар паза хызыҷахтар оларнаң хада iдӧк англия тiлiнең пiлiскеннер.
Пресс-конференцияда Москвазар чӧрген палалар постары Хакасияда нименең айғасчатханнарынаңар чарытханнар. Кирилл Малыхин Асхыс аймааның Пилтiр аалындағы олған музыка школазынзар чӧрче. Анда аккордеоннаң ойнапча. Школа соонаң Хакасияның искусство колледжiнзер ӱгренерге кiрерге пӧгiн тутча. Кирилл Харюшин Ағбандағы 2 № олған музыка школазында ӱгренче, гитаранаң чахсы ойнапча.
– Мин уғаа кӧп кружокка чӧрчем, – чоохтаан позынаңар Ульяна Воробьева. – Креатив индустрия школазында «Фото и видео» студиязар чӧрчем. Хоос школазынзар чӧрерге маңнанчам. «Лира» чайаачы кiнде барабаннаң паза гитаранаң ойнирға ӱгренчем. Москвадағы форумда оркестрдегi скрипка сiлiг ойнапчатханы кӧңнiме кiрген, аннаңар амды пу кӧг тириинең ойнирға ӱгренiп аларға пӧгiн тутчам.
Мындағ чайаачы чииттер ӧсчелер пiстiң республикада. Оларның тилiзiне Хакасияда улуғ хайығ салылча.
Сом Хакасияның креатив индустрия школазыни
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
