Хорғыс чох тынағ ӱчӱн
30.08.2024
Хабарлар
Республика пазының орынҷызы Юрий Курлаевтiң устаанынаң «чол картазы» ӱзӱрии парча
Туризм. Хысхы сай Приисковай аалзар пір муңҷа кізі тынанарға кил парча. Оларның ӧӧн чардығы туризмнің хорғыстығ кӧрімнерінең айғасча, удаа саайлар пол парча
Пу наада Хакасия правительствозында республика пазының орынҷызы Юрий Курлаевтің устаанынаң Приисковай аалда хорғыс чох туризм орнын тӧстир сурығҷа чыылығ ирткен. Сурығны ӱзӱрерінде араласханнар Россия МЧС-ының Хакасияҷа Ӧӧн устаныс кізілері, республиканың кӧcтегліг министерство-ведомство устағҷылары, халых пірігістерінің кізілері паза пос киреенең айғасчатханнар.
Хакасиядағы Приисковай аал – хысхызын тынанчатханнарның хайиин тартчатхан орын. Хысхы айларда тиксі хазнабыстаң 1000 турист кил парыбысча, оларның санында ӧӧнінде сноубордтығ, саналығ чылчатханнар паза снегоходтығ чӧрчеткеннер. Полған на чыл саайлан парғаннар поладыр. Аннаңар пу орынны туристтерге хорғыс чох идерінҷе сурығ турча. Ӧӧн сидіксіністер санында – аал тастыхти турчатханы паза аның ибіркі чирлерінде хомай палғалыс. Россия МЧС-ының Ӱстӱнзархы Сибирьдегі тілег-арачылағ отрядының базазы Ағбанда орныхча, ол, тізең, 300 километр артиинаң, аннаңар арачылағҷылар саай орнынзар чапчаң чит полбинчалар, уламох хысхызын порааннығ кӱннерде – учухчаң оңдай чох полча.
Россия МЧС-ының Хакасияҷа Ӧӧн устанызы Хакасияның экономика тилізі, финанстар, национальнай паза территориальнай политика министерстволарынаң, ГО, ЧС паза ПБ хазна комитедінең паза Приисковай аалда туризмнең айғасчатхан идінҷектернең хада-пірге пу аалда хорғыс чох туризм орнын тӧстирінҷе «чол картазын» тимнеен. Ол ікі чардыхтаң пӱтче.
Пастағызы хорғыс чох туризм инфраструктуразының тилізіне теелче. Тынағ орнында туристтерге радио палғалызынаң тузаланҷаң тиріг турғызылары, хомай хысхы кӱннерде чазынҷаң орыннар тӧстелері, ідӧк чайғы тынағ чолларын санға алары кӧрілче.
Ікінҷізі Приисковайда тоғынар халых тілег-арачылағ отрядын тӧстиріне теелче. Хакасияда андағ отряд Саяногорск хыриндағы чирлерде паза «Сустағы харағайлығ арығ» паркта маңнастығ тоғынча. Тоғынарға тимде пос кӧңніліг чуртағҷыларны Россия МЧС-ының Хакасияҷа Ӧӧн устанызының паза Хакасияның ГО, ЧС паза ПБ хазна комитедінің специалисттері тимнир. Ӱгренген чуртағҷылар «Арачылағҷы» профессия алғаннаңар пічiк аларлар, анаң квалификацияны киречілеп, аттестация иртерлер. Анаң на кізінің пу кӧстегҷе тоғынар оңдай полар.
Прай тоғыстарға ахчаны Хакасияның экономика тилізі министерствозы пастыра позыдарлар. Аның ӱчӱн коммерческай нимес пірігістерге (НКО-ларға) гранттар кӧрілер. Грант сині 2 миллион салковай полар. Ахча ідӧк тынанарға кил парчатхан туристтер тӧлеглерінең алылар.
«Чол картазы» пӱӱл 1 ӱртӱннең чуртасха киріліп пастир. Чыл тоозылғанҷа прай кирек чарадығлар алыл парарға кирек.
Тиксі алза, тимнелген «чол картазы» Приисковай аалда тынағны пілдірте хорғыс чох идерге полызар, регионның инвестиция тартчаң оңдайларын чахсыландырар. Прай ол алызығлар Хакасияның тиксі чуртас-экономика тилізіне чахсы теелер.
Сом r-19.ru сайттаң
Автор :
Тимнеен Наталья Сюптерекова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
