Пірдеезі оортах турбаан
23.08.2024
Хабарлар
Гуманитарнай полызығны таарлапчалар
Полызығ. Ӱр ниместе Хакасиядаң Курск облазының чуртағҷыларына гуманитарнай полызығ ызылған
Пӱӱнгі кӱнде тиксі хазнабыстың чуртағҷылары Курск облазында хорғыстығ киректер полчатханда, андағы чуртағҷылар хыйалға кірглеп парғаннарында, оларға хабасчалар. Хазнабыстың прай даа регионнары андар гуманитарнай полызығ ысчалар, ол санда пістің республика чуртағҷылары паза идінҷектер, оортах турбин, пос кӧңнінең ниме-нооны, чыып, андар ысчалар
Республика чуртағҷылары пір неделя аразына Курск облазының чуртағҷыларына сағам иң киректелчеткен ниме-нооны 20 тонна чыып алғаннар. Прай ол нимелер Ағбан городтың Таштыпскай орамазындағы 06 № турада орныхчатхан складта чыылғаннар. Пуох складтаң ӧнетін чаа операциязында араласчатхан чир-суғҷыларыбысха гуманитарнай полызығ ызылча. Андар читкенде, чыылған чон хайынчатхан, маң чохха тӱсчеткен. Тимнелген гуманитарнай полызығны кӧріп алар ӱчӱн складсар кіргем, анда кізее олаңай чуртаста киректелчеткен ниме-ноо полған. Ас-тамах санында полғаннар: улдурған ит, палыхтаң алай ӱӱҷік тамаанаң тимнелген консервалар, хойытхан сӱт, ун, рис, гречка, чей, сахар, чағбан хайах паза даа пасха чиистер. Ідӧк чуунынҷаң паза кип-азах чуғҷаң сабын-порошоктар. Ӱс час толдырғалах ыңааҷахтарға чиистер, чылығ кип-азах паза даа пасхазы.
Гуманитарнай полызығны ызарында айғасчатхан Светлана Чиркова чарытхан: «Халғанҷызын резерв складынзар сығдыратханда, кирексіністе матрастар, тӧзек-частыхтар паза раскладушкалар полчатханын искіргеннер. Эвакуацияа илееде кізі кір парған. Киҷее хыйалға кір парған 890 кізіні кӧзіргеннер. Оларны хонҷых регионнарзар апарчалар. Оларның олаңай узуҷаң чирлері дее чоғыл».
Хабазығны ызарға тимнепчеткеннернең чоохтасчатхан арада таарлағлар тарт чӧрҷең улуғ «фура» чиде салған. Андар тимнелген ниме-нооны «погрузчик» техниканаң киргеннер. Иң пастағызын холодильниктер таарлааннар. Хайди чоохтааннар, оларны чуртағҷылар чидікпин сахтапчалар. Чуртапчатхан орыннарда холодильниктер асхынах алай чоғыл. Чиистерні, тізең, олох сӱтті алай сӱттең иділген ас-тамахты паза итті холодильниктер чох хайраллирға сидік.
– Ағбаннаң «фура» киректелчеткен орынзар орғах айының 26-ҷы алай 27-ҷі кӱнінде чидері кӧрілче. Прай ниме-нооны поддоннарға таарлирға сурыныс полған, андада аар даа нимелерні хабарға паза, орынзар читсе, тӱзірерге ниик полар. Курскта гуманитарнай полызығны андағы волонтёрлар тӱзірерлер. Пӱӱнгі кӱнде тиксі хазна регионнарынаң ызылчатхан прай полызығлар хыйалға кір парғаннарға парчалар.
Пансионаттарда паза хостеллерде чуртапчатхан кізілер, холодильниктер паза тоортчаң камералар кирексіпчелер. Оларны піске республиканың идінҷектері пиргеннер. Пу кӱннерде гуманитарнай полызығны ӧнетін чаа операциязында араласчатхан чир-суғҷыларыбысха ызарбыс. Ол ідӧк тимде, анда техникалар, арачылаҷаң сеткалар паза даа пасха нимелер чыылған, – таныхтаан Хакасия пазының чӧпчізі Александр Векшин.
Республика чуртағҷылары, пір ӧменең тудынып, хазнабыстың хыйалға кір парған чуртағҷыларына хабасханнар. Прай аймахтарның паза городтарның чуртағҷылары, оортах турбин, полызығны чыырында араластырлар. Анзын мин, чыған гуманитарнай полызығны кӧрерге складсар кіргенімде, сизінгем. Тимнелген гуманитарнай харачахтарда Курск облазының чуртағҷыларынаң хада чобалчатханын читірчеткенін пас салғаннар. Александр Векшин таныхтаан, пу гуманитарнай полызығ халғанҷызы нимес, килчеткен неделяда хатабох ызардаңар искірген. Аннаңар Курск, Брянск областьтарының чуртағҷыларына хабазарға сағынчатханнар киректелчеткен ниме-нооны Ағбандағы Таштыпскай орамадағы 06№ складсар ағыларға чарир.
Сом авторни
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
