Иң артыхтары алайға сыхты
23.08.2024
Хабарлар
Пётр Тормозаков сыйиин алча
Сыйыхтас. Хакасияның ӱлгӱлері паза Россияның энергетика министрінің орынҷызы Сергей Мочальников «СУЭК-Хакасия» ООО предприятиелернің тоғынҷыларын Харатасчы кӱнінең алғыстааннар
М.Ю.Лермонтовтың адынаң Орыс драма театрының улуғ залында чон толдыра чыылыс парған. Прайзы «СУЭК-Хакасия» ООО-ның предприятиелерінің тоғынҷылары хада хонғаннарынаң паза пала-пархаларынаң хада. Алғыстирға килген аалҷылар санында Хакасияның улуғ аалҷызы, Россияның энергетика тилізі министрінің орынҷызы Сергей Мочальников, республика пазы Валентин Коновалов, аның чӧпчізі паза «Россети» ПАО устағҷызының чӧпчізі Николай Шульгинов, Ӧӧркі Чӧп кнезі Сергей Сокол, экономика тилізі министрі Роман Ковтун, «СУЭК» АО-ның паза «СУЭК-Хакасия» ООО-ның устағ-пастаа. Пастағы алғыстас сӧзі Сергей Мочальниковха пирілген:
– Мин пастағызын на Хакас чиріндебін. Харатасчы кӱнінде мында поларға киліскеніне ӧрінчем. Тоғызыңар ӱчӱн сірерні алғыстапчам. Халғанҷы ікі-ӱс чыл сидік тее полған полза, піс хара тастың чахсы оңдайлары пар тіп санапчабыс. Аннаң андар тилирбіс паза іскер чол тударбыс. Хара тазыбысты Россияда даа паза аның тастында даа киректепчеткеннерге читірербіс. Азияда Хакасияның хара тазын сағыпчалар, аннаңар піске ам прай кӱзібісті тоғысчы ӧмені хайраллап халарына, іскеркі саринзар «бросокка» тимнен саларына киректелче.
Сергей Викторович чыылған чонға Россияның энергетика министрі Сергей Цивилёвтың Харатасчы кӱнінең алғыстазын хығыр пирген паза нинҷе-де тоғынҷаа федеральнай министерствоның пӧзік сыйыхтарын читір пирген: «ТЭК тилізіне улуғ хозымы ӱчӱн» медальны Іскеркі-Пиидегі разрезтің экскаватор машинизі Анатолий Бородинге, 3-ҷі степеньніг «Харатасчы сабланызы» кӧкcіне хаптырҷаң танығны Харатастағы чир ис-пайын пайытчаң фабриканың ӧӧн механигі Алексей Лахинге, ідӧк министерствоның алғыстас пічіктері читірілген.
– Хара тас промышленнозы регион экономиказында ӧӧн кӧcтеглернің пірcі полча, че ӧӧн ис-пай – пос тоғызында сын істенчеткен тоғынҷылар. Сірернің тоғызыңар – ол сыдамах, махачы паза прай кӱсті пир поларын киректепчеткен сын чидіг. Оой нимес тоғызыңар ӱчӱн алғыстапчам. Алынҷа алғыс сӧстерін ветераннарға читірчем, харатасчыларның наа тӧлін турыстыра ӧскір салған ӱчӱн. Талаан, пик хазых паза чахсы чуртас алғапчам! – мындағ сӧстернең харатасчыларзар айланған Хакасия пазы Валентин Коновалов, анаң республика пазының алғыстастарын нинҷе-де тоғынҷаа читір пирген.
Сергей Соколның искіриинең, Хакасияда хара тас предприятиелерінде 5000 азыра тоғынҷының 3000-ы «СУЭК-Хакасия» ООО-да істенче. Ол тоғынҷыларға тіспен істенчеткеннері ӱчӱн алғызын читірген паза Шикаевтернің нинҷе-де тӧлі пу киректе тоғынчатханын таныхтаан. Алғыстас сӧстері соонаң Сергей Михайлович хара тас предприятиелерінің тоғынҷыларына Ӧӧркі Чӧптің алғыстазын читірген.
«СУЭК-Хакасия» ООО-ның ӧӧн директоры Сергей Канзычаков компанияның тилізінеңер паза инвестиция проекттері чуртасха кирілчеткенінеңер чоохтаан. Іди читі ай аразына СУЭК-тың Хакасиядағы разрезтерінде 8 миллион азыра тонна хара тас анылған, ол ирткен чылдағызынаң 600 муң тоннаа кӧп. Читі миллион азыра тонна садыл парған, ол ирткен чылдағызынаң 400 муң тоннаа кӧп. Пӱӱл Харатастағы разрез 65 чылын таныхтапчаттыр. Тоғызын пастааннаң сығара анда 200 миллион тонна хара тас анылған. Инвестиция проекттерін чуртасха киреріне пӱӱл 3 миллиард салковай кӧріл парған. Ол ахчаа прай разрезтерге наа техника алылча: экскаваторлар, самосваллар, бульдозерлер паза пасхазы. «СУЭК-Хакасия» ООО чылда 14 миллион тонна хара тас сығарча, че мыннаң мындар аннаң даа кӧп хара тас анирға пӧгін турча. Пу паза пасха даа чидіглер – ол тоғынҷыларның хозымы. Аннаңар артыхтарның артыхтарына ахчалығ сертификаттар паза аарластығ сыйыхтар читірілген.
Устағҷы холынаң 100 муң салковайлығ сертификат иң артых сигіс тоғынҷаа читірілген, ол санда БелАЗ водительі Яков Бутанаевке. 33 частығ ирен пайрамға хонғаны Татьянанаң хада килген. Хара тас предприятиезінде пис чыл тоғын салған. Ирткен чылда ол СУЭК-тың профессияда иң артыхтар мариинда тиксі Россияда пастағызы полыбысхан. Пӱӱл ол марығлар иртпеен, че Яков Александрович республикада чиңісчі полыбысхан. Аның ӱчӱн 100 муң салковайға турысхан. Позы ол Асхыс аймаандағы Ис пилтірі аалда тӧреен-ӧскен. ХТИ-ны тоосхан соонаң армияа пар килген. Істеніс чолын «СУЭК-Хакасия» ООО-да таарлағ машиназының водительі полып пастаан.
Пістің хығырығҷыларыбысха таныс Харатастағы разрезтің экскаватор машинизі Пётр Тормозаков пу пайрамда ідӧк «СУЭК-Хакасия» ООО-ның тилізіне алынҷа хозымы ӱчӱн сыйыхха турысхан. Ол, харатасчы полып, 1989 чылдаң ала істен парир. Пӱӱнгі кӱнде Пётр Вениаминович Россияның аарластығ харатасчызы полча, пу аарластығ атха ол 2016 чылда турысхан.
Сергей Канзычаковтың холынаң 3-ҷі степеньніг «Тағҷы сабланызы» кӧкcіне хаптырҷаң танығны алғаннар санында полған «СУЭК-Хакасия» ООО-ның сығарыс операцияларынҷа директоры Александр Добров.
– Пӱӱнгі кӱнні мин ағам Александр Петрович Добровха чарытчам, ол чирібістің пастағы хайҷыларының пірсі полған, че пӱӱнгі кӱнде аның ады ундудылча. Анзы мині хомзындырча. Аны 1936 – 1939 чылларда Апрелевкадағы грампластинкалар заводында пасханнар. Пластинкалар хырығ озаринда даа тарадылғаннар. Пластинкаларның пірсі Москвадағы грампластинкалар музейінде хайраллалча. Ізенчем, республикада аның адын хумартхылирлар. Позымның адынаң прай харатас
чыларны чағдапчатхан ӱлӱкӱннең алғыстапчам, – табырах чоохтап пирген Александр Николаевич.
М.Ю. Лермонтовтың адынаң Орыс драма театрында харатасчыларны сыйыхтиры ікі час парған. Иң улуғ ахчалығ сыйыхха – 1 миллион салковайлығ сертификатха – турысханнарны иң халғанҷылар санында сценаа сығарғаннар. «СУЭК» АО-ға кірчеткен полған на предприятие устағҷызы позының алғыс сӧзін читірген. Пайрам кӱнін ыр-сарыннарнаң, теелбектернең чазааннар республика филармониязының ырҷылары паза чайаачы ӧмелері.
Сом Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
