«Хакасия – хайхастығ чир!» – тіпчелер аалҷылар
16.08.2024
Хабарлар
Чиит хоосчылар «Мраморка» орында хоостар чайирға ӱгренчелер
Чорыхтығ семинарлар. Хакасиязар ДНР-даң паза Запорожьедең чиит хоосчылар ааллап килгеннер
Орғах айының 2 – 12 кӱннерінде Хакасияда Донецк Чон Республиказының (Мариуполь город) паза Запорожье облазының (Мелитополь паза Энергодар городтар) олған искусство школаларының паза ортымах профессиональнай ӱгредіг учреждениелерiнің ӱгренҷілеріне паза ӱгретчілеріне чорыхтығ семинарлар ирткен. Пу чорыхты «РусГидро» ПАО паза тиксі Россиядағы хоос искусствозы ӱгредіг сурығларынҷа халыхтар методика чӧбі тимнееннер.
Чорыхтығ семинарлар хоостыра Нымырттығда, Саяногорскта паза Ағбанда аймах-пасха мастер-класстар, пленэрлер ирткен. Москва, Мелитополь, Энергодар, Саяногорск паза Ағбан городтарның хоосчы-ӱгретчілері, пірге мероприятиелерде аралазып, опыттарынаң ӱлескеннер, ӱгредіг апарҷаң наа оңдайларнаң танысханнар. Ӱгренҷілер хоостирынҷа наа пілістер алғаннар.
Хоосчы ӱгретчілер паза ӱгренҷілер Хакасияда чапсых экскурсияларға чӧр килгеннер. Олар тилекейдегі иң пӧзік тулғорда – Сойан-Сус ГЭС-та – пол килгеннер. Чир-чайааны сіліг Бабик ойымзар чӧр килгеннер. Л.Р.Кызласовтың адынаң чир-суғ ӱгренҷең национальнай музейдегі кӧзідіг экспозицияларын кӧріп, пістің регионның хайхастығ культуразынаң паза пай тархынынаң танысханнар. Ідӧк республикабыстың пасха даа сіліг чирлерінзер чорыхха сыхханнар.
Илбек Ким суғ, мраморлығ чіке хайалар паза Хакасияның халын тайғазы. Мындағ чӱрексіністіг сіліг кӧрімнер азылған пленэрде араласхан хоосчыларға Саяногорск хыриндағы «Мраморка» паркта. Чиит хоосчылар, акварельнең, карандашнаң паза хайахтығ сырларнаң тузаланып, аймах этюдтар чайааннар.
Пленэр устағҷызы, Россияның Хоосчылар пірігізінің кізізі Мария Кострина чоохтаан:
– Мин Хакасиязар ӱзінҷі хати килдім. Мында аалҷыларны уғаа чахсы удурлапчатханнарын таныхтирға сағынчам: чахсы, кізее паарсах кізілер. Мының алнында «Мраморкада» поларға киліспеен. Пу орынны пістің проекттің араласчыларынаң хада пастағызын на кӧрчем. Сыбылығ сіліг тағлар хайхатча, олар узупчатхан драконнарға тӧӧйлер. Мындағ пленэрлерні иртірерге кирек, ДНР паза Запорожье олғаннарының чир-чайаанзар чорыхтығ мероприятиелерде аралазар оңдайлары чоғыл нооза. Пленэр – ӱгредіг тоғызының киректелчеткен чардығы. Анда піс хоостар чайирға ӱгренчебіc, пленэр чох ол тоғыс толдыра полбас.
– Ағбан тың кӧңніме кірген, піс городтың сіліг орыннарын хоостаабыс, суғ хазынзар чӧргебіс, Хакас чир-суғ ӱгренҷең музейде пол килгебіс – чахсы сағыстар халған. Пістің чирлерде пӧзік тағлар чоғыл. Мында, тізең, хоостаҷаң объекттер кӧп, тағлардаң, тигірдең пасти олох тас кӧзеелерге теере. Мин, хас-пурунғыдаң сығара турчатхан тас кӧзеелерні кӧріп, тың чапсаам. Піліп алғам, Хакасия аймах-пасха чир-чайааннығ сіліг чир ле нимес, ол кӱстіг тархыннығ чир, хайзы пос чилегелерінең ыраххы муңарлап чылларзар парыбысча, – сағыс-кӧрізінең ӱлескен пленэр араласчызы, Мариупольдаң килген Максим Кононенко.
Сомнар Хакасияның методика кініни
Автор :
Аскар Артамонов
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
