Аймахтарның тилiс оңдайлары ӱзӱрiлген
16.08.2024
Хабарлар
Хакасия пазы Валентин Коновалов паза чӧпчiзi Николай Шульгинов Ширадағы аал хонии техникумында
Тоғыс чорығы. Хакасия пазы Валентин Коновалов чӧпчiзi Николай Шульгиновнаң паза Ӧӧркi Чӧп кнезi Сергей Соколнаң хада Шира паза Боград аймахтарында пол килген
Шира аймаа аал хонии, промышленность предприятиелерi тоғынҷыларынаң, ӱгретчiлерiнең, имҷiлерiнең, культура деятельлерiнең хаҷан даа сабланған. Муниципалитеттiң чуртас-экономиказын тилiдерiне пӧзiк оңдайлар пар.
Хазна программалары хоостыра аймахта чонға тузалығ объекттер пӱдiрiлчелер паза тыхталчалар, специалисттерге паза изелчеткен чурттаң чуртағҷыларны кӧзiрерiне туралар пӱдiрiлчелер, коммунальнай паза чол инфраструктуразы тилiпче, орыннар иптелче, тасхархы чарытхы нааҷылалча. Туризм тилiзi аймахха танығлығ полча.
Тоғазығда муниципалитет тилiзi, республика паза федеральнай программаларында аралазар оңдайлар ӱзӱрiлгеннер, ағырсымнығ сурығларны пӧгер оңдайлар кӧстелгеннер.
Iдӧк Ширада ниме-ноо сығарызында тоғынҷылар чидiспинчеткенi хоостыра сурығ ӱзӱрiлген. Ширадағы аал хонии техникумы – иң кирек кӧстеглерҷе специалисттернi сығарчатхан, ол санда энергетика отрасльы специалисттерiн тимнепчеткен аймахта чалғыс ӱгредiг учреждениезi. Амды техникумда 470 кiзi ӱгредiг алча, пасха регионнардаң студенттер парох. Техникумда чайаачы, ынағ тоғынҷылар iстенчелер. Хай пiрее ӱгретчiлер техникумда онарлап чыл тоғын салғаннар. Олар техникумнаң сыххан тӧреен республиканы паза хазнаны тилiдер ӱчӱн тоғынчатхан кiзiлернең поғдархапчалар.
Пӱӱл пастағы энергетиктернi тимнебiскеннер, анзы аал хонии техникумы «Россети Сибирь» – «Хакасэнерго» ПАО-ның пӧлиинең хада-пiрге тоғынчатханы полча.
– 2029 чылда пiс «Хакасэнергонаң» «Отрасльларҷа чарытхы ӱзӱрлирi» наа кӧстег азыларынаңар чӧптезiгде хол салыбысхабыс. Компания тоғынҷылар тимнирiне нандырығлығ хайча. Социальнай-хазна партнёрство оңдайларынҷа ӱгредiг-тренировка полигоны, мастерскойлар, лабораториялар тӧстелгеннер, ӱгредiг программазы тимнелген. Паcтағы выпускниктерiбiс чарытхы компаниязынзар тоғынарға хығыртылғаннар, – теен Ширадағы аал хонии техникумының директоры Олег Недопёкин.
Ӱгредiг планында энергетик специальнозы пол килгенi Боград, Орджоникидзе паза Шира аймахтарындағы чарытхы сетьтерiнде тоғынҷылар суриин чардыхти пӧгiбiзер оңдай пирче. Пӱӱнгi кӱнде «Хакасэнергоға» 70 тоғынҷы киректелче.
«Россети Сибирь» ПАО посха специалисттер тимнирiне улуғ хайығ салча. Школаларда энергокласстар, энергокружоктар тӧстелче, чарытхы пирҷең объекттерде экскурсиялар сыбыра иртiрiлчелер. Энергетиктернi тимнеҷең ортын паза пӧзiк ӱгредiг учреждениелерiнде кӧстегҷе ӱгренер оңдай пар, корпоративнай стипендия тӧлелче, практика иртчеткен студенттерге ахча тӧлелче.
Хакасия правительствозы хабазиинаң аал хонии техникумында материально-техническай база кӧместең нааҷылалча. 2019 чылдаң сығара анда нинҷе-де мастерской азылған.
Хакасия пазы Валентин Коновалов Николай Шульгиновнаң паза Сергей Соколнаң хада аал хонии техникумында пол килген, тоғынҷыларнаң чоохтазып алған паза оларның сурығларына нандырған. Олох кӱнде Валентин Коновалов Боград аймаанда аал чӧбi пастарынаң тоғасхан. Анда iдӧк Боград аймаа пазының орынҷызы Галина Лейтис араласхан. Муниципалитетке аал хонии, туризм паза инфраструктура тилiзi танығлығ полча.
Халғанҷы чылларда аймахта нацпроекттер паза хазна программалары хоостыра кӧп тоғыс толдырыл парған. 2023 чылда ла Боградтағы олған искусство школазы паза Знаменкадағы олған музыка школазы тиксi тыхтал парған, кӧп чон чӧрчеткен орыннар иптел парған, коммунальнай хоных нааҷылалған, нинҷе-де чол тыхталған. Тӧрт школада саннығ ӱгредiглiг кабинет азылған, пiр школада – «Ӧзiс точказы».
Пӱӱн Хакасия правительствозы федеральнай кiннең хада Боградта наа имнег туразын пӱдiрердеңер сурығ ӱзӱрче.
Сом В.Коноваловтың телеграм-каналынаң
Автор :
Тимнеен Оксана Челтыгмашева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
