Прай объекттер соохтарға тимде ползыннар
16.08.2024
Хабарлар
Селекторҷа чыылығ. Хакасия пазы Валентин Коновалов хысхаа тимненіс хайди парчатхан сурығҷа правительство кізілерінең паза муниципальнай пӱдістер устағҷыларынаң селектор пастыра чыылығ иртірген
Чыылығны пастап, Валентин Коновалов амды республиканың муниципальнай пӱдістерi соохтарға амох хайди тимненчеткен сурығларны кӧрербіс тіп таныхтаан. Аның чооғынаң, регионның чурт-коммунальнай хонииның прай объекттерінде тимненіс тоғыстары тӱзімніг апарылзын, чыылығда ол сфера ӱчӱн нандырығлығ устағҷылар тимненіс хайдағ синде толдырылчатханнаңар искірзіннер.
Хакасияның чурт-коммунальнай хонии паза энергетика министрінің тоғызын толдырчатхан Максим Виноградов, сан пирiс тудып, кӧп саннар адаан. Iди чурт фондына паспортизация идері 50 процентке толдырыл партыр. Пу кӧзідімҷе алнында парчалар Алтай, Пии, Таштып паза Шира аймахтары. Тоғыс уйан толдырылча Абаза, Сорығ городтарда паза Боград аймаанда. ЖКХ объекттерінің тимненіс паспорттарын iдӧк уйан алчалар Сорығда, Харатаста, Расцвет поселокта.
Ростехнадзор органы котельнайларның прай оборудованиезі тоғынарға тимдезін сыныхтапча. Аның тоғынҷылары кадрларға, оларның тоғынар пiлізін, туралар сайбалбинчатханын сыныхтирына улуғ хайығ салчалар. Оборудованиенің тоғызы нормативтерге киліспинчетсе, ол читпестерні тӱзедеріне тус турғысчалар, аның соонда ла тимненіс паспорттарында хол салчалар.
Коммунар поселокта наа котельнай пӱдiрер тоғыстар графиктең соона халчалар. Сорығда Кировтың орамазында чылығ пирҷең трубалар алыстырылча, ағаа паза Тӧӧ пазы поселоктағы трубаларны нааҷылирына хоза ахча киректелче. Жемчужнай поселокта 3 № котельнайда тиксi тыхтағ апарылча, ол сайбалған полған. Прай муниципальнай пӱдістернің котельнайларында 13,9 муң тонна хара тас пилетелген. Ағбандағы ТЭЦ-та ла хара тас 100 процентке читкiҷе тартылған, пасха котельнайларда хара тас нормативке читпинче. Аннаңар муниципалитеттерге котельнайларына хара тасты читкіҷе тартып аларына хара тас аныпчатхан компанияларнаң контракттар идіп аларға киректелче.
Чарытхы пирчеткен ӱчӱн «Атомэнергосбыт» АО-ға тӧлир алымнар сині 97 миллион салковайға чит парған. Прай алымнарны Алтай аймаа чабысхан, iдӧк Асхыс аймаа алымның кӧбізi чардығын чаап салған. Пасхазына пу тоғысты узарадарға кирек. Иділген чӧптезіг хоостыра энергетиктер пӱӱл алымнар ӱчӱн объекттерге чарытхы пирерін тохтатпастар. Чарытхы пирер сетьтерні тыхтиры ам даа узарадылча.
Максим Виноградов чооғын тоосхан соонда, прай муниципальнай пӱдicтернің ЖКХ сферазы ӱчӱн нандырығлығ устағҷылары постарының объекттерiнде тимненіс тоғыстары хайди апарылчатханнаңар сан пиріс тутханнар.
Iдӧк постарының сфераларында хысхаа тимненiс тоғыстары хайдағ синде апарылчатханнаңар искіргеннер «Россети Сибирь» – «Хакасэнерго» ПАО филиалының устағҷызы Николай Шепырев, «Сетевая компания Сибири» ООО-ның директоры Андрей Жданов, Ағбан городтың «Абаканские электрические сети» МУП-ының директоры Алексей Ханин, «РЖД» ОАО-ның «Трансэнерго» филиалының чарытхы пирерінҷе Хызылчардағы дирекциязы пастығының пастағы орынҷызы Евгений Шелохович, Хакасияның iстеніс паза социальнай арачыланыс министрі Татьяна Раменская, хазых хайраллаҷаң министрі Олег Ананьевский, культура министрінің орынҷызы Наталья Салата, ӱгредіг паза наука министрінің пастағы орынҷызы Марина Сагатаева.
– Прай муниципалитеттернің хайиин айландырчам чурт-коммунальнай объекттернің соохтар тузын iзестіг иртірер техническай тимненізіне, iдӧк тимненіс паспорттарын аларына. Пӱӱл пістің ирткен чыллардағы кӧзідімнерні ас парыбызар оңдайыбыс пар. Андағ оңдайнаң прай объекттер соохтарға тимде ползыннар, – теен Хакасия пазы.
Сом r-19.ru сайттаң
Автор :
Николай Султреков
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
