Чиит инспектор хадаға турыбысты
31.07.2024
Статья
Чиит специалист Маргарита Тюдешева
Піліңер пістіңнерні. Маргарита Тюдешева ӱр ниместе Россия МЧС-ының ӧрттердең тоғыр хазна службазының Санкт-Петербургтағы университедін тоосты. Чиит специалисттің киҷее пастағы істеніс кӱні полған
Маргарита Тюдешева Ағбандағы 1№ школада ӱгренген. 5-ҷі классха сыхханда, аны Н.Ф.Катановтың адынаң Хакас национальнай гимназиязар пирібіскеннер. Анда ол физика паза математика клазында ӱгренген. Школа тузында ол олған искусство школазының «Хореография» пӧлиинзер чӧрген, олох туста «Пластилин» студиязар паза «Антарес» ансамбльзар чӧріп, теелбектенерге маңнан турған.
Улуғ класстарда ӱгренчеткенде, гимназиядағыларны Россия МЧС-ының ӧрттердең тоғыр хазна службазының Санкт-Петербургтағы университедінзер кӧстегліг оңдайнаң ӱгренерге хынчатханнарны таллааннар.
– Оларға физика паза математика кӧстеенҷе ӱгренчеткен, спорт нормативтерін тут полар пір хызыҷах киректелген. Мин ол туста чааҷы-инженернай вузсар кірерге сағыс тутчатхам. Спортнаң айғасхам, тимненгем. Санкт-Петербургтағы университетсер кірер оңдай полғанда, андар сірен кӧрерге сағын сыххам. Марығда ікі хызыҷах полғабыс. Нормативтерні чахсы тудыбысханда, вузсар мині алып алғаннар.
Пастағы чыл иң аар полған. Режимге кӧнігерге сидіктенгем. Кӧп чӱгӱр чӧрерге кирек полған. Общежитиеде чуртаам. Анда студенттерге прай чахсы оңдайлар тимнел парған. Вузта ӱгретчілер кӱстіг полғаннар. Техническай наукаларның кандидаттары кӧп лекция хығырғаннар. Ӱгренерінең пасха, пістің ідӧк культура мероприятиелері кӧп иртчең. Піс музейлерзер удаа чӧр турҷаңмыс, – сағысха кирче Маргарита.
Чайаачы хыс вузта теелбектернең айғазарын узаратхан. Олар чайаачы ӧменең вузтың паза городтың сценаларында концерт кӧзітчеңнер, марығларда араласчаңнар. Ӱгредіг сидік, олох туста хынығ ирткен тіпче ол.
– Мин Россия МЧС-ының ӧрттердең тоғыр хазна службазының Санкт-Петербургтағы университедінде ӱгреніп алғаныма уғаа ӧрінчем. Хада ӱгренгеннернең уғаа чағынмыс. Ӱс чыл аразына кӧп сидіксіністі хада тобырғабыс нооза. Піснең хада пасха хазналардаң килген студенттер ӱгренгеннерӧк.
Пастағы курсха килгенде, анда ідӧк Хакасиядаң пір оол ӱгренген. Максим Киштеев мағаа хайдағ-да ізеніс пирген, чир-суғҷым мындада, чӱрееме истіг пілдірген, – хатхырча Маргарита.
Маргаританың кічіг туңмазы ідӧк турыстығ специальность алар. Ол Москвадағы чааҷы университедінде ӱгренче. Чиит хыс, ортын класстарда полғанда, Хызылдағы Президент кадет училищезінзер ӱгренерге кіріп алған. Общежитиеде чуртаан. Аның аттестадында ікі ле «4» турча, пасхазы «5»! Вузта даа ол чалтырама піліс кӧзітче. Хаҷан даа махтағда. Ол анда тіллерні тирең ӱгренче. Чааҷы тілбесчізі поларға сағынча!
Маргарита туңмазынаң хада Санкт-Петербургтағы паза Москвадағы Дворцовай паза Хызыл площадьтарда Илбек Чиңіс кӱніне чарыдылған пайрамнарда курсанттарнаң хада пір ле хати маршнаң сыхпааннар.
Маргарита Тюдешева стажировканы Алтай аймаандағы Хубачар аалда иртче. Нинҷе-де ай пазынаң ол Пии аймаанзар тӧреміл тоғысха ызылар.
Маргаритадаң пасха пу кӱннерде ідӧк ӱс чиит арачылағҷы республиканың ӧрт ӱзірҷең службаларында істеніс чолын пастабысты. Чиит специалисттерні Россия МЧС-ының Хакасияҷа ӧӧн устанызының пастығы Александр Мулл алғыстаан паза удостоверениелер читірген. Істеніс чолларын наа ла пастапчатхан дознавательлерге паза инспекторларға наставниктер полызарлар.
Сомнар сӧбіре архивінең
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
