Тиксі Россиядағы инспекция хоостыра
24.07.2024
Хабарлар
Валентин Коновалов, Мария Львова-Белова СВО араласчылары сӧбірелерінең хада
Сыныхтағ. Хакасиязар ӧкіс палаларға хайығ хайди салылчатханын сыныхтир тоғыснаң Россия президентіндегі пала праволарынҷа уполномоченнай Мария Львова-Белова кил парған
Хазна пазының чахиинҷа пала праволарынҷа уполномоченнай Мария Львова-Белова иртірчеткен тиксі Россиядағы инспекция 89 субъектке теелер. Сыныхтағлығ мероприятиелер тузында социальнай сиротство профилактиказының системалары сыныхталар, тузаланылчатхан оңдайлар паалалар, чапчаң паза стратегия саринаң пӧкчең сурығлар ӱзӱрілер.
Хакасия правительствозының паза Хакасия пазының пресс-службазы искіриинең, олған омбудсмені «Теремок» республиканың тура-интернадында, республиканың клиникалығ олған имнег туразында пол килген паза кӧп палалығ сӧбірелерге автомобильлер читірерінде араласхан. Паза Мария Львова-Белова ӱлгӱ органнары устағҷыларынаң, чазы читкелектер сайбағ итчеткенінің паза хайығ чох полчатханының профилактиказынҷа учреждениелернең хада чыылығ иртірген. Аннаң пасха, Россия президентіндегі пала праволарынҷа уполномоченнай ӧнетін чаа операциязында чуртастарын пир салған чааҷыларның туған-чағыннарынаң паза тоғазыға пазын салған сӧбірелернең тоғасхан.
Хакасия пазы республика правительствозының ӧӧн кӧстеглерінің пірсі кізінің чахсы чуртазы полчатханын таныхтаан. Палаларға паза чииттерге хабазар кӧстегнең аймах-пасха программалар паза проекттер чуртасха кирілче. Алынҷа хайығ СВО араласчыларының сӧбірелеріндегі палаларға салылча.
– Правительство адынаң Сірерге алғызым читірчем, Хакасияның проекттеріне хабасчатханыңар ӱчӱн. Федеральнай кін регионда ӱзӱрілчеткен сидіксіністерге хайығ салчатханы піске аарлығ. Піс тӱзімніг пірге тоғысха хаҷан даа тимдебіс, – таныхтаан Валентин Коновалов.
Мария Алексеевна, пос саринаң, кӧп палалығ сӧбірелер, хайзылары республикада чылдаң чылға кӧптең кӧп полып одырчалар, улам чахсы чуртастығ полып одырзыннар, тіріг іҷе-пабазы пар ӧкіс палалар саны хызырыл ла турзын тіп алғаан.
Тоғыс чорығы тузында Россия президентіндегі пала праволарынҷа уполномоченнай Мария Львова-Белова «Ада чир-суубыс арачылағҷылары» чыындының Хакас Республикадағы пӧлиинде пол килген.
Хайди искірче ол чыындының пресс-службазы, Мария Алексеевна анда СВО-да чат халған матырларның кӧп палалығ сӧбірелерінең тоғасхан. Тоғазығда іҷелер чуртастарынаңар, хайдағ сидіксініcтер парынаңар паза «Ада чир-суубыс арачылағҷылары» чыындының Хакас Республикадағы пӧлии оларға хайдағ полызығ пирчеткенінеңер чоохтап пиргеннер.
– Я, хай-хай аар пол парған, ир кізінің хабазии чидіспинче. Пістің турабыс улуғ, Дима ӧнетін чаа операциязына парар алнында ла аны пӱдірерін тоос салған. Че ам даа оох-теек пӱдіріг тоғыстары халған, че сағам ол сурығнаң айғасчаң оңдайым чоғыл, – ӱлескен кӧп палалығ іҷе Анастасия Гровер.
Дмитрий, Анастасияның ирі, СВО-ға пос кӧңнінең парған, аның Чечен чирінде чааласхан чааҷы опыды пар полған. Ирткен чылның кӧрік айында Дмитрий, ыырҷының хол гранатазы чара чачыраанына аар палығлат салып, чат халған. Ол туста аның ӱзінҷі палазына – Татьяна хызыҷаана – ікі ай толған. Россия президентінің указынҷа махачызы ӱчӱн матыр ӱреен соонда «Мужество орденінең» сыйыхтатхан. Хакасия правительствозы чарадиинаң Дмитрий «За заслуги перед Хакасией» орденге турысхан, ӱреен соонда.
Мария Львова-Белова ол прай сидіксіністерні, хайзыларына Анастасия урунған, чахсы оңарчатханын таныхтаан – ол позы даа кӧп палалығ іҷе нооза. Иң не пастазын Анастасияа позынаң пастирға, посха тынанып аларға чӧп пирген, іҷе кізее кӱс алынып аларға киректелче. Анастасияның сӧбірезіне реабилитация кінінде тынанып алар сурығҷа Хакасия правительствозы хабас пирер, андағ молҷағны тоғазығда араласхан Валентин Коновалов пирген.
Мария Алексеевна ідӧк Алиса Куюкованаң паза Ирина Постовгарнаң чоох алызып алған, ипчілер постарынаңар чоохтап пиргеннер, палаларының чидіглерінең ӱлескеннер. Алиса Куюкова, СВО-да чуртазын пир салған матырның ипчізі, пала праволарынҷа уполномоченнайға сыйых читір пирген – пос холынаң иткен поғоны.
Сом «Ада чир-суубыс арачылағҷылары» фондтың ВК-дағы страницазынаң
Автор :
Тимнеен Альберт Толмашов
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
