ФАП тыхталча
23.07.2024
Хабарлар
Хабазығ. Хакасияның саайлар чох идерiнең паза пӱдiрiгнең айғасчатхан ӧмезi Должанский посёлокта фельдшер пунктының хырын нааҷылапча
Хакас Республикадаң парған пӱдiрiгҷiлер ӧмезi Должанский посёлокта iкi хадыллығ тураның хырын нааҷылирынаң айғасча. Ол турада ФАП, библиотека паза пис квартира орныхча. Пiр квартира социальнай найм хоостыра пирiлген.
«БлагоДарите» полызығлығ фонд паза Свердловсктағы муниципальнай округтың регион-шефi полызиинаң тыхтағ тоғыстары ӧткiн апарылчалар.
Пӱдiрiгҷi Владимир Василенконың чооғынаң, тура уғаа иргi, хыры изелчеткен, iрiктеп парған чарды илееде кӧп полған.
– Пiс чардыхти ла тыхтирға cағынғабыс, че тура хырын сайабысханда, мында илееде тоғыс сығыс килген. Амды стропилаларны, обрешётканы паза шифернi алыстырчабыс. Стропила системазына ла 20 стропила парыбысхан, – таныхтаан Владимир Юрьевич.
Хакас Республика пазының чӧпчiзi Сергей Комаров тыхтағны чапчаң тоозыбызарға кӱстенчеткеннерiн сизiнген. Пу чағында наңмырлар чаары кӧрiлче нооза.
«Должанский» фельдшер пунктының устағҷызы – медсестра Татьяна Хозейнiң чооғынаң, посёлокта 345 кiзi чуртапча. Фельдшер пункты кирексiнiсте, андар кӱннiң 7 – 10 кiзi кил парча, ағаа хоза Татьяна Николаевна 5 – 10 чуртағҷының ибiнзер позы чӧрче. Ол пiр часха читкелек палаларны сыбыра сыныхтапча, вакцинациянаң айғасча, пастағы имнег полызиин пирче, уколлар турғысча, кирексiнiс полза, табырах имнег полызиин хығыртча.
Ай сай фельдшер пунктынзар имҷi кил парча, полған на ӱс ай пазынаң – Свердловсктағы кӧп кӧстегліг ӧӧн имнег туразының имнег бригадазы. Пала имҷiлерi чидiспинчеткеннеңер, олғаннарны городсар тарт чӧрерге килiсче.
– Сидiксiнiстер хаҷан даа полчалар. Чарытхы столбаларынаң сидiксiнiс полған, ол сурығ пӧгiл парған. 60 чылларда пӱдiрiлген имнег пунктында чылығ пирер система чоғыл, чарытхыдаң тоғынчатхан каминнең чылынчабыс. Суғ чоғыл, тасхар колонка пар, че анда даа суғ сыбыра полбинча. Пу сурығлар ӱзӱрiгде. Тура хырынаң хыйал полған, ӧтiре суғ ахчатханда, пос кӱзiнең тизiктернi чох итчеңмiс. Амды тура хырын пiске тыхтапчалар, – таныхтаан ФАП устағҷызы.
Автор :
Тимнеен Оксана Челтыгмашева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
