Кубок пісти
19.07.2024
Хабарлар
Хакасияның командазы Наталья Ярыгинанаң хада
Чидіг. Хакасияның кічіг кӱресчілері ӧменең кубок утып алғаннар
Сус посёлокта 12-13 отта И.С.Ярыгиннің адынаң регионнар аразындағы полызығлығ фондтың сыйыхтарына олаңай кӱресче турнир ирткен. Марығ 2011-2012 чылларда тӧреен оолағастарға паза хызыҷахтарға кӧрілген.
Спортсменнер арға-мӧрійге ӧменең сыхханнар. Тикcі алза, турнирде пис команда – Хызылчар, Назаров, Шарыпов, Сус аймаа паза Хакасия – араласхан. Полған на ӧмезер 4 хызыҷах паза 6 оолах кірген.
Турнирні асхан спорт кӱрезінҷе Россияның спорт федерациязының вице-президенті Наталья Ярыгина. Хакасияның піріктірілген командазы пастағыох хабызығларда позын турыстыра кӧзіткен. Пістіңнер Назаровтың ӧмезін 10:0 саннаң чиңіп алғаннар. Арға-мӧрійнің ікінҷі хурчаанда Шарыпов аймааның кӱресчілерінең тоғазығ ирткен. «Ыырҷыларны» 8:2 саннаң утып алғабыс. Хакасияның командазы сустағыларны 10:2 саннаң чиңіп алған. Азах меетте хызылчардағылар матап удурласханнар. Че тоғазығ 7:3 саннаң тоозылған. Республиканың ынағ ӧмезі, чиңіс тудып, кубокты холға кирген.
Прай ӧмелерге танығлығ сыйыхтар читіргеннер. Оларны И.С.Ярыгиннің адынаң фонд паза Д.Г.Миндиашвилинің адынаң кӱрес академиязы тимнептір. Чиңісчілерні паза призерларны ахчалығ сыйыхтарнаң таныхтааннар. Ідӧк олғаннарға СССР-ның саблығ тренері Дмитрий Миндиашвилинің кинделерін сыйлааннар.
Хакасияның ӧмезінзер кіргеннер: Наталья Кизик, Дарья Валькевич, Дарина Котожекова, Арианна Комозакова, Арсентий Мамышев, Орхан Байыр, Матвей Дорофеев, Данил Бутонаев, Сулайманжон Шавкиев паза Дмитрий Толмашов. Марығның иң чахсы кӱресчізіне саналған Дарья Валькевич. Команданы марыға тренер Татьяна Карамчакова тимнеен.
Кӱресчілерге хабасчатхан ӱчӱн улуғ алғызыбысты Ӧӧркі Чӧп депутады Михаил Молчановха читірчебіс.
Сом авторның архивінең
Автор :
Ефим Бургундосов, олаңай кӱресче тренер
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
