Чарытхы сурии пӧгілче
17.07.2024
Хабарлар
«Россети Сибирь» – «Хакасэнерго» ПАО-ның Ағбан пилтірі пӧлиинің пастығы Вячеслав Козедубов тыхтағ тоғыстарынаңар чоохтапча
Тыхтағ тоғыстары. Ағбан пилтірі аймаандағы Тазоба пилтірі, Расцвет, Зелёнай паза Тепличнай аалларда чарытхы тартарынҷа тоғыстар апарылчалар
Пу наада «Россети Сибирь» ПАО-ның специалисттері Тазоба пилтірі чарытхы тоңнағын чахсыландырарынҷа хайдағ тоғыстар толдырылчатханына чарыдылған чорых иртіргеннер. Анда Хакасия пазының орынҷызы Юрий Курлаев, Ағбан пилтірі аймаа пазы Елена Егорова, Тазоба пилтірі аал чӧбі пазы Иван Сажин, Расцвет аал чӧбі пазы Анна Мадисон, «Хакасэнерго» пӧлиинің специалисттері араласханнар.
Халғанҷы чылларда Ағбан город хыриндағы аалларда алынҷа туралар ӧткін пӱдірілчелер. Че оларның кӧбізі чарытхынаң чылыдылчатханнаңар, хысхыда чарытхы кӱзі чидіспинче. Ирткен чылның улуғ хырлас айында 40 градус соохтар турыбысханда, чуртағҷылар чарытхынаң тоғынчатхан пестерін прай кӱзінең тоғындырыбысханнар. Чарытхы кӱзі чидіспинібіскенде, «Расцвет» подстанцияның чарытхы пирҷең эмектері сыдаспааннар. Тазоба пилтірі паза Расцвет аал чӧбінің чуртағҷылары чарытхы чох халғаннар. Чарытхыны читірер ӱчӱн, наа линиялар пӱдірілгеннер. Энергетиктер 15,9 километр эмек тартыбысханнар, 80 тірӧс турғыс салғаннар.
Пу сидіксіністі пӧгібізер ӱчӱн, Хакасияның ӱлгӱлері Ағбан пилтірі аймаандағы аалларда чарытхыны ізестіг читірерінҷе проектті чарадыға алыбысханнар. Аны чуртасха киреріне 136 миллион салковай кирек. Тыхтағ тоғыстарын тузында пастир ӱчӱн, чарытхы читірҷең компания ахчаны кредитке алып алған.
Амғы туста «Хакасэнерго» пӧлік Тазоба пилтіріндегі чарытхы тоңнағының тоғызын чахсыландырарынҷа программа хоостыра тӧрт 10 кВт линиязын нааҷылапча. Анзы Тазоба пилтірі, Зелёнай аалларда паза Тепличнай посёлокта чарытхы суриин пӧгібізерге полызар. Пылтыр улуғ хырлас айында саайлар полғанда, Тазоба пилтіріне чарытхы ікі линияҷа пирілген – «Калининская» паза «Расцвет» подстанцияларынаң. Тыхтағ тоғыстары соонаң чарытхы ӱс подстанциядаң пис линияҷа пирілер. «Калининская» паза «Расцвет» подстанцияларға 110 кВт «КСК» подстанция хозылар. Пу подстанция Харатас город паза Ағбан пилтірі посёлок аразында хаҷан-да ХакТЭК котельнай полған чирде орныхча.
Тыхтағ тоғыстары хайди парчатханын кӧзіт пирер пӧгіннең «Хакасэнерго» пӧлік орындағы ӱлгӱ кізілеріне паза хабарҷыларға пресс-тур иртірген. «Россети Сибирь» – «Хакасэнерго» ПАО-ның инвестициялар паза тиксі тыхтағ тоғыстары устанызының устағҷызы Оксана Витриктің чооғынаң, пӱӱл 34 трансформатор подстанциязы, 596 тірӧс турғызылар, 24,2 километр чарытхы линиязы тартылар. Олох туста Тазоба пилтіріндегі Лениннің орамазында ағас тірӧстеріндегі 0,4 кВт линиялар алыстырылар. Аннаң пасха, наа чарытхы линияларын тартарына ікі орында 4 метр тирең чир алтында трубалар саларға килізер. Чир алтынҷа трубалар салар специалисттер чохтаңар, подрядчик пасха регионда табылар. Оксана Витрик чылығ пирҷең тус пасталғанҷа тыхтағ тоғыстары толдырыл парар тіп ізендірген.
Оксана Витрик тыхтағ хайда иртірілчеткенінеңер макетте кӧзітче
Таныхтирға кирек, нааҷылалған линиялар амғы потребительлерге ле кӧріл парған, наа пӱдірілчеткен туралар тузаланысха кирілзе, чарытхы кӱзі прайзына чидіспес. Тазоба пилтірі аал чӧбінің пазы Иван Сажиннің таниинаң, чыл сай Тазоба пилтірінде 300 – 500 тура пӱдіріл парча. Расцвет аалда олох син чурт тузаланысха кирілче. Оларның кӧбізі чарытхынаң чылыдарына кӧріл парған. Чуртағҷылар тураларын, хара таснаң одынарға хынмин, чарытхынаң чылыдып, истіг чуртирға хынчалар. Че чарытхы кӱзі чидіспинче, саайлар пол парча. Аннаңар тураларда пестер турғызарға килісче.
Хакасия пазының орынҷызы Юрий Курлаев таныхтаан:
– «Хакасэнергоның» алынҷа тиліс программазынҷа он мероприятие кӧріл парған. Аны чуртасха кирерге 167 миллион салковай киректелер. Амды пис наа чарытхы линиязы тартылча. Анзы чарытхыны читкіҷе читірерге паза хысхы тусты ізестіг иртерге полызар. Че амғы туста пастағы пӧгін – Ағбан пилтірі аймаа тилир оңдайларны табары. Аймахтың чирлері илбек, алынҷа туралар кӧп пӱтче. Кізілер чурт пӱдірінерге чирлер алчалар, анзы уғаа чахсы. Че піс потребительлерге чарытхы читіреріне оңдайлар тӧстирге кирекпіс. Аннаңар аймахтың устағ-пастаанаң хада чирлерні тиксі тилідер планны тимнепчебіс, неделяда ӱзер хати тоғасчабыс. Пір орында прай ниме ползын тіп сағынчабыс – суғ даа, чылығ даа, чарытхы даа паза пасха даа ниме. Туралар пӱт парған орыннарда тыхтағ тоғыстары хайди ла полза иртірілчелер, алыл парған программаҷа нимес.
Расцвет аал хыринда тірӧстер турғысчалар
Ағбан пилтірі аймаа пазы Елена Егорованың чооғынаң, чарытхы пирерінде сидіксіністер паза саайлар полбас ӱчӱн, пӱдірігні хайығда тударға, ӧнетін проект тимнирге кирек. Кізілер, чир алып алзалар, тураны пос кӧңнінең пӱдірчелер, анаң на чарытхы тартырчалар. Пӱӱл энергетикаҷа толдырылчатхан тоғыстар сидіксіністерні ӱр нимеске ле пӧгібізерлер. Чарытхы линияларын нааҷылирынаң пасха, наа линиялар пӱдірерге паза хоза чарытхы кӱзін тӧстирге кирек. Аның ӱчӱн, ааллар нинҷе чарытхы хоратчатханын піліп алар пӧгіннең, Тазоба пилтірі, Опытнай паза Расцвет аал чӧптеріне кірчеткен чирлернің планировказының проектін тимнирге кирек. Пӱӱл пістің аймах пу пастағнаң Хакасия правительствозынзар айланған. Ахчалығ хабазығ чох турғызылған пӧгіннерні толдыр полбас, – таныхтаан Елена Егорова.
Сомнар Дмитрий Сунчугашевти
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
