Хыныс ӱчӱн – сыйых
17.07.2024
Хабарлар
Иван Егорович паза Марита Марковна Чебочаковтар
Пайрам. Пу наада Таштып аймаанда Сӧбіре фестивальы иртірілген, ікінҷі чылы ол спорт мариина чарыдылча, анда тиксі аймахтаң сӧбірелер чыылчалар
Че пастағызын аймах пазы Николай Чебодаев илееде чыл чуртап салған ирепчілерні алғыстаан, ЗАГС тоғынҷыларынаң хада оларға сыйыхтар, чахайахтар читірген.
Николай Георгиевич паза Раиса Степановна Куюковтар Ибіг аал чӧбінде ӱр чуртап парирлар, олар тӧрт пала ӧскір салғаннар, хайзылары, пӧзік ӱгредіг алып, чон аразында тарасхлап парыбысханнар. Раиса Степановна Чыланнығ аалдаң, школа соонаң Ағбандағы ӱретчілер училищезін тоозыбысханда, Пиҷе холдағы пасталығ школада 36 чыл тоғын салған. Хада хонғанынаң аалдох танызып алған. Николай Георгиевич 39 чыл Таштыптағы совхозта тоғын салған. Тӱзімніг істеніс ӱчӱн Куюковтар аймах-пасха алғыстастарнаң, Аарластығ пічіктернең сыйыхтатханнар. Николай Чебодаевтің холынаң ирепчі «За любовь и верность» аарластығ медаль алып алғаннар. Олардаң пасха, ӱс сӧбіре андағ медальға турысхан.
Анатолий Ефимович паза Людмила Николаевна Путиннер 37 чыл хада чуртап салғаннар. Ікізі Улуғ паза Кічіг Сии аал саринаң сыххан. Людмила Николаевна, имҷілер училищезі соонаң тӧреен чирінзер айланып, Таштып аймаа имнег туразынзар медсестра тоғызына кіріп алған, пу тусха теере анда істенче. Анатолий Ефимович, Ағбандағы политехническай техникумда техник-механикке ӱгреніп алып, ағас анаң чурт-коммунальнай хоныхтарда, соонаң чоллар тыхтапчатхан устаныста АЗС операторы полып тоғынған. Пылтыр Анатолий Ефимович ӧнетін чаа операциязында аралазарға парыбысхан, тастыхти тур полбинчам теен. Хада хонғанынаң ӱс хыс ӧскір салғаннар, читі пархалығлар.
Геннадий Николаевич паза Наталья Николаевна Трушиннер Таштып аймаанаң сыхханнар, мында чуртас тооза чуртап парирлар, хада 43 чыл. Геннадий Николаевич Ӧлең чазыда тӧреен, чиит туста тракторист-машинистке ӱгреніп алып, чуртас тооза совхозта тоғын салған. Наталья Николаевна олох совхозта інек сағҷаң полып істеніп пастаан, анаң Улуғ Сиидегі школада паза Культура туразында кӧп чыл техничка полып тоғын салған.Трушин ирепчі пис пала ӧскір салған, амды оларның 14 парха.
Марита Марковна паза Иван Егорович Чебочаковтарның сӧбірезін Пыдырахта чахсы таныпчалар. Марита Марковна школа соонаң тимір чолда проводник полып тоғынған, трикотаж фабриказында, анаң илееде чыл аал хониинда: Асхыстағы «Тасхыл» совхозта, анаң «Абазинскай» совхозта, андартын тынаға парыбысхан. Иван Егорович Пыдырахта тӧреен, кӧп чыл аал хониинда тоғын салған паза «Хакас чирі» газетаның собкоры полған. Кізілер аның хабарларын хынып хығырҷаңнар. Ирепчі пис пала ӧскір салған, пархаларын кӧрерге полысча.
50 чыл хада чуртап салған ӱчӱн Виктор Александрович паза Татьяна Ивановна Лапиннер сыйыхтатханнар. Ир кізі аал хонии ветераны полча, ипчі – ӱгредіг ветераны, ікі пала ӧскір салғаннар, олар, тізең, тӧрт парха сыйлап пиргеннер.
Полған на ирепчі ЗАГС-тың тоғынҷыларының «Аарлас киндезінде» хол салыбысхан. Чеестеен соонаң сӧбірелерні чей ізерге хығырғаннар.
.jpg)
Марығ тузында
Олох туста спорт фестивальы пасталыбысхан, анда читі сӧбіре араласхан (пір ир кізі, пір ипчі, 8 – 12 частығ пала). Пӱӱл мындағ марығлар полған: чайаачы номер кӧзіткеннер, турист палатказын турғысханнар, ГТО нормаларын тутханнар, ағас тартысханнар, подушкаларнаң тудысханнар, дартс паза эстафета ойыннарын ирткеннер. Пір марығда іҷе-паба палаларын мумия оңдайынаң туалет чаҷынынаң орап саларға кирек полған, уғаа кӱлкістіг ойын.
Чиңісчі Мальцевтер сӧбірезі (Таштып) пол парған, 2-ҷі орында – Султрековтар (Таштып), 3-ҷі орында – Бурнаковтар (Улуғ Сии). Мындағ марығларда сӧбіре хайди тудынчатханы, сидіксіністерні тобырчатханы маңат кӧрінче.
Сомнар авторни
Автор :
Тарина Бутонаева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
